4-cü mərhələ hormona həssas prostat xərçəngi üçün darolutamid və dosetaksel FDA təsdiqi aldı

Metastatik (4-cü mərhələ), hormona həssas prostat xərçəngi olan xəstələr üçün darolutamid (Nubeqa, Bayer) tabletlərinin dosetaksel kimyaterapiyası ilə birlikdə istifadəsi 5 avqust 2022-ci ildə FDA (ABŞ Qida və Dərman İdarəsi) təsdiqi aldı.

Androgenləri basdıran müalicəyə yalnız dosetaksel və ya yalnız androgen reseptoru inhibitoru əlavə etmək sağqalımı yaxşılaşdırsa da eyni vaxtda həm dosetaksel, həm də androgen reseptoru inhibitoru əlavə edilməsinin sağqalımı necə dəyişdirəcəyi bu təsdiqin mövzusu olan ARASENS tədqiqatına qədər aydınlaşmamışdı.

ARASENS tədqiqatı ilə alınan FDA təsdiqi

Mart 2022-ci ildə NEJM jurnalında nəticələri dərc edilmiş beynəlxalq, randomizə, ikiqat kor, plasebo nəzarətli faza III ARASENS tədqiqatına 1306 xəstə daxil edildi.

Eksperimental müalicə qolundakı 651 xəstəyə hormonları basdıran müalicə və dosetakselə əlavə darolutamid, nəzarət qrupundakı 655 xəstəyə isə standart müalicəyə əlavə plasebo verildi. Nəticədə standart müalicəyə darolutamid əlavə edilməsi sağqalımda əhəmiyyətli artıma gətirdi. Bu sağqalım artımı əvvəllər hormonların basdırılması və dosetakselə abirateronun əlavə edildiyi faza III PEACE-1 tədqiqatının nəticələrinə oxşar idi.

Tədqiqatçılar dərc etdikləri hesabatda darolutamidin həyat itkisi riskini də 32,5% azaltdığını bildirdilər.

Şəklin izahı: Darolutamid qolundakı xəstələrin yarıdan çoxu sağ qaldığından median sağqalım müddətinə çatılmadı; standart müalicə qolu üçün bu müddət 48,9 ay idi. KT: kimyaterapiya; ADT: androgenlərin basdırılması müalicəsi

Üçlü və ikili kombinasiyalar arasında daha çox toksik təsir fərqi müşahidə edilmədi. Həm abirateron, həm də darolutamid tədqiqatlarında plasebo qruplarına nisbətən müşahidə edilən androgen reseptoru inhibitoru ilə əlaqəli ümumi yan təsir tezliyinin fərqi ən çox 2% idi.

Xəstələrdə ən çox rast gəlinən (≥10%) yan təsirlər qəbizlik, iştahanın azalması, səpgi, qanaxma, çəki artımı və hipertoniyadır. Ən çox rast gəlinən (≥30%) laborator test pozuntuları anemiya, hiperqlikemiya, limfosit sayının azalması, neytrofil sayının azalması, AST artımı, ALT artımı və hipokalsemiya idi.

Tədqiqata daxil edilmiş xəstələrin əksəriyyətində ilk diaqnoz zamanı sümük metastazı, visseral (daxili orqan) metastazı və ya hər ikisi var idi. Buna görə təkrarlanan, yalnız limfa düyünü metastazı olan və ya bu hər iki xüsusiyyəti daşıyan, hormona həssas prostat xərçəngi olan və daha yaxşı proqnoza malik xəstələrdə fayda-risk qiymətləndirilməsi barədə məlumat məhduddur.

Metastatik, hormonların basdırılmasına həssas prostat xərçəngində darolutamidin tövsiyə edilən dozası, qəbuledilməz yan təsirə və ya xəstəlik proqressiyasına qədər gündə iki dəfə ağızdan qəbul olunan 600 mg-dır (iki 300 mg tablet). Dosetaksel 75 mg/m2 venadaxili, 3 həftədən bir, 6 siklə qədər tətbiq edilir. Dosetakselin ilk dozası darolutamid müalicəsinə başladıqdan sonra 6 həftə ərzində tətbiq edilməlidir.

*

Darolutamid nədir?

Darolutamid (marka adı Nubeqa) ilk FDA təsdiqini 2019-cu ildə hələ metastaz verməmiş, lakin hormonların basdırılmasına davamlılıq yaranmış prostat xərçəngi xəstələrinin müalicəsi üçün almış xərçəng dərmanıdır. Qan-beyin baryerindən aşağı keçidə və dərman qarşılıqlı təsirləri üçün nisbətən aşağı riskə malik, quruluşca fərqli androgen reseptoru inhibitorudur.

Aşağıda yeni nəsil prostat xərçəngi dərmanları olan abirateron, enzalutamid, apalutamid və darolutamidin təsir mexanizmləri sadə şəkildə göstərilmişdir. Abirateron androgenlərin yaranmasına təsir edən fermentləri basdırır, darolutamid kimi androgen reseptoru blokatorları isə androgenlərin reseptorlara bağlanmasını, nüvəyə keçməsini və nüvədə DNA-ya bağlanmasını əngəlləyir.

*

Xarici məzmunu görmək üçün seçimləri tənzimləyin