ძუძუს კიბომ ჩემი ცხოვრება შეცვალა, მაგრამ დადებითად

როგორც მებრძოლ პაციენტს, ცხოვრებაში ახალი მიზანი მაქვს — სხვა ქალებს კიბოს მკურნალობისას გაძლიერებაში დავეხმარო!

ყოველთვის ვერიდებოდი ძუძუს თვითგასინჯვას, რადგან მკვრივი ძუძუს სტრუქტურის გამო ვერ ვხვდებოდი, მქონდა თუ არა კვანძი ან მასა. ამის ნაცვლად ყოველწლიურად რეგულარულ მამოგრაფიას ვიტარებდი. ოთხი წლის წინ მამოგრაფიის უარყოფითმა შედეგმა შვება მომგვარა. თუმცა ექიმის დასკვნაში ეწერა, რომ მკვრივი ძუძუს ქსოვილის გამო დამატებით ულტრაბგერითი კვლევა მჭირდებოდა. ულტრაბგერამ მარცხენა ძუძუში პატარა მასა გამოავლინა, რომელიც მამოგრაფიაზე არ ჩანდა.

გამიმართლა! მასის ბიოფსიის პათოლოგიურმა პასუხმა და რადიოლოგიურმა კვლევებმა 1. სტადიის ძუძუს კიბო აჩვენა. თავდაპირველად ქირურგმა ძუძუს შემნახველი ოპერაციის — ლუმპექტომიის შემდეგ რადიოთერაპია მირჩია, მაგრამ დიაგნოზის დასმისთანავე ორივე ძუძუს ამოკვეთის ძლიერი სურვილი მქონდა; ვგრძნობდი, რომ ამ კიბოსგან სრულად გასათავისუფლებლად უფრო აქტიურად უნდა მემოქმედა. არ მინდოდა მომავალში მამოგრაფიაზე დამალული ან ულტრაბგერით ვერგამოვლენილი სხვა კიბო ან რეციდივი (განმეორება) შემხვედროდა.

მარცხენა ძუძუში კიბო პატარა და ღრმად მდებარე იყო, მარჯვენაში კი ნიშანი არ ჩანდა, მაგრამ პროფილაქტიკური მასტექტომია (დამცავი მიზნით ორივე ძუძუს ამოკვეთა) მოვითხოვე. რადგან მე აშკენაზი ებრაული წარმომავლობა მაქვს, რაც BRCA მუტაციის მაღალ რისკს მიქმნის. მუტაციის შესამოწმებლად გენეტიკური ტესტი ჩავიტარე. როგორც ორი ახალგაზრდა ქალიშვილის დედას, ეს რისკფაქტორები მაღელვებდა და მათ მომავალზე ვფიქრობდი. ამასთან, რისკის შესამცირებლად ყველაფერი საჭირო უნდა გაგვეკეთებინა.

- დაკავშირებული თემა: ვინ უნდა ჩაიტაროს გენეტიკური ტესტი მემკვიდრეობითი ძუძუს კიბოსთვის?

რთული არჩევანის გაკეთება

გენეტიკურმა ტესტმა BRCA2-დადებითობა აჩვენა და ამან ჩემი სურვილი ორმხრივი დამცავი ოპერაციისა და ესთეტიკური ქირურგიით ძუძუს აღდგენისა (რეკონსტრუქციისა) კიდევ უფრო გააძლიერა. საკვერცხის კიბოს გაზრდილი რისკის გამო საკვერცხეებიც ამოვიკვეთე. ვიცი ისიც, რომ პანკრეასის კიბოსა და ავთვისებიანი მელანომის მაღალი რისკი მაქვს და ამას ყურადღებას ვაქცევ.

ძალიან გამიმართლა, რომ მყავს გუნდი, რომელიც ჩემს შეშფოთებას უსმენს, საჭიროებებზე ზრუნავს და მოვლის ყველა გადაწყვეტილებაში მრთავს; თუმცა ვიცი, რომ ყველა კიბოგადატანილს ეს შესაძლებლობები და გამოცდილება არ აქვს.

ჩემი მთავარი საზრუნავი ქალიშვილებია. უმცროსი 27 წლისაა; მამოგრაფიაზე მარცხენა ძუძუში დიდი მასის აღმოჩენის შემდეგ მასაც პროფილაქტიკური ორმხრივი მასტექტომია ჩაუტარდა. მასა კეთილთვისებიანი აღმოჩნდა, მაგრამ მემკვიდრეობითი რისკისა და ძლიერი შფოთვის გამო ოპერაცია გაიკეთა. ახლა გეგმავს, როდის ამოიკვეთოს საკვერცხეები. უფროს ქალიშვილს კი თირეოიდული, ძუძუსა და საკვერცხის კიბოს რისკი აქვს გაზრდილი. მას ჯერ ვერ გადაუწყვეტია, ამოიკვეთოს თუ არა ძუძუები ან საკვერცხეები. ახალგაზრდა ქალებისთვის, რომლებსაც ჯერ შვილები არ ჰყავთ, ეს მარტივი გადაწყვეტილებები არ არის.

სხვების ხმად ყოფნა

მშობლების სიცოცხლის მიწურულს მათ სამედიცინო გადაწყვეტილებებში აქტიურად ვმონაწილეობდი. ძუძუს კიბოს დიაგნოზისას ვიცოდი, როგორი უნდა ყოფილიყო ჩემთვის საუკეთესო სამედიცინო მოვლა; რადიკალური მკურნალობის არჩევითა და გენეტიკური ტესტების მიყოლით სიცოცხლის გადარჩენა შემეძლო.

დიაგნოზის შემდეგ ძუძუს კიბოს მხარდაჭერის ბევრ ჯგუფში ჩავერთე; შევხვდი ქალებს, რომლებსაც მკურნალობისა და გვერდითი ეფექტების შესახებ ეჭვები ჰქონდათ. მათ ამ თემებზე ვესაუბრე, რადგან არ მინდა, ექიმებით იმედგაცრუებულები ან გაბრაზებულები იყვნენ. მიხარია მათი დახმარება და ვურჩევ, მიღებული მოვლის მიმართ საკუთარ შეგრძნებებსა და ემოციებს ყურადღება მიაქციონ და ონკოლოგის ან სამედიცინო გუნდის შესახებ შეშფოთება ხმამაღლა გამოთქვან. შიშებზე უნდა ვისაუბროთ და გამოსავალი ვეძებოთ. ბოლოს და ბოლოს, ჩვენი სხეული ყველაზე კარგად თავად ვიცით.

სავსე ცხოვრებით ცხოვრება

კიბომ შემცვალა, მაგრამ დადებითად. ცხოვრებაში ახალი მიზანი შევიძინე და ძალიან მიხარია, რომ სხვა ქალებს კიბოს გამოცდილებაში გაძლიერებასა და ძალის პოვნაში ვეხმარები. კიბო არ მინდოდა, მაგრამ მან ჩემს ცხოვრებას დადებითი მხარეებიც შესძინა.

.

სტატია შერი როზენთალის ascopost ვებგვერდისთვის მიცემული ინტერვიუს თარგმანია. ეს ადამიანი კარგი მაგალითია კითხვისთვის, როგორ უნდა აკვირდებოდნენ და მკურნალობდნენ მემკვიდრეობითი ძუძუს კიბოს მქონე ადამიანებს . ამასთან, არამემკვიდრეობითი ძუძუს კიბოს დროს მეორე ჯანმრთელი ძუძუს ოპერაცია, არასაჭიროსთან ერთად ძვირიცაა და ცხოვრების ხარისხს ამცირებს. ყველა ძუძუს კიბოს ერთნაირად არ მკურნალობენ; გადაწყვეტილებაზე მოქმედი ათეულობით რისკფაქტორი და პაციენტთან დაკავშირებული მდგომარეობა არსებობს. სამედიცინო ონკოლოგი, რომელიც დაავადების მთელ, წინა და შემდგომ მიმდინარეობას ფლობს, თქვენი აქტიური მონაწილეობით მიღებული გადაწყვეტილების პროცესში განსაზღვრავს როგორც თქვენთვის შესაფერის, ისე შეუფერებელ მკურნალობებს.