ჩაიცვი და გაიხადე – პანდემიის დროს კიბოს დიაგნოზის მქონე ექიმის გამოცდილება

თუ კიბოს დიაგნოზი უნდა მოისმინოთ, სჯობს ეს პანდემიის დროს მოხდეს. გამოსახულების კონტროლით ჩატარებული თქვენი ბიოფსია მოსალოდნელზე მეტხანს რომ გაგრძელდება, ექთნები რადიოლოგიის განყოფილებიდან დერეფანში მდებარე პატარა უფანჯრო ოთახს გაჩვენებენ და გეტყვიან, რომ იქიდან შეგიძლიათ 11:00-ზე დაგეგმილ Zoom-ის ვირტუალურ კომიტეტის სხდომას შეუერთდეთ, ყინულის პაკეტითა და დაზიანებულ ძუძუზე შემოხვეული ას-ბანდაჟით (სისხლის ნაკადის შემაჩერებელი ელასტიკური ბანდაჟით). მომდევნო კვირას, როდესაც ბიოფსიის პასუხზე დაგირეკავენ, ვერავინ დაინახავს, როგორ შეგეცვლებათ სახე, სანამ ფონზე ვირტუალური შეხვედრები გრძელდება და თქვენ დაბუჟებული პასუხებს UpToDate-ში ეძებთ (ეს ექიმების მიერ ხშირად გამოყენებული მტკიცებულებებზე დაფუძნებული ონლაინკლინიკური წყაროა).

ცვლილებების დამალვის უნარის მქონე (?) ვირტუალური შეხვედრები 

ქიმიოთერაპიის თვეებში, როდესაც საკვები ნახერხის გემოს იძენს, მყარ საკვებს სმუზის (თხევად ხილის პიურეს) ამჯობინებთ. ნამდვილი სადილის შეხვედრები აღარ არსებობს. პირველ თვეში ხალხი ვერც შეამჩნევს, რომ სახე გაგითხელდათ და გაფერმკრთალდით. Zoom-ს აქვს ფილტრი „ჩემი გარეგნობის რეტუში“. კმაყოფილი ხართ, რომ ის კანის მყიფეობას მალავს: ლოყებზე გაჩენილი პატარა ტელანგიექტაზიები (წითელი ლაქების სახით ხილული წვრილი სისხლძარღვების გაფართოება) ეკრანზე ქრება, ხოლო დახატული წარბები ნამდვილს ჰგავს. კვირების გასვლასა და თმის ცვენის აუტანლად ქცევასთან ერთად ნუ იღელვებთ. ყველა პანდემიის მიერ მოტანილი ახალი ვარცხნილობით დადის. კოლეგები, რომლებსაც მანამდე სწორი და მბზინავი თმა ჰქონდათ, მოულოდნელად ბუნებრივად ტალღოვანი თმით ჩნდებიან. თქვენი ახალი სტილი შეიძლება კეფაზე გამელოტებული ადგილი იყოს. ეს მხოლოდ თქვენსა და სარკეს შორის დარჩენილი საიდუმლოა.

მკურნალობის მიღებისა და მკურნალობის ჩატარების გადაკვეთა

როდესაც შეხვედრის დროს ონკოლოგი დარეკავს, არ დაგავიწყდეთ მასშტაბირების ფუნქციის გამორთვა და ვიდეოს დამალვა, რასაც ადვილად შეძლებთ. მიეჩვევით პაციენტების ასობით შეტყობინებას – სამართავ, გადავსებულ შემომავალ ყუთს. ჯანდაცვის სისტემის კორონავირუსული დაავადების (COVID-19) სიახლეები პაციენტის რეკომენდაციებს შეერევა, თუმცა მალე მიხვდებით, თქვენი რომელი ნაწილისთვისაა ისინი განკუთვნილი. თანამშრომელთა და პაციენტთა მდგომარეობის ყოველდღიური შემოწმებები სასაცილო გახდება, როცა ქიმიოთერაპიისას მოსალოდნელ ყველა სიმპტომს გკითხავენ: დაღლილობას, გულისრევას, ღებინებას, ფაღარათს, კუნთების ტკივილს; პასუხი კი ყოველთვის იქნება: დიახ, დიახ, დიახ და დიახ. ნეიტროპენიური ცხელება ითვლება? სანამ გრანულოციტების კოლონიის მასტიმულირებელი ფაქტორი (სისხლის მაჩვენებლების ამწევი ინექცია) იმოქმედებს, შეიძლება COVID-19-ის ტესტი დაგჭირდეთ. ნახავთ, დისტანცია სიკეთედ იქცევა. კეთილისმსურველი ოჯახისა და მეგობრების ზედმეტი დაკვირვება აღარ იქნება. არც ხველისა და გაციების ზემოქმედება. თქვენი სინუსები ასეთი თავისუფალი არასდროს ყოფილა.

უცნაური მომენტები

უცნაური მომენტებიც გექნებათ. ონკოლოგიურ კლინიკაში ყოფნისას შეიძლება ყოფილ სტაჟიორს, ახლა მეგობარს, შეხვდეთ, რომელიც ჯერ მხიარულად მოგესალმებათ, შემდეგ კი, როცა შეამჩნევს, რომ თქვენთვის უჩვეულო ადგილას ხართ, სახე ჩამოუვარდება. პორტის ჩადგმაში მონაწილე ინტერვენციულმა რადიოლოგმა შეიძლება COVID-19-თან ბრძოლის პერიოდიდან გიცნოთ. ქიმიოთერაპიის ცენტრში ყოფნისა და თან Zoom-ის შეხვედრაში მონაწილეობისას თქვენს ინფუზიის ტუმბოს (ვენით ქიმიოთერაპიის მიმწოდებელ აპარატს) საუბრის შუაში შეიძლება ადვილად საცნობი სიგნალი აეხმიანოს. თვალსაჩინო ადგილას იმალებით.

ექიმი, რომელსაც ზეადამიანად ზრდიან

უცნობია, რამდენი ექიმი ებრძვის კარიერის განმავლობაში ერთდროულად მძიმე დაავადებას და მის მკურნალობას. ბევრის მსგავსად, შეიძლება არც თქვენ გინდოდეთ საკუთარი ამბის გაზიარება. გასაკვირი არაფერია. ექიმებს ზეადამიანებად ზრდიან. რვასაათიანი სასერტიფიკაციო გამოცდები და 36-საათიანი მორიგეობები ყველაზე არასათანადო პირობებშიც მუშაობისათვის გამზადებთ. მიუხედავად იმისა, რომ გადაუდებელი დახმარების, კლინიკური ვიზიტებისა და სასწრაფო განყოფილებების სამყაროში გზის გაკვლევა კარგად იცით, ალბათ რჩევას მაინც მეგობრებსა და კოლეგებს ჰკითხავთ, რათა კოლეგების უფრო ფართო წრეს არ გამოუჩნდეთ. მათი თანაგრძნობა და მასთან ერთად ჩვენი პროფესიული უნარების შესახებ გარდაუვალი მიკერძოება არ გვინდა.

ერთმანეთში გადახლართული გულისტკივილი და უკეთესი დროისათვის ბრძოლა

მაგრამ შესაძლოა, როდესაც თქვენს ქალაქში COVID-19-ის შემთხვევები შემცირებას დაიწყებს, იგრძნოთ, რომ სახლში ყოფნისა და ნიღბის გულდასმით ტარების თვეებმა შედეგი გამოიღო. მიხვდებით, რომ პანდემიის საერთო მწუხარებაში თქვენი პირადი მწუხარებისთვისაც არის ადგილი. დაავადების დამალვა ადამიანისაგან, რომელიც მას უნდა მკურნალობდეს, დამღლელია. ჯერ ერთ კოლეგას ეტყვით, შემდეგ მეორეს. ქიმიოთერაპიასთან მებრძოლ პაციენტებს გაუზიარებთ, რომ ახლა იცით, როგორია, როცა თავს უძლეველად ვეღარ გრძნობ. ჩაცმისა და გახდის დღეებში მიხვდებით, რომ შეგიძლიათ ერთდროულად ექიმიც იყოთ და კიბოს მქონე პაციენტიც. ახლობლებს თქვენს პირად ბრძოლაში მონაწილეობის უფლებას მისცემთ. გარშემომყოფთა გულისტკივილები ერთმანეთს გადაეხლართება: ქუჩის პროტესტები, სახლში სწავლა, დაკარგული სამუშაოები და ურთიერთობები... და ყოველჯერ, როცა ამას ვამბობთ, თუ გაგვიმართლებს, ინდივიდუალური დაცვის აღჭურვილობა აღარ იქნება ის, რის უკანაც ვიმალებით, არამედ სოლიდარობის ნიშნად ნატარები რამ, რომლითაც ჩვენს გარშემო ყველასთან ერთად უკეთესი დროისათვის ვიბრძვით.

*

• შეიძლება დაგაინტერესოთ: ძუძუს კიბომ ჩემი ცხოვრება შეცვალა, თუმცა ეს ცვლილება დადებითი იყო