4. სტადიის ჰორმონმგრძნობიარე პროსტატის კიბოსთვის დაროლუტამაბმა და დოცეტაქსელმა FDA-ს დამტკიცება მიიღო

მეტასტაზური (4. სტადიის) ჰორმონმგრძნობიარე პროსტატის კიბოს მქონე პაციენტებისთვის დაროლუტამაბის (Nubeqa, Bayer) ტაბლეტების დოცეტაქსელის ქიმიოთერაპიასთან ერთად გამოყენებამ 2022 წლის 5 აგვისტოს FDA-ს (აშშ-ის სურსათისა და წამლის ადმინისტრაციის) დამტკიცება მიიღო.

მიუხედავად იმისა, რომ ანდროგენების დამთრგუნველ მკურნალობაზე მხოლოდ დოცეტაქსელის ან მხოლოდ ანდროგენის რეცეპტორის ინჰიბიტორის დამატება გადარჩენას აუმჯობესებს, დოცეტაქსელისა და ანდროგენის რეცეპტორის ინჰიბიტორის ერთდროულად დამატების გავლენა გადარჩენაზე ნათელი არ იყო ARASENS კვლევამდე, რომელიც ამ დამტკიცების საგანია.

ARASENS კვლევით მიღებული FDA-ს დამტკიცება

2022 წლის მარტში NEJM ჟურნალში შედეგებგამოქვეყნებულ საერთაშორისო, რანდომიზებულ, ორმაგად ბრმა და პლაცებოკონტროლირებულ ფაზა III ARASENS კვლევაში 1306 პაციენტი ჩაერთო.

ექსპერიმენტული მკურნალობის ჯგუფის 651 პაციენტს ჰორმონების დამთრგუნველ მკურნალობასა და დოცეტაქსელზე დამატებით დაროლუტამიდი მიეცა, ხოლო საკონტროლო ჯგუფის 655 პაციენტს სტანდარტულ მკურნალობაზე დამატებით — პლაცებო. შედეგად, სტანდარტულ მკურნალობაზე დაროლუტამიდის დამატებამ გადარჩენის მნიშვნელოვანი ზრდა გამოიწვია. გადარჩენის ეს ზრდა მსგავსი იყო ადრე ჩატარებული ფაზა III PEACE-1 კვლევის შედეგებისა, რომელშიც ჰორმონების დათრგუნვასა და დოცეტაქსელზე აბირატერონი დაემატა.

მკვლევრებმა გამოქვეყნებულ ანგარიშში განაცხადეს, რომ დაროლუტამიდმა სიკვდილის რისკიც 32,5%-ით შეამცირა .

სურათის განმარტება: ვინაიდან დაროლუტამიდის ჯგუფში პაციენტების ნახევარზე მეტი ცოცხალი რჩებოდა, გადარჩენის მედიანური ხანგრძლივობა ვერ იქნა მიღწეული; სტანდარტული მკურნალობის ჯგუფისთვის ეს დრო 48,9 თვე იყო. KT: ქიმიოთერაპია; ADT: ანდროგენების დათრგუნვის მკურნალობა

სამმაგ და ორმაგ კომბინაციებს შორის მეტი ტოქსიკური ეფექტის განსხვავება არ დაფიქსირებულა. როგორც აბირატერონის, ისე დაროლუტამიდის კვლევებში პლაცებოს ჯგუფებთან შედარებით ანდროგენის რეცეპტორის ინჰიბიტორთან დაკავშირებული ხშირი გვერდითი მოვლენების სიხშირე მაქსიმუმ 2% იყო.

პაციენტებში ყველაზე ხშირი (≥10%) გვერდითი მოვლენებია, შეკრულობა, მადის დაქვეითება, გამონაყარი, სისხლდენა, წონის მატება და ჰიპერტენზია. ყველაზე ხშირი (≥30%) ლაბორატორიული დარღვევები იყო ანემია, ჰიპერგლიკემია, ლიმფოციტების შემცირებული რაოდენობა, ნეიტროფილების შემცირებული რაოდენობა, AST-ის მატება, ALT-ის მატება და ჰიპოკალციემია.

კვლევაში ჩართული პაციენტების უმეტესობას პირველადი დიაგნოზისას ძვლოვანი მეტასტაზები, ვისცერული (შინაგანი ორგანოების) მეტასტაზები ან ორივე ერთად ჰქონდა. ამიტომ სარგებლისა და რისკის შეფასებისთვის შეზღუდული ინფორმაცია არსებობს უკეთესი პროგნოზის მქონე ჰორმონმგრძნობიარე პროსტატის კიბოს პაციენტებში, რომლებსაც აქვთ განმეორებითი დაავადება, მხოლოდ კვანძოვანი მეტასტაზები ან ორივე ერთად.

მეტასტაზური და ჰორმონების დათრგუნვისადმი მგრძნობიარე პროსტატის კიბოსთვის დაროლუტამიდის რეკომენდებული დოზა არის დღეში ორჯერ პერორალურად 600 mg (ორი 300 mg ტაბლეტი), მიუღებელ გვერდით მოვლენამდე ან დაავადების პროგრესირებამდე. დოცეტაქსელი გამოიყენება ინტრავენურად 75 mg/m2 დოზით, ყოველ 3 კვირაში, მაქსიმუმ 6 ციკლამდე. დოცეტაქსელის პირველი დოზა უნდა გაკეთდეს დაროლუტამიდით მკურნალობის დაწყებიდან 6 კვირის განმავლობაში.

*

რა არის დაროლუტამიდი?

დაროლუტამიდი (სავაჭრო სახელი Nubeqa) FDA-ს პირველი დამტკიცება 2019 წელს მიიღო პროსტატის კიბოს მქონე იმ პაციენტების სამკურნალოდ, რომლებშიც მეტასტაზირება ჯერ არ მომხდარიყო, მაგრამ ჰორმონების დათრგუნვისადმი რეზისტენტობა განვითარებულიყო. ეს არის სტრუქტურულად განსხვავებული, ჰემატოენცეფალური ბარიერის დაბალი შეღწევადობისა და წამლებს შორის ურთიერთქმედების შედარებით დაბალი რისკის მქონე ანდროგენის რეცეპტორის ინჰიბიტორია.

ქვემოთ, მარტივადაა გამოსახული პროსტატის კიბოს ახალი თაობის პრეპარატების — აბირატერონის, ენზალუტამიდის, აპალუტამიდისა და დაროლუტამიდის — მოქმედების მექანიზმები. აბირატერონი ანდროგენების წარმოქმნაზე მოქმედ ფერმენტებს თრგუნავს, ხოლო ანდროგენის რეცეპტორის ბლოკატორები, მაგალითად დაროლუტამიდი, ხელს უშლის ანდროგენების რეცეპტორებთან შეკავშირებას, ბირთვში გადასვლასა და ბირთვში DNA-სთან შეკავშირებას.

*

გარე შინაარსის სანახავად მართეთ პარამეტრები