დადგა დენდრიტული უჯრედების ვაქცინის ეპოქა HER2-დადებით ძუძუს კიბოში?

2024 წლის 5 დეკემბერს JAMA Oncology ჟურნალში გამოქვეყნებული კვლევის თანახმად, ადრეული ERBB2-დადებითი (ადრე HER2) ძუძუს კიბოს დროს სიმსივნეში დენდრიტული უჯრედების (cDC1) შეყვანა უსაფრთხო და ეფექტიანი მეთოდია, რომელიც იმუნურ პასუხს აძლიერებს და ქიმიოთერაპიამდე სიმსივნის შემცირებას უწყობს ხელს.

ERBB2-დადებითი ძუძუს კიბო, მკურნალობის მნიშვნელოვანი წინსვლის მიუხედავად, კვლავ აქტიური კვლევის სფეროა. ტრასტუზუმაბისა და პერტუზუმაბის მსგავსი anti-ERBB2 ანტისხეულები გადარჩენას ზრდის, თუმცა სრული პათოლოგიური პასუხისთვის ქიმიოთერაპიის საჭიროებას პაციენტისთვის მნიშვნელოვანი გვერდითი მოვლენების რისკი ახლავს. ახალი თაობის იმუნოთერაპიები ეფექტიანობის გასაზრდელად და გვერდითი მოვლენების შესამცირებლად შეისწავლება. ფლორიდის ქალაქ Tampa-ს Moffitt-ის კიბოს ცენტრში ჩატარებულ ამ 1 ფაზის კვლევაში სიმსივნისშიდა (IT) cDC1 ინექციების უსაფრთხოება, იმუნოგენურობა და სიმსივნის საწინააღმდეგო მოქმედება შეფასდა.

კვლევის დიზაინი

არარანდომიზებული 1 ფაზის კვლევა 2021-2022 წლებში 12 პაციენტში ჩატარდა. მონაწილეებს ადრეული ERBB2-დადებითი ძუძუს კიბო და 1 cm ან უფრო დიდი სიმსივნე ჰქონდათ.

დენდრიტული უჯრედების ვაქცინა იმუნოთერაპიის ტიპია, რომლის დროსაც იმუნური სისტემის კიბოს მსგავსი დაავადებების წინააღმდეგ ეფექტიანობის გასაზრდელად დენდრიტულ უჯრედებს პაციენტისგან მიღებული სიმსივნური ანტიგენებით ტვირთავენ და სხეულში აბრუნებენ. ვაქცინის მოსამზადებლად სისხლიდან დენდრიტული უჯრედების წინამორბედებს აგროვებენ, ლაბორატორიაში შესაბამის ანტიგენებს აერთიანებენ და ააქტიურებენ.

მკურნალობის პროტოკოლი:

• დენდრიტული უჯრედების შეყვანა: ყოველკვირეული სიმსივნისშიდა cDC1 ინექცია 6 კვირის განმავლობაში. გამოიცადა დოზის ორი დონე (50 მილიონი უჯრედი — დოზის დონე 1, 100 მილიონი უჯრედი — დოზის დონე 2).
• ანტისხეულებით მკურნალობა: პირველი დღიდან ტრასტუზუმაბი და პერტუზუმაბი ყოველ 3 კვირაში ინტრავენურად შეჰყავდათ.
• ქიმიოთერაპია და ქირურგია: 12-კვირიანი პაკლიტაქსელის შემდეგ ყველას ლუმპექტომია ან მასტექტომია ჩაუტარდა.

მთავარი შედეგები:

• პირველადი მიზნები: უსაფრთხოება და იმუნური პასუხი.
• მეორეული მიზნები: სიმსივნის პასუხი (ძუძუს MR გამოსახულება) და ოპერაციის შემდეგ დარჩენილი კიბოს დატვირთვა.

მიგნებები

უსაფრთხოება და გვერდითი მოვლენები:

• სიმსივნეში დენდრიტული უჯრედების ვაქცინის შეყვანას, ზოგადად, კარგად იტანდნენ. დოზასთან დაკავშირებული გვერდითი მოვლენა არ დაფიქსირდა.
• ყველაზე ხშირად აღწერილი გვერდითი მოვლენები:
• 1-2 ხარისხის შემცივნება (50 პროცენტი)
• დაღლილობა (41,7 პროცენტი)
• თავის ტკივილი (33 პროცენტი)
• ინექციის ადგილის რეაქციები (33 პროცენტი)

იმუნოლოგიური მოქმედება:

• დოზის დონე 2:
• სიმსივნის მიკროგარემოში (TME) ადაპტურ იმუნურ უჯრედებთან (CD3, CD4, CD8 T უჯრედები და B უჯრედები) ერთად გამა-დელტა T და ბუნებრივი მკვლელი (NK) T უჯრედების გაზრდილი დაგროვება გამოვლინდა.

სიმსივნის პასუხი:

• ძუძუს MR გამოსახულების მიხედვით:
• 9 ობიექტური პასუხი (6 ნაწილობრივი, 3 სრული)
• 3 სტაბილური დაავადება
• ოპერაციის შემდეგ 12 პაციენტიდან 7-ში (58 პროცენტი) სრული პათოლოგიური პასუხი იქნა მიღებული.
• ჰორმონული რეცეპტორების უარყოფითმა ყველა პაციენტმა (3 პაციენტი) სრული პასუხი აჩვენა.
• ჰორმონული რეცეპტორების დადებით 4 პაციენტში სრული პასუხი მიიღეს.

რას ნიშნავს 58% სრული პათოლოგიური პასუხი?

HER2-დადებითი ძუძუს კიბოს მქონე პაციენტებში ნეოადიუვანტური მკურნალობის შემდეგ მიღებული 58% სრული პათოლოგიური პასუხი (pTY) ისტორიული მონაცემებისა და თანამედროვე მიდგომების ფონზე საყურადღებო მიღწევაა. ლიტერატურაში ტრასტუზუმაბისა და ქიმიოთერაპიის კომბინაციებით ნეოადიუვანტურ მკურნალობაში pTY ჩვეულებრივ 30%-სა და 50%-ს შორის მერყეობს. მაგალითად, ტაქსანისა და ანტრაციკლინის სქემებზე ტრასტუზუმაბის დამატებით მაჩვენებელი 40-50%-ს აღწევდა. ამასთან, HER2-ზე ორმაგი მიზნობრივი მკურნალობის (მაგალითად, ტრასტუზუმაბისა და პერტუზუმაბის) გამოყენებამ pTY 50%-ზე მაღლა აიყვანა.

შედეგები და კლინიკური მნიშვნელობა

შედეგები აჩვენებს, რომ სიმსივნისშიდა cDC1 ინექციები anti-ERBB2 ანტისხეულებთან ერთად უსაფრთხო და ეფექტიანი არჩევანია. განსაკუთრებით მაღალი დოზით (100 მილიონი უჯრედი) სიმსივნის მიკროგარემოში ძლიერი იმუნური ინფილტრაცია და ქიმიოთერაპიამდე მნიშვნელოვანი რეგრესია გამოვლინდა.

დასკვნის სახით ეს მიდგომა იმედისმომცემია, როგორც იმუნოთერაპია, რომელმაც შესაძლოა ქიმიოთერაპიის საჭიროება და გვერდითი მოვლენები შეამციროს. კვლევის 2 ფაზაში ეფექტიანობისა და უსაფრთხოების შეფასება უფრო დიდ ჯგუფში (41 პაციენტი) გაგრძელდება.