Jungun analitik psixologiya nəzəriyyəsi 1933 – Yuxular və simvollar 

İsveçrəli psixiatr Carl Jung belə deyir:

"Baxışınız yalnız öz ürəyinizə baxa bildikdə aydınlaşır. Kənara baxanlar xəyal qurur, içəri baxanlar oyanırlar.”

Avstriyalı həkim Sigmund Freud kimi insan davranışlarını və hisslərini formalaşdırmaqda şüuraltı zehni proseslərin əhəmiyyətini vurğulayan Jung xəstələrinə fantaziyalarını və yuxularındakı təsvirləri müzakirə etməyi və çəkməyi məsləhət görürdü. Əslində Jung 1912-ci ilə qədər Freudla yaxın əməkdaşlıq etmişdi. Freud insan davranışları üçün psixoseksual izaha diqqət yetirərkən Jungun yanaşması daha çox mənəvi və mistik idi.

Jung şüuraltında iki qatın olduğunu irəli sürdü:

1. Birinci qat, şəxsi şüuraltı, Freudunkuna bənzəyir; həyatımızda unudulmuş və ya çətin əldə edilən məzmunu əhatə edir. 
2. İkinci qat isə kollektiv şüuraltıdır və əcdadlarımızdan miras qalmış bir sıra xatirələr sahəsidir. 

Jung mədəniyyətlər arasında müəyyən ortaq təsvir və mövzuları arxetiplər adlandırdı. Bunların bütün bəşəriyyət üçün universal məna daşıdığına inanırdı. Junga görə bu arxetiplər çox vaxt yuxularda üzə çıxır və miflərdə, dində, incəsənətdə və ədəbiyyatda simvollardan istifadə ilə mədəniyyətlərin bir hissəsinə çevrilirdilər. Jungun analitik psixologiyasında insanlar bu cür yuxu simvolları üzərində düşündükdə fərqindəliklərini artıra bilərdilər. Jung həmçinin qorxu və ya narahatlığı azaltmaq üçün xəstələrə rəsm çəkməyi tövsiyə edirdi.

Jungun tibbi müalicələrə birbaşa təsir etməyən çoxlu qeyri-adi fikirləri var idi. Bu gün onun bir çox fikri hələ də məşhur sayıla bilər. Məsələn, faydalı hesab edilən ekstraversiya və introversiya şəxsiyyət ölçüləri haqqında ilk düşünən şəxslərdən biri Jung olmuşdur. 

Məqalə şəklinin təsviri: Jung tez-tez xəstələrinə yuxularının şəkillərini çəkməyi tövsiyə edirdi. Junga görə bu təsvir topluları ruhun dərinliklərindəki sakit məkanı tapmağa və yenilənməyə gedən yolda bələdçi idi.

Məqalədə adı çəkilən tarixi şəxslər: Sigmund Freud (1856–1939), Carl Gustav Jung (1875–1961)

• Əvvəlki mövzu: Həkimlərin öz üzərlərində təcrübə aparması 1929 – Risklər və kəşflər
• Növbəti mövzu: Stanleynin kristal işğalçıları 1935 – Virusların kəşfi