ძილის აპნოემ შეიძლება კიბოს გავრცელებას შეუწყოს ხელი
ამ სტატიაში
ობსტრუქციული ძილის აპნოე დაკავშირებულია კიბოს შემთხვევებისა და მისგან გამოწვეული სიკვდილიანობის ზრდასთან. ბოლო კვლევებმა აჩვენა, რომ ძილის აპნოეს მქონე ადამიანებში არსებული ჰიპოქსიური (ჟანგბადის ნაკლებობის) გარემო და ჰაერის არარეგულარული ნაკადი სიმსივნური უჯრედების ზრდას უწყობს ხელს.
2016 წლის ნოემბერში ფილტვის დაავადებების სფეროს ავტორიტეტულ სამეცნიერო ჟურნალ Chest-ში გამოქვეყნებულ კვლევაში მკვლევრებმა ლაბორატორიულ ცხოველებზე შეისწავლეს ძილის აპნოეს გავლენა კიბოს უჯრედებზე. თაგვები ორ ჯგუფად დაყვეს: ნაწილს ჰაერის რეგულარულ ნაკადს აწვდიდნენ, ხოლო მეორე ნაწილს არარეგულარულ ჰიპოქსიურ გარემოში ათავსებდნენ, რითაც თაგვებში ძილის აპნოეს იწვევდნენ.
კვლევის შედეგების თანახმად;
- თაგვებში, რომლებსაც ძილის აპნოე განუვითარდა, ფილტვის კიბოს უჯრედების ავთვისებიანობის ზრდა დაფიქსირდა. დადგინდა, რომ ამის მიზეზი ძილის აპნოეს გამო სისხლის მიმოქცევაში გამოთავისუფლებული ეგზოსომები იყო.
ეგზოსომები მიკროსკოპული გადამტანებია, რომლებიც ცილების, ლიპიდებისა და მიკრორნმ-ების გადატანაში მონაწილეობს. ძირითადად ისინი უჯრედებს შორის კომუნიკაციაშიმონაწილეობს. ეგზოსომები შეგვიძლია უჯრედების მიერ ერთმანეთისთვის გაგზავნილ წერილებს შევადაროთ. თუმცა კიბოს უჯრედები მათ საკუთარი ზრდის გასაძლიერებლად იყენებს. თუ ეგზოსომების რაოდენობა ძალიან მოიმატებს, სიმსივნის ზრდაც ძლიერდება და უფრო ადვილად ხდება მეტასტაზირება . ბოლო წლებში ტარდება კვლევები სისხლის ანალიზით ეგზოსომების გამოსავლენად, რათა კიბოს ადრეული დიაგნოსტიკა და დაავადებისთვის ყველაზე შესაფერისი მკურნალობის შერჩევა გახდეს შესაძლებელი.
- აღმოჩნდა, რომ ქსოვილებში ჟანგბადის ნაკლებობა ზრდის „კიბოს უჯრედის მეგობარი“ ეგზოსომების გამოყოფას.
- კვლევის ერთ-ერთი ყველაზე საინტერესო შედეგი იყო ის, რომ ძილის აპნოეს მქონე თაგვებიდან და ძილის აპნოეს მქონე ადამიანებიდან გამოყოფილი ეგზოსომების შედარებისას ორივემ უჯრედული კულტურის მოდელებში ერთნაირი ეფექტი აჩვენა.
რას ნიშნავს ეს კვლევა კლინიკური თვალსაზრისით?
- დადგინდა, რომ ძილის აპნოე კიბოს არასასურველი მიმდინარეობის დამოუკიდებელი ფაქტორია. ამიტომ კიბოს მქონე პაციენტებში ძილის აპნოეს ყურადღება უნდა მიექცეს და მკურნალობა ჩატარდეს.
- მკვლევრებმა ასევე შეისწავლეს ეგზოსომებიდან გამოთავისუფლებული რნმ-ის ნაწილაკები. ამ ნაწილაკების მოწინავე გენეტიკურმა ანალიზებმა შეიძლება ხელი შეუწყოს იმ მოლეკულებისა და უჯრედული გზების აღმოჩენას, რომლებიც კიბოს აგრესიულობას განაპირობებს.
წყაროები
Tumor Cell Malignant Properties Are Enhanced by Circulating Exosomes in Sleep Apnea,
Chest Volume 150, Issue 5, November 2016, Pages 1030–1041
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.