ახალი ეპოქა ძუძუს კიბოს მკურნალობაში იმუნოთერაპიით

ახალი ეპოქა ძუძუს კიბოს მკურნალობაში
ადრეული სტადიის, ჰორმონული რეცეპტორებით დადებით და HER2 უარყოფით ძუძუს კიბოში, ნეოადიუვანტურ (ოპერაციამდე სიმსივნის შემამცირებელ) მკურნალობაზე იმუნოთერაპია პემბროლიზუმაბის (Keytruda) დამატებამ პათოლოგიური სრული პასუხის მაჩვენებლები მნიშვნელოვნად გაზარდა.
დოქტორი Rita Nanda-სა და კოლეგების მიერ JAMA Oncology ჟურნალში აღწერილი მიმდინარე II ფაზის I-SPY 2 კვლევის შედეგებმა აჩვენა, რომ სტანდარტულ ნეოადიუვანტურ ქიმიოთერაპიაზე პემბროლიზუმაბის დამატება მაღალი რისკის 2 და 3 სტადიის ძუძუს კიბოს მქონე პაციენტებში პათოლოგიური სრული პასუხის მაჩვენებლებს მნიშვნელოვნად აუმჯობესებს.
რა არის კვლევის საყურადღებო შედეგები?
- ყველა პაციენტში პათოლოგიური სრული პასუხი ქიმიოთერაპიისა და პემბროლიზუმაბის ჯგუფში % 44 იყო, საკონტროლო (მხოლოდ ქიმიოთერაპიის) ჯგუფში კი — % 17.
- სამმაგად უარყოფითი ძუძუს კიბოს მქონე პაციენტებში პემბროლიზუმაბისა და საკონტროლო ჯგუფისთვის პათოლოგიური სრული პასუხი % 60 და % 22 იყო.
- ჰორმონდადებით / HER2 უარყოფით ჯგუფში პათოლოგიური სრული პასუხი %30 და %13 იყო.
რა არის პათოლოგიური სრული პასუხი?
პათოლოგიური სრული პასუხიარის პათოლოგიური გამოკვლევის შედეგი, რომელიც ოპერაციამდე ჩატარებული მკურნალობის ეფექტურობას აჩვენებს. თუ ნეოადიუვანტური მკურნალობის შემდეგ ოპერაციის პათოლოგიურ მასალაში კიბოს უჯრედები საერთოდ არ აღმოჩნდა, ამას პათოლოგიურ სრულ პასუხს ვუწოდებთ. მრავალმა კვლევამ დაადასტურა, რომ ასეთი პასუხის მქონე პაციენტებში კიბოს განმეორების ალბათობა უფრო დაბალია.

კვლევის დეტალები
I-SPY 2 სახელწოდების კლინიკური კვლევაღია, მრავალცენტრული, ადაპტურად რანდომიზებული II ფაზის პლატფორმული კვლევაა, რომელიც სტანდარტულ ტაქსანისა და ანტრაციკლინის ნეოადიუვანტურ ქიმიოთერაპიაზე იმუნოთერაპია პემბროლიზუმაბის დამატებას აფასებს. კვლევაში ჩართული 2 და 3 სტადიის ძუძუს კიბოს პაციენტების რისკის ქულები MammaPrint და TargetPrint ERBB2 ტესტებით განისაზღვრა. MammaPrint-ის დაბალი რისკის ჯგუფის პაციენტები I-SPY 2-დან გამოირიცხნენ, რადგან უფრო ინტენსიური მკურნალობა არ სჭირდებოდათ.
- დაკავშირებული თემა: როგორ განვსაზღვროთ პაციენტები, რომლებსაც ძუძუს კიბოს ოპერაციის შემდეგ ქიმიოთერაპია არ დასჭირდებათ?
კვლევაში 2015 – 2016 წლებში HER2 უარყოფითი ტესტის მქონე ძუძუს კიბოს 181 პაციენტი სტანდარტული ნეოადიუვანტური ქიმიოთერაპიის ჯგუფში (ყოველკვირეული პაკლიტაქსელი და შემდეგ დოქსორუბიცინი + ციკლოფოსფამიდი); 69 პაციენტი კი ქიმიოთერაპიისა და პემბროლიზუმაბის ჯგუფში შემთხვევით გადანაწილდა. პემბროლიზუმაბის იმუნოთერაპია 4 კურსით ჩატარდა. შემდეგ ორივე ჯგუფის პაციენტები ძუძუს კიბოს ოპერაციაზე გადაიყვანეს. პემბროლიზუმაბის ჯგუფში 40 პაციენტს ჰორმონული რეცეპტორებით დადებითი, ხოლო 29 პაციენტს სამმაგად უარყოფითი ძუძუს კიბო ჰქონდა.
პათოლოგიური სრული პასუხის მაჩვენებლები
საბოლოო სავარაუდო პათოლოგიური სრული პასუხი ყველა HER2-უარყოფით პაციენტში პემბროლიზუმაბისა და საკონტროლო ჯგუფისთვის, შესაბამისად, % 44 და % 17 იყო. სამმაგად უარყოფითი ძუძუს კიბოს მქონე პაციენტებში ეს მაჩვენებლები პემბროლიზუმაბისა და საკონტროლო ჯგუფისთვის % 60 და % 22 იყო. ჰორმონდადებით / HER2 უარყოფით ჯგუფში პათოლოგიური სრული პასუხი %30 და %13 იყო.
ანუ ყველა ქვეჯგუფისთვის ქიმიოთერაპიაზე პემბროლიზუმაბის იმუნოთერაპიის დამატებამ ოპერაციისას ნარჩენი დაავადების არსებობის ალბათობა მნიშვნელოვნად შეამცირა. დაკვირვების მედიანური ხანგრძლივობა პემბროლიზუმაბის ჯგუფში 2.8, საკონტროლო ჯგუფში კი 3.5 წელი იყო. სხვა ანალიზმა ჯგუფებს შორის 3-წლიან მოვლენის გარეშე გადარჩენაში მნიშვნელოვანი განსხვავება ვერ აჩვენა. მკვლევრებმა აღნიშნეს, რომ ორივე ჯგუფში პათოლოგიური სრული პასუხის მქონეებს შესანიშნავი 3-წლიანი მოვლენის გარეშე გადარჩენა ჰქონდათ (მაგალითად, პემბროლიზუმაბის ჯგუფში % 93).
რა გვერდითი ეფექტები გამოვლინდა?
გვერდითი ეფექტები ორივე ჯგუფის კიბოს მკურნალობების მანამდე ცნობილ უსაფრთხოების პროფილს შეესაბამებოდა. როგორც მოსალოდნელი იყო, იმუნოთერაპიასთან დაკავშირებული გვერდითი ეფექტები პემბროლიზუმაბის ჯგუფში უფრო ხშირი იყო. ყველაზე გავრცელებული იყო ენდოკრინოპათიები, ფარისებრი ჯირკვლის ფუნქციის დარღვევა (ჰიპოთირეოზი და ჰიპერთირეოზი), რაც პაციენტების % 13-ში განვითარდა. თირკმელზედა ჯირკვლის უკმარისობა პაციენტების % 8.7-ში დაფიქსირდა; აღწერილი ექვსი შემთხვევიდან ხუთში ეს ეფექტი პემბროლიზუმაბის ბოლო დოზიდან 30 დღის შემდეგ გამოვლინდა. ქავილის გარდა სხვა იმუნური გვერდითი ეფექტებიც პემბროლიზუმაბის ბოლო დოზიდან 30 დღის შემდეგ აღინიშნა.
დასკვნა
სტანდარტულ ნეოადიუვანტურ ქიმიოთერაპიაზე დამატებულმა პემბროლიზუმაბის იმუნოთერაპიამ 2. და 3. სტადიის როგორც ჰორმონდადებითი / HER2 უარყოფითი, ისე სამმაგად უარყოფითი ძუძუს კიბოს პათოლოგიური სრული პასუხის მაჩვენებლები გააორმაგა.
დაკავშირებული თემა:
წყაროები
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.