Süd vəzi xərçəngi ilə bağlı maraq doğuran sual ASCO-da cavabını tapdı

Süd vəzi xərçəngi reproduktiv yaşdakı qadınlarda ən çox müşahidə edilən xərçəngdir. Bu gün erkən diaqnoz və inkişaf etmiş müalicə üsulları sayəsində uzun ömür müddətlərinə çatmaq mümkündür.

Erkən diaqnoz qoyulmuş, süd vəzi xərçəngi əməliyyatı ilə şişi çıxarılmış və qoruyucu müalicələrini almış izləmədəki xəstələrimiz normal həyatına davam etsə də, hamilə qalsam, görəsən xəstəliyim təkrarlanarmı sualı həmişə qarşımıza çıxır.

Yeni diaqnoz qoyulmuş gənc süd vəzi xərçəngli xəstələrin % 50-si uşaq dünyaya gətirmək istəsə də, yalnız %10-unun xəstəlik təkrarlanarmı qorxusu ilə müalicədən sonra hamilə qalmağa cəsarət etdiyini bilirik.

Biz onkoloqlar üçün də tərəddüd mövzusu olan bu vəziyyət Amerika Xərçəng Konqresi ASCO-da təqdim edilmiş bildirişlə aydınlıq qazandı.

Tədqiqat

1207 süd vəzi xərçəngi xəstəsinin daxil olduğu tədqiqatda 333 xəstə hamilə qalıb, 874 xəstə isə hamiləlik planlaşdırmayıb. Tədqiqata daxil edilən xəstələrin %57-si qadın hormonuna həssas tipdə idi. %40-ı qoltuqaltı limfa vəzilərinə metastaz vermiş və ya böyük şişi olan yüksək risk amillərinə malik süd vəzi xərçəngli xəstələr idi. Xəstəlik diaqnozundan orta hesabla 2.4 il sonra hamiləlik planlaşdırılıb. Xəstələr 10 il izlənib.

Tədqiqat nəticəsində erkən mərhələli süd vəzi xərçəngi diaqnozu qoyulmuş və müalicələrdən sonra hamiləliyini tamamlayıb izləməyə alınmış xəstələrdə xəstəliyin təkrarlanma ehtimalı və xərçəngə bağlı həyat itkisi riskinin hamilə qalmayanlarla müqayisədə fərqlənmədiyi ortaya qoyulub.

Xüsusilə qadın hormonuna bağlı süd vəzi xərçəngində hamiləliklə artan estrogenin xərçəngi tətikləmədiyi, digər süd vəzi xərçəngi tipləri ilə eyni gediş göstərdiyi müəyyən edilib.

Fərqli olaraq qadın hormonuna bağlı olmayan süd vəzi xərçəngində hamiləliyin ölüm riskini %42 azaltdığı göstərilib. Bu diqqətçəkən vəziyyət immun sisteminin və ya qadın hormonlarının qoruyucu təsirinə bağlı ola bilsə də, əlavə tədqiqatlara ehtiyac olduğu qənaətindəyik.

Tədqiqatın nəticələri həm biz onkoloqlar, həm də xəstələrimiz üçün həyəcanverici olsa da, tədqiqat ətraflı nəticələrlə dərc edildikdə yenidən qiymətləndirmək uyğun olar.