Xərçəngdə tamamlayıcı və alternativ müalicələrə ehtiyac hiss edilməsinin 7 səbəbi

Son dövrlərdə tamamlayıcı və alternativ tibb üsullarınamarağın xeyli artdığı aydındır. Bəs bunun səbəbləri nələrdir?

1. Xüsusilə metastatik (4-cü mərhələ) xərçənglərdə tam sağalma axtarmaq

Bəzi xərçəng xəstələri standart xərçəng müalicələrinin əvəzinə müəyyən alternativ müalicələrin istifadəsinin xərçəngə nəzarət və müalicədə kömək edə biləcəyinə inanır.

Alternativ müalicə istəyi standart müalicələrin tam sağalma vəd edə bilmədiyi 4-cü mərhələ xərçəngli xəstələrdə daha aydındır. Bu xəstələrdə ümidsizlik və gərginlik müşahidə edilir. Bununla yanaşı alternativ müalicələrin həyatlarını xilas edəcəyinə inam var.

Alternativ müalicələrin xərçəngə nəzarət və tam sağalmada roluna dair elmi sübut yoxdur. Alternativ müalicələrin çoxunun təhlükəsizliyi müəyyən edilməyib və təhlükəli yan təsirlər yarada bilər.

2. Daha yaxşı hiss etmək

İnsanlar adətən daha yaxşı hiss etmək və xərçəngin öhdəsindən gəlmək üçün tamamlayıcı müalicələrə müraciət edir. Bir çox tamamlayıcı müalicə rahatlama və stressi azaltmağı hədəfləyir. Həmçinin emosional vəziyyəti tənzimləyən, qayğı və narahatlığı aradan qaldıran, ümumi sağlamlığı yaxşılaşdıran təsir göstərə bilər. Bir çox həkim, onkologiya tibb bacısı və tədqiqatçı müsbət duyğuların sağlamlığa yaxşı təsir etdiyini bilir.

3. Yan təsirlərin azaldılması

Son illərdəki araşdırmalar tamamlayıcı müalicələrin xərçəng müalicələrinin yan təsirlərini aradan qaldırmaqda təsirli ola biləcəyini göstərir. Məsələn, akupunktur sayəsində bəzi kimyaterapiya dərmanlarının yaratdığı ürəkbulanma-qusma, halsızlıq kimi yan təsirlər və baş-boyun xərçənglərində müalicə mənşəli ağız quruluğu aradan qaldırıla bilər.

Həmçinin akupunktur boyun limfa düyünlərinin çıxarılması nəticəsində yaranan ağrını aradan qaldırmağa kömək edir.

4. Müsbət düşüncəni dəstəkləmək

Müsbət düşüncələr xərçənglə mübarizə aparan insanlar üçün çox vacibdir. Həkiminiz xərçənginizin müalicəsinin çox çətin ola biləcəyini desə belə, sağalmaq istəməli və ümidinizi itirməməlisiniz.

5. İmmun sisteminin fəallığını artırmaq istəyi

Bir çox insan müəyyən tamamlayıcı terapiyaların immun sisteminin fəallığını artırıb xərçənglə mübarizəyə kömək edə biləcəyinə inanır. Yaxşı hiss etmək və stressi azaltmağın immun sisteminin gücünü artırdığına dair elmi sübutlar var. Lakin bunun xərçəngə nəzarətdə təsiri bilinmir. Mövzunu araşdıran klinik tədqiqatlar davam edir.

6. Təbii və sağaldıcı müalicələr xəstələrin marağını çəkir

Xəstələrin çoxu tamamlayıcı müalicələri toksik olmayıb təbii olduqlarını düşündükləri üçün istifadə edir. Bəzi tamamlayıcı müalicələr yan təsirləri aradan qaldırmağa kömək edə bilər. Lakin bunların xərçəng dərmanları ilə necə qarşılıqlı təsir etdiyi aydın deyil. Bununla yanaşı çoxsaylı alternativ müalicənin standart (konvensional) xərçəng müalicəsi ilə mənfi qarşılıqlı təsiri məlumdur. Bəzi bitki müalicələri yan təsirləri artırır.

Bəziləri isə standart xərçəng müalicələrinin təsirini azaldır. Tamamlayıcı və alternativ müalicələrdən istifadə etməzdən əvvəl mütləq həkiminizlə məsləhətləşməlisiniz.

7. Xəstəliyi və müalicəsi üzərində söz sahibi olmaq istəyi

Xəstələrin çoxu tamamlayıcı müalicələrdən istifadə etdikdə xəstəliyin müalicəsində daha fəal rol aldıqlarını düşünür. Həmçinin hansı terapiyanı nə tezlikdə istifadə edəcəklərinə özləri qərar verdiklərini bildiriblər. Tamamlayıcı müalicələr xəstələrin özlərini daha çox nəzarət sahibi hiss etməsinə kömək edə bilər.