იმუნოთერაპია სამმაგად უარყოფითი ძუძუს კიბოს ოპერაციამდელ მკურნალობაში

ადგილობრივად შორს წასული სამმაგად უარყოფითი ძუძუს კიბოს სტანდარტულ ნეოადიუვანტურ (ოპერაციამდე სიმსივნის შემამცირებელ) ქიმიოთერაპიაზე იმუნოთერაპიის პემბროლიზუმაბის (Keyturuda) დამატებამ სრული პათოლოგიური პასუხის სიხშირე თითქმის %15-ით გაზარდა — ამ კლინიკური კვლევის შედეგები ESMO 2019-ზე წარადგინეს.
ქვემოთ ჩანს ძუძუს კიბოს სახეობები მათი ბიოლოგიური მახასიათებლების მიხედვით:

ინგლისელი პროფესორი Schmid-ისა და მისი კოლეგების მიერ ჩატარებულ პლაცებოკონტროლირებულ KEYNOTE-522 სახელწოდების III ფაზის კლინიკურ კვლევაშიჩაერთნენ მანამდე არანამკურნალები, T1c N1-2 ან T2-4 N0-2 სტადიით განსაზღვრული, მეტასტაზური დაავადების არმქონე სამმაგად უარყოფითი ძუძუს კიბოს მქონე პაციენტები.
პაციენტებიდან 784 შემთხვევითი განაწილებით მოხვდა ჯგუფში, რომელიც ყოველ 3 კვირაში 200 mg პემბროლიზუმაბს იღებდა, ხოლო 390 — პლაცებოს ჯგუფში. ყველა პაციენტმა სტანდარტული ქიმიოთერაპიის სახით 12 კვირა პაკლიტაქსელი და კარბოპლატინი მიიღო, შემდეგ კი დოქსორუბიცინის ან ეპირუბიცინისა და ციკლოფოსფამიდის 4 კურსი. ძუძუს კიბოს ოპერაციის შემდეგ ყველა პაციენტს ადიუვანტურად დამატებით პემბროლიზუმაბის ან პლაცებოს 9 კურსი მიეცა რეციდივამდე ან მიუღებელ გვერდით ეფექტამდე. პაციენტები კლასიფიცირდნენ იღლიის ლიმფური კვანძების ჩართულობის (უარყოფითი და დადებითი) და სიმსივნის ზომის (T1 / T2 და T3 / T4) მიხედვით.
KEYNOTE-522 კვლევის ძირითადი საბოლოო მაჩვენებელია სრული პათოლოგიური პასუხის სიხშირე. ოპერაციამდე ქიმიოთერაპიის ეფექტიანობას ძუძუს კიბოს ოპერაციისას ამოღებული ქსოვილის პათოლოგიური კვლევა გვიჩვენებს. თუ ნეოადიუვანტური მკურნალობის შემდეგ საოპერაციო პათოლოგიურ მასალაში კიბოს უჯრედები საერთოდ არ გვხვდება, ამას სრულ პათოლოგიურ პასუხს ვუწოდებთ. წინა კვლევებიდან ვიცოდით, რომ ასეთ პაციენტებში კიბოს განმეორების ალბათობა უფრო დაბალია.
კვლევის შედეგები
- დაკვირვების ხანგრძლივობის მედიანა 15.5 თვე იყო და სრული პათოლოგიური პასუხის ანალიზისთვის 602 პაციენტი შეფასდა.
- სრული პათოლოგიური პასუხის სიხშირე პემბროლიზუმაბი + ქიმიოთერაპიის სქემით % 64.8 იყო, ხოლო პლაცებო + ქიმიოთერაპიის შემთხვევაში % 51.2 იყო
- კვლევის საყურადღებო შედეგი იყო ის, რომ PD-L1 სტატუსისგან დამოუკიდებლად პემბროლიზუმაბი პლუს ქიმიოთერაპია უფრო მაღალ სიმსივნის საწინააღმდეგო აქტივობას აჩვენებდა.
- PD-L1-დადებით პაციენტებში ქიმიოთერაპიასთან ერთად პემბროლიზუმაბის მიმღებთა სრული პათოლოგიური პასუხის სიხშირე % 68.9 იყო, ხოლო ქიმიოთერაპია პლუს პლაცებოს ჯგუფში — % 54.9. • PD-L1-უარყოფით პაციენტებში მაჩვენებლები იყო % 45.3 და % 30.3.
გვერდითი ეფექტები
გვერდითი ეფექტების სიხშირე ჯგუფებს შორის მსგავსი იყო და თითოეული მკურნალობის ცნობილ უსაფრთხოების პროფილს შეესაბამებოდა. მკურნალობასთან დაკავშირებული მძიმე (მე-3 ან უფრო მაღალი ხარისხის) გვერდითი ეფექტების სიხშირე ნეოადიუვანტური პემბროლიზუმაბი პლუს ქიმიოთერაპიისა და ადიუვანტური პემბროლიზუმაბის შემთხვევაში % 78.0 იყო, ხოლო პლაცებოსა და ქიმიოთერაპიისას — % 73.0. შესაბამის სქემებში სიკვდილის სიხშირე % 0.4 და % 0.3 იყო.
დასასრულ, ESMO 2019 კონგრესზე წარმოდგენილი მონაცემების საფუძველზე მკვლევრებმა დაასკვნეს, რომ ნეოადიუვანტური პემბროლიზუმაბი პლუს ქიმიოთერაპია ადრეული სამმაგად უარყოფითი ძუძუს კიბოს მქონე პაციენტებში სტანდარტულ ქიმიოთერაპიასთან შედარებით სრული პათოლოგიური პასუხის სიხშირეს მნიშვნელოვნად ზრდის.
წყაროები
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.





მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.