Yüksək dozada B6 və B12 vitamini ağciyər xərçəngi riskini artırır

Uzun müddət yüksək dozada B6 və B12 vitamini əlavələrinin istifadəsi ilə ağciyər xərçəngi riski arasında əlaqə olduğu düşünülür. Bu əlavələri 10 ildən artıq qəbul edən kişilərdə heç istifadə etməyənlərlə müqayisədə ağciyər xərçənginin 2-4 dəfə daha çox müşahidə olunduğu və riskin xüsusilə siqaret çəkənlərdə yüksəldiyi göstərilmişdir. Bununla yanaşı, qadınlarda belə risk artımı müşahidə edilməmişdir.

Diqqətçəkən bu tədqiqat 22 avqustda Klinik Onkologiya Jurnalında dərc edilmişdir. Dərc olunan tədqiqata görə yüksək dozada B6 və B12 vitaminlərinin uzun müddət qəbulu siqaret çəkən kişilərdə ağciyər xərçənginin yaranma sürətini artıra bilər.

ABŞ Milli Sağlamlıq İnstitutlarının müvafiq səhiyyə ofisi 51 yaşdan yuxarı kişilərin gündə 1.7 mg (qadınların gündə 1.5mg) B6 vitamininə ehtiyac duyduğunu və böyüklərdə B12 üçün tövsiyə olunan dozanın gündə 2.4 µg olduğunu bildirmişdir.

Bu tədqiqatda B vitamini əlavələri qəbul edən kişilərdə 10 il ərzində gündəlik 20 mg B6 və 55 µg B12 qəbulu araşdırılmışdır.

Tədqiqatın təfərrüatları

Bu mühüm tədqiqat 50-76 yaşlarında 77.118 iştirakçı ilə 2000-ci ilin oktyabrından 2002-ci ilin dekabrına qədər aparılmışdır. Bu insanların 10 illik izlənməsi nəticəsində 808-nə ağciyər xərçəngi diaqnozu qoyulmuşdur.

Ağciyər xərçəngi diaqnozu qoyulmuş xəstələrin yarısından çoxu (%55) kişi idi. Tədqiqat qrupu ağciyər xərçəngi olan xəstələrdə bu vitamin əlavələrinin istifadəsini araşdırmışdır. İştirakçılar vitamin əlavələrinin istifadəsi barədə sorğularda qidalanma və siqaret çəkmə vərdişlərinə dair sualları cavablandırdılar. Tədqiqatçılar B vitaminləri ilə ağciyər xərçəngi arasında kişilərdə əlaqə müəyyən etdilər, qadınlarda isə etmədilər. Nəticədə yüksək dozada B vitamini istifadə edən kişilərdə istifadə etməyənlərə nisbətən ağciyər xərçənginə tutulma riskinin təxminən 2 dəfə çox olduğu aşkarlandı.

Bu tədqiqatda siqaret çəkən kişilərdə yüksək dozada B6 vitamini istifadəsi ağciyər xərçəngi riskini 3 dəfəyədək, B12 vitamini isə 4 dəfəyədək artırmışdır.

Təhlildə şəxsin siqaret çəkmə tarixçəsi, yaş, irq, təhsil, bədən ölçüsü, alkoqol istehlakı, şəxsi xərçəng və ya xroniki ağciyər xəstəliyi tarixçəsi, ailədə ağciyər xərçəngi tarixçəsi və iltihabəleyhinə dərmanların istifadəsi daxil olmaqla müxtəlif amillər nəzərə alınmışdır.

Bu risk artımının yalnız siqaret çəkən kişilərdə olması əlbəttə diqqətçəkəndir. Tədqiqatçılara görə, səbəblər kişi və qadınların tütünlə əlaqəli ağciyər xərçənginə həssaslığının fərqli olması və kişi cinsi hormonları olan androgenlərin müəyyən fermentlərə təsiri ola bilər. Yüksək dozada B6 və B12 vitaminləri hüceyrələrin daha sürətli böyüməsinə səbəb ola bilər və bu da siqaret çəkən kişilərdə mutasiyaya uğramış hüceyrələrin çoxalmasını tətikləyə bilər.

Vitamin əlavəsi istifadəçilərinə xəbərdarlıq

ABŞ-ın yetkin əhalisinin yarısının bir və ya daha çox qida əlavəsi istifadə etdiyi məlumdur. Sağlamlığa müsbət təsirləri sübut edilməsə də, bizim də daxil olduğumuz inkişaf etməkdə olan cəmiyyətlərdə sağlam həyat vədi ilə bazara çıxarılan bu əlavə tibbi məhsulların istifadəsi getdikcə yayılır… Qan analizi ilə çatışmazlığı göstərilməmiş heç bir vitamin və ya mineralın əlavə kimi qəbul edilməməli olduğunu bu münasibətlə bir daha xatırladaq.

Nəticə olaraq, bu tədqiqat yüksək dozada B6 və B12 vitaminlərinin 10 ildən artıq istifadəsinin ağciyər xərçəngi riskini artırdığını, bu artımın xüsusilə siqaret çəkən kişilərdə ən yüksək olduğunu göstərmişdir. Əvvəllər antioksidantlar üçün də oxşar nəticələr müşahidə edilmiş, onların xərçəngi müalicə etmədiyi, hətta tətikləyə bildiyi görülmüşdü.

Marağınızı çəkə bilər: Yüksək dozada C vitamini və xərçəng