Tibbi sığorta 1883 – Tibbi xərclərə qarşı müdafiə

Tibbi sığorta yüksək tibbi xərclərdən qorunmağa kömək edən, hökumətlər və ya özəl sığorta şirkətləri tərəfindən təmin oluna bilən sistemdir. 1883-cü ildə Prussiya-alman dövlət xadimi Otto von Bismarck milli tibbi sığorta proqramlarının ən erkən formalarından birini tətbiq etdi və sənaye işçilərinin böyük hissəsini tibbi xidmətlə təmin etdi. Milli səhiyyə planları sonradan İngiltərədə (1911), İsveçdə (1914) və Fransada (1930) quruldu.

Amerika Birləşmiş Ştatlarında tibbi sığorta nisbətən yeni anlayışdır, çünki 1920-ci ilə qədər insanların çoxu evlərində aşağı xərclə müalicə olunurdu. Tibbi texnologiyaların o zamankı vəziyyəti bir çox xəstəyə ciddi kömək etməyə imkan vermirdi. Hətta əməliyyatlar 1920-ci illərə qədər şəxsi evlərdə aparılırdı. 

• Amerika Birləşmiş Ştatlarında ilk fərdi sığorta planları Vətəndaş müharibəsi (1861-1865) zamanı başladı. Lakin yalnız buxarlı gəmi və ya dəmir yolu səfərləri ilə bağlı qəzalardan qorunma təmin edirdi. 
• Massachusetts Health Insurance of Boston, 1847-ci ildən etibarən nisbətən əhatəli qrup polisləri təklif etməyə başladı. 
• 1929-cu ildə Texasın Dallas şəhərində müəllimlər Baylor Xəstəxanası ilə sabit aylıq ödəniş müqabilində tibbi xidmətlər üçün ilk müasir qrup tibbi sığorta planını yaratdılar. Bu, Amerika Birləşmiş Ştatlarında Blue Cross Xəstəxana Sığortasının sələfi sayılır. 
• 1939-cu ildə California Medical Association, həkim haqlarını ödəmək üçün nəzərdə tutulmuş Blue Shield-i yaratdı. İkinci Dünya müharibəsi zamanı ABŞ hökuməti işəgötürənlərə əməkhaqlarını artırmağı qadağan etdi. Buna görə işəgötürənlər tibbi sığorta təklif edərək işçilərini itirməməyə çalışdılar.
• 1965-ci ildə yaradılan Medicare, yaşlılar və müəyyən əlilliyi olan şəxslər üçün dövlət proqramıdır. Medicaid isə müəyyən çox aşağı gəlirli uşaqları və ailələrini əhatə edir.

Amerika Birləşmiş Ştatlarında səhiyyə xidmətlərinə hökumət nəzarəti tez-tez müzakirə olunub. 1935-ci ildə Amerika Tibb Assosiasiyasının jurnalının redaktoru Morris Fishbein dövlət hesabına maliyyələşən tibbi xidmətin Amerikanı "kommunistləşdirəcəyini" və amerikalıların "siyasətçilərin iradəsi ilə hərəkət edən, nəfəs alan, yaşayan, əzab çəkən və ölən avtomatlara çevriləcəyini" söylədi.

Yazıdakı şəklin izahı: 19-cu əsrin sonlarında qatarlar olduqca təhlükəli ola bilirdi. Amerika Birləşmiş Ştatlarında ilk fərdi sığorta planları buxarlı gəmi və ya dəmir yolu ilə səyahətə aid qəzaları əhatə edirdi. Şəkildə 1895-ci ilin oktyabrında Granville-Paris ekspresinin qəzası görünür.

Yazıda adı çəkilən tarixi şəxslər: Otto Eduard Leopold von Bismarck (1815–1898)

• Əvvəlki mövzu: Faqositoz nəzəriyyəsi 1882 – Faqositoz və immunitet
• Sonrakı mövzu: Salpingektomiya 1883 – Uşaqlıqdankənar hamiləliyin müalicəsi