Koronavirus peyvənd namizədinin 2 milyard doza hədəfi ilə istehsalına başlanıldı

Oksford Universitetində çalışan tədqiqatçıların koronavirusa qarşı hazırladığı peyvənd namizədinin istehsalı AstraZeneca dərman şirkətinin sponsorluğu ilə başladı. Xəbərin təfərrüatlarına keçməzdən əvvəl alimlərin hazırladığı və ümidverici peyvəndi xatırlayaq:

Əvvəllər ChAdOx1 nCoV-19 adı ilə tanınan, lakin hazırda AZD1222 adlandırılan koronavirus peyvənd namizədi yuxarı tənəffüs yolu infeksiyalarına səbəb olan adenovirusun (ChAdOx1) zəiflədilmiş formasının istifadə edildiyi peyvənddir. Genetik xüsusiyyətlərinin dəyişdirilməsi ilə şimpanzelərdə infeksiyaya səbəb olduğu halda insan orqanizmində çoxalma xüsusiyyəti göstərmir. Peyvənd üçün istifadə edilən bu virusa həmçinin SARS-CoV-2 koronavirusunun səthində nümayiş etdirilən və infeksiya yaratmasında mühüm rol oynayan S zülalının istehsalı üçün tələb olunan genetik kodlar da əlavə edilib. Burada məqsəd immun sistemi hüceyrələrinin S zülalını tanıyaraq cavab yaratması və beləcə virusun hüceyrələrə daxil olmasının və infeksiyanın qarşısının alınmasıdır.

AstraZeneca-nın baş icraçı direktoru Pascal Soriot araşdırmaları davam edən koronavirusa qarşı peyvənd namizədi ilə bağlı BBC-yə müsahibəsində bunları deyir: ‘Verdiyimiz qərar çoxsaylı riskləri də özü ilə gətirir. Peyvənd gözlənilən nəticələri verməsə, bütün istehsalımız və sərmayəmiz boşa getmiş olacaq. Lakin bu riski gözə almalıyıq. Mümkün qədər sürətli olmaq istəyirik. Hədəfimiz tədqiqatın nəticələri gəldikdə 2 milyard peyvəndin istifadəyə hazır olmasıdır’.

AstraZeneca Hindistan Serum İnstitutu ilə bağladığı müqavilədə 1 milyard dozanın orta gəlirli ölkələrə təmin ediləcəyinə də söz verdi. Burada ilk hədəf 2020-ci il bitmədən 400 milyon dozanın ölkələrə çatdırılmasıdır. Dünyada bir sıra təchizat zəncirlərinin qurulduğunu bildirən Soriot: ‘Hazırlanacaq peyvəndin bütün dünyada istifadə edilə bilməsi əsas məqsədimizdir. Orta gəlirli ölkələrlə yanaşı, 300 milyon doza peyvəndi ABŞ-a, 100 milyon doza peyvəndi də İngiltərə-yə təmin edəcəyik. İlk tədarüklərin sentyabr ayından başlamasını gözləyirik ’ deyərək sevindirici xəbərlər verdi.

Qlobal problemə çevrilən və həyatın bir çox sahəsində pozuntulara səbəb olan koronavirusun müalicəsində ümid olan peyvənd namizədinin bütün bəşəriyyətin istifadəsinə veriləcək olması olduqca həyəcanverici hadisədir. Peyvəndlə bağlı tədqiqatları yaxından izləməyə və sizi məlumatlandırmağa davam edəcəyik.

*

Aşağıdakı infoqrafik posterdə əvvəlcə koronavirusa qarşı peyvənd olmadan necə immunitet yaratdığımızı (aktiv immunizasiya), daha sonra peyvənd vasitəsilə necə immunitet yaratdığımızı (passiv immunizasiya) və koronavirus peyvəndinin hazırlanmasında sınanan üsulların xülasəsini görmək olar:

Xarici məzmunu görmək üçün seçimləri tənzimləyin

Xarici məzmunu görmək üçün seçimləri tənzimləyin

*

- BÜTÜN KORONAVİRUS YAZILARIMIZ -

*

Xarici məzmunu görmək üçün seçimləri tənzimləyin