Yoğun bağırsaq xərçəngində Oncotype DX testi

II mərhələ yoğun bağırsaq xərçəngi olan xəstələr üçün tətbiq edilən ən yeni testlərdən biri olan Oncotype DX düzgün müalicə qərarı üçün bələdçi ola bilər.

Erkən mərhələ süd vəzi xərçəngi olan xəstələr üçün istifadə edilən testə bənzəyən Oncotype DX cərrahi müdaxilədən sonra tətbiq edilən testdir. Lakin son qərar cərrahi müdaxilədən sonra tətbiq edilən adyuvant (qoruyucu kimyaterapiya) müalicənin gedişinə əsasən verilir. Bu test şiş toxumasından götürülmüş nümunədə müəyyən genlərin aktivliyini qiymətləndirərək xərçəngin təkrarlanma riskini müəyyən edir. II mərhələ yoğun bağırsaq xərçəngində təxminən %25 nisbətində təkrarlanma riski olduğu üçün Oncotype DX testi qərar mərhələsində əhəmiyyətlidir. Bu testlə müəyyən edilən risk ehtimalı fərdiləşdirilmiş müalicə qərarının verilməsinə kömək edəcək. Cərrahi müdaxilədən sonra adyuvant kimyaterapiya II mərhələ yoğun bağırsaq xərçəngi olan bütün xəstələrə rutin olaraq tövsiyə edilmir. Belə bir müalicənin yüksək risk daşıyan xəstələrə tətbiqi nəzərdən keçirilir. Buna görə həqiqətən fayda görəcək xəstələrin müəyyən edilməsi son dərəcə vacibdir.

Oncotype DX yoğun bağırsaq xərçəngi testi Genomic Health tərəfindən hazırlanmışdır. Testin hazırlanması prosesində 3 əsas addım həyata keçirilmişdir:

1. Yoğun bağırsaq xərçəngi genləri araşdırılmışdır. Genomic Health tərəfindən aparılan tədqiqatda bəzi genlərdə RNT səviyyələrini ölçə bilən tədqiqat vasitələrindən istifadə edilərək yoğun bağırsaq xərçəngi ilə əlaqəli gen qrupuna baxılmışdır.
2. Klinik tədqiqatlar aparılmışdır. Yoğun bağırsaq xərçənginin təkrarlanma riski ilə ən çox əlaqəsi olan genləri müəyyən etmək üçün müəyyən edilmiş genlər üzərində araşdırmalar aparılmışdır.
3. Təkrarlanma riskini müəyyən etmək üçün test hazırlanmışdır. 1.800-dən çox xəstədən götürülmüş nümunələr araşdırıldıqdan sonra bir alqoritm yaradılmışdır. Formula yoğun bağırsaq xərçənginin təkrarlanma ehtimalının yüksəkliyinə əsaslanan rəqəmsal təkrarlanma balını hesablayır.

Gen ifadəsi analiz texnologiyası və alqoritm Oncotype DX yoğun bağırsaq xərçəngi testinin iki əsas komponentidir. 2.100-dən çox yoğun bağırsaq xərçəngi xəstəsinin iştirak etdiyi klinik tədqiqatlar bu testin etibarlılığını təsdiqləmişdir. Diqqətlə hazırlanmış prosedurlar silsiləsi həkim üçün düzgün diaqnoz və müalicə üsulu barədə aydın və informativ olmaqla yanaşı, xəstənin sağalma prosesinə fayda verəcək şəkildə standartlaşdırılmış test tətbiqidir.

Oncotype DX Yoğun Bağırsaq Xərçəngi testi yoğun bağırsaq xərçəngi olan xəstəyə tətbiq edilən biopsiya və ya cərrahi müdaxilə zamanı götürülmüş şişdəki 12 genin səviyyəsini qiymətləndirərək II mərhələ yoğun bağırsaq xərçənginin təkrarlanma riskini müəyyən etmək üçün istifadə edilən yeni üsuldur. Bu 12 genin necə və ya nə qədər aktiv olduğu araşdırılır. Test nəticələri xərçəngin təkrarlanma ehtimalını göstərən rəqəmsal təkrarlanma balı kimi 0 ilə 100 arasında verilir. Bundan əlavə, yoğun bağırsaq şişi nümunəsində immunhistokimya ilə aparılan uyğunsuzluqların bərpası testi həkiminizin müalicə üsulu ilə bağlı verəcəyi qərarda təsirli rol oynayacaq.

Cərrahi müdaxilədən sonra tətbiq edilən kimyaterapiya yoğun bağırsaq xərçənginin təkrarlanmasının qarşısını almaq məqsədilə aparılır. Yoğun bağırsaq xərçənginin təkrarlanma ehtimalı II mərhələ yoğun bağırsaq xərçəngi olan xəstələrdə cərrahi müdaxilədən sonra kimyaterapiya qərarında mühüm rol oynayan digər amildir.

Oncotype DX testinin xəstə üçün uyğun olub-olmadığının müəyyənləşdirilməsi

Erkən mərhələ yoğun bağırsaq xərçəngi olan xəstələrdə xərçəngin təkrarlanma ehtimalını müəyyən etməkdə effektiv test üsulu olan Oncotype DX® Yoğun Bağırsaq Xərçəngi testinin nəticələrindən cərrahi müdaxilədən sonra müalicə planının hazırlanması üçün istifadə edilir. Aşağıdakı yoxlama siyahısı Oncotype DX Yoğun Bağırsaq Xərçəngi testi üçün potensial namizəd olub-olmadığınızı müəyyən etməyə kömək edə bilər.

Əgər;

• II mərhələ yoğun bağırsaq xərçəngi diaqnozu qoyulubsa və ilk cərrahi müdaxilələri keçirmisinizsə,
• Yaxın keçmişdə II mərhələ yoğun bağırsaq xərçəngi diaqnozu qoyulubsa və kimyaterapiya ilə bağlı müalicə seçimlərini həkiminizlə müzakirə edirsinizsə,

Oncotype DX Yoğun Bağırsaq Xərçəngi testi üçün namizəd ola bilərsiniz deməkdir.

Yalnız kimyaterapiya müalicəsindən əvvəl aparılması uyğun olan Oncotype DX testinin zəruriliyi barədə qərar aparılan müayinələrin nəticələrinə əsasən həkiminiz tərəfindən verilməlidir. Bu test standart testlərdən əlavə, xəstənin ehtiyaclarını qiymətləndirmək üçün istifadə edilən T mərhələsi, limfa düyünlərinin tutulması, test balı və uyğunsuzluqların bərpası kimi xüsusiyyətlərin müəyyən edilməsinə də kömək edir. Bu yolla ən yaxşı fərdiləşdirilmiş müalicə qərarını verən həkim və xəstə effektiv müalicənin uğur nisbətinin artmasını təmin edəcəklər.