კვების ტიპის მნიშვნელობა კიბოს მქონე პაციენტში ქრონიკული დაღლილობის შესამცირებლად

ქრონიკული დაღლილობა არის პრობლემა, რომელიც საკმარისი დასვენების მიუხედავად მუდმივი დაღლილობით, მუშაობის პროდუქტიულობის დაქვეითებით, უხალისობით, სოციალური ცხოვრებისგან ჩამოშორებითა და უბედურების განცდით ვლინდება.

კიბოსთან დაკავშირებული ქრონიკული დაღლილობა გვიანი სტადიის კიბოს მქონე პაციენტების 75-100%-შია აღწერილი. ამასთან, დადგინდა, რომ კიბოგადატანილთა დაახლოებით 20%-დან 30-მდე ნაწილს მკურნალობის შემდეგ 5-დან 10 წლამდე ქრონიკული დაღლილობა აქვს.

Nutrition and Cancer ჟურნალში 2023 წლის 8 თებერვალს გამოქვეყნებული სამეცნიერო კვლევა კიბოს მკურნალობის შემდეგ ქრონიკულ დაღლილობასთან ბრძოლაში კვებითი ჩარევების მნიშვნელობასა და მათ განხორციელებადობას ეხება.

ყველაზე მნიშვნელოვანი პრობლემა კიბოს მკურნალობის შემდეგ

ამ კვლევაში დადგინდა, რომ კიბოს მკურნალობის შემდეგ ქრონიკული დაღლილობა ყველაზე გავრცელებული პრობლემაა და ცხოვრების ხარისხის დამაზიანებელ ფსიქოლოგიურ პრობლემებს, მაგალითად დეპრესიასა და შფოთვას იწვევს. კიბოსთან დაკავშირებული ქრონიკული დაღლილობის სამკურნალოდ არსებობს არამედიკამენტური გზები: ფიზიკური აქტივობა, კოგნიტურ-ქცევითი თერაპია და გონება-სხეულის პრაქტიკები, მაგალითად იოგა. თუმცა მათ განხორციელებას ფიზიკური და დაავადებასთან დაკავშირებული შეზღუდვები, ფსიქოთერაპიის ღირებულება, მგზავრობა და დრო აბრკოლებს.

გვიანი სტადიის ფილტვის კიბოს მქონე კაცებში ჩატარებულ წინა კვლევაში დაღლილობა, რომელიც ყოველდღიურ საქმიანობაზე ტკივილზე მეტადაც მოქმედებს, მნიშვნელოვან ჩივილად დასახელდა.

კვლევებმა აჩვენა, რომ კვებით ჩარევებს შეუძლია დაღლილობის შემცირებას, კვების ხარისხის გაუმჯობესებასა და კიბოგადატანილთათვის ზოგადად ცხოვრების უკეთეს ხარისხს შეუწყოს ხელი.

კიბოსა და მისი მკურნალობის შედეგად გამოწვეული ანთებითი პროცესების ქრონიკული დარღვევა არა მხოლოდ დაღლილობას აძლიერებს, არამედ აუარესებს კიბოს მკურნალობასთან დაკავშირებულ სხვა გვერდით მოვლენებსაც, რომლებიც ცხოვრების ხარისხზე მოქმედებს. ანთებასთან კავშირის გამო, ანთებითი მარკერების შემამცირებელი კვებითი ჩარევები იმედის მომცემი სტრატეგიებია.

ქრონიკულ დაღლილობასა და ცხოვრების ხარისხზე კვებითი ჩარევის გავლენის დასადგენად ეს კვლევა 3 თვის განმავლობაში ჩატარდა პაციენტებში, რომლებსაც ლიმფომის მკურნალობა დასრულებული ჰქონდათ. კვების გეგმები თითოეული პაციენტის საკვების არჩევანისა და საჭმლის მომზადების უნარების მიხედვით ინდივიდუალურად შეირჩა, რამაც პაციენტებს ცხოვრების წესის ცვლილებები შესძინა. მონაწილეთა კვებაში ინტეგრირდა მრავალი სასარგებლო საკვები ნივთიერება ისეთი პროდუქტებიდან, როგორიცაა სრულმარცვლეული, ხილი, ბოსტნეული და ცხიმიანი თევზი.

კვლევის შედეგად აღმოჩნდა, რომ კვების სტილშეცვლილ მონაწილეებს 78%-ით ნაკლები დაღლილობა ჰქონდათ.

Zick-ისა და კოლეგების მიერ ჩატარებულმა სხვა საპილოტე რანდომიზებულმა კონტროლირებულმა კვლევამაც ძუძუს კიბოგადატანილ 30 ადამიანში აჩვენა, რომ ხილის, ბოსტნეულის, სრულმარცვლეულისა და ომეგა-3 პოლიუჯერი ცხიმების შემცველი საკვები დაღლილობასა და ძილს მნიშვნელოვნად აუმჯობესებდა.

მდგრად კვებით მოდელად რეკომენდებული დიეტაა ხმელთაშუაზღვის ტიპის კვება. საჭიროა ბოსტნეულის, ხილის, სრულმარცვლეულისა და პარკოსნების მიღება. წითელი ხორცი, დამატებული შაქარი და ძლიერ დამუშავებული საკვები შეძლებისდაგვარად უნდა შემცირდეს.

დაკავშირებული თემა: რა არის ხმელთაშუაზღვის დიეტა? რატომ არის საუკეთესო დიეტა? როგორ დავიცვათ?