Mamoqrafiyaya niyə 40 yaşlarında başlamaq lazımdır?

Mamoqrafiya üçün ideal yaşın 50 və sonrası olduğu tövsiyə edilirdi. Lakin Amerika Xərçəng Cəmiyyəti artıq 45 yaşından əvvəl ilk mamoqrafiyanın çəkilməli olduğunu vurğulayır. Biz də erkən diaqnozla uğurlu müalicə şansını artırmaq üçün 40 yaşından etibarən mamoqrafiya skrininqini tövsiyə edirik.

Mamoqrafiya nədir?

Mamoqrafiya süd vəzinin X-şüası görüntüsüdür, yəni ixtisaslaşmış süd vəzi rentgenidir. Mamoqram da adlandırılır. Süd vəzi xərçənginə dair erkən radioloji əlamətləri axtarmaq üçün mamoqrafiyadan istifadə edirik. Müntəzəm mamoqrafiyalar süd vəzi xərçəngini erkən tapmaq üçün ən yaxşı test üsuludur.

Mamoqrafiya nə qədər tez-tez çəkilməlidir?

Xərçəng riski yaşla birlikdə artır. Süd vəzi xərçəngi adətən 50 yaşından yuxarı qadınlarda görülsə də, erkən diaqnoz üçün 50 yaşından əvvəl skrininqlərə başlamaq həyati əhəmiyyət daşıya bilər.

Amerika Xərçəng Cəmiyyətinin 2017-də yenilədiyi xərçəngin erkən skrininq təlimatına görə;

• Qadınlarda 45 yaşından etibarən mamoqrafiya ilə süd vəzi xərçəngi skrininqi aparılmalı; 45-54 yaş arası ildə bir; istəyən qadınlara 40 və 44 yaş arasında da illik skrininq imkanı verilməlidir.
• 55 yaşından yuxarı qadınlarda iki ildə bir skrininqə keçilməli və ya istəyən qadınlara ildə bir skrininq seçimi də təqdim edilməlidir; qadınların ümumi sağlamlıq vəziyyəti yaxşı və gözlənilən yaşam müddəti ≥ 10 il olduğu müddətdə mamoqrafiya ilə süd vəzi xərçəngi skrininqi davam etdirilməlidir.

Bununla yanaşı, ailəsində süd vəzi xərçəngi tarixçəsi olan şəxslər həkimləri ilə danışıb daha erkən yaşlarda süd vəzi xərçəngi skrininqinə başlamalıdırlar.

Niyə 40 yaşlarından etibarən müntəzəm mamoqrafiya lazımdır?

• Hər 6 süd vəzi xərçəngindən 1-i 40-49 yaşlarındakı qadınlarda görülür
• Süd vəzi xərçəngi diaqnozu alan 4 qadından 3-ünün ailə tarixçəsi yoxdur.
• Mamoqrafiyanın geniş istifadə olunmağa başladığı 1990-cı illərdən bu günə süd vəzi xərçəngindən ölümlərdə 1/3 nisbətində azalma olmuşdur.

Mamoqrafiyanı əvəz edə biləcək test hələ yoxdur. Mamoqram çəkdirərkən özünüzü rahat və komfortlu hiss etməyə bilərsiniz, lakin erkən diaqnozla düzgün xərçəng müalicəsi sağlamlığınıza qovuşmağınız üçün olduqca vacibdir. Mamoqrafiya sayəsində erkən diaqnozla bəzən yalnız kiçik cərrahi müdaxilə ilə (hətta kimyaterapiyaya ehtiyac olmadan) müalicə etmək mümkündür. Beləliklə, daha böyük əməliyyata ehtiyac olmadan həm sürətli, həm də asan müalicə həyata keçirilir. Mamoqrafiya yalnız həyat xilas etmək üçün deyil, eyni zamanda həyat keyfiyyətinin qorunmasına da kömək edir. Məlumatlı olmağınızı və skrininqlərinizi müntəzəm etdirməyinizi tövsiyə edirik.

Marağınızı çəkə bilər:

• İlk mamoqrafiyadan əvvəl hər qadının bilməli olduğu 12 şey