Musiqi terapiyasının xərçəng xəstələrinə faydaları

"Musiqi həyatın nəşəsi, ruhu, sevinci və hər şeyidir." Mustafa Kemal Atatürk

Xərçəng istər xəstə və yaxını, istərsə səhiyyə işçisi olsun, onunla qarşılaşanları emosional, fiziki və sosial baxımdan çətinliyə sala bilər. Musiqi terapiyası bu şikayətləri yüngülləşdirmək və müalicə prosesində görülən bəzi yan təsirləri azaltmaq üçün istifadə olunur. Xərçəng müalicəsi alan fərdlərdə musiqi terapiyasının seçilməsinin ilk səbəbi xəstələrin bunun sayəsində özlərini daha yaxşı hiss etməsidir. İngiltərədə 30 fərqli musiqi terapiyası texnikası və 1891 iştirakçı ilə aparılmış araşdırmada; kimyaterapiya alan xəstələrdə ağrı, ürəkbulanma kimi fiziki, depressiya kimi emosional sıxıntıların azaldığı müşahidə edilmişdir. Radioterapiya alan xəstələrə tətbiq edilən musiqi ilə terapiya sayəsində isə narahatlıqlarının, stresslərinin və yorğunluqlarının xeyli azaldığı görülmüşdür. Həmçinin ürək döyüntüsünün tənzimlənməsinə və qan təzyiqinin azalmasına da kömək etdiyi müşahidə edilmişdir. Daha tez-tez musiqi dinləyən xəstələr daha çox fayda görmüşdür.

Musiqi terapiyası xərçəng xəstələrinin;

• Qəzəbə nəzarət problemlərində,
• Duyğularını ifadə etməsində,
• Kimyaterapiya kimi tibbi müalicələrin öhdəsindən gəlməsində,
• Emosional və fiziki yaxşılaşmasında,
• Özünəinamını və xəstənin özünə hörmətini artırmasında,
• Ünsiyyət və sosial bacarıqlarının inkişafında,
• Yaradıcılığını inkişaf etdirməsində və
• Xəstələri rahatladaraq həyat keyfiyyətlərini artırmasında kömək edir.

Musiqi ilə terapiya üçün yaxşı musiqiçi olmağa ehtiyac yoxdur

Musiqi terapiyası mahnı oxumaqdan, not oxumaqdan və ya alət çalmağı öyrənməkdən tam fərqlidir. Çox insan rahat və sakit musiqinin insanı rahatlatdığını bilir. Vacib ilk addım; ruhun qidası kimi tanınan musiqiyə qulaq vermək, hiss etmək və daxilən mənimsəməkdir.

Musiqinin müalicəvi xüsusiyyətlərindən faydalanmaq üçün;

• Musiqi dinləmək,
• Musiqiyə daha yaxın olmaq (gündəlik həyata daxil etmək),
• Mahnı oxumaq,
• Musiqi terapevtinin müşayiəti ilə sadə alət çalmaq,
• Mahnı sözləri yazmaq,
• Musiqini və ya sözlərini zehində təsvir edərək düşünmək,
• Müşayiət etmək də olduqca faydalı olacaqdır.

"Vacib olan musiqinin dilini, mahnısını hiss etməkdir. Bu mənə böyük xoşbəxtlik verir. Təkcə mükəmməl piano çalmaq mənə xoşbəxtlik verməzdi." Fazıl Say