მაღალი რისკის ლოკალურად შორსწასულ ცერვიქსის (საშვილოსნოს ყელის) კიბოში იმუნოთერაპია ეფექტიანი აღმოჩნდა

ცერვიქსის (საშვილოსნოს ყელის) კიბო ქალებისთვის მთელ მსოფლიოში მნიშვნელოვანი კიბოს სახეობაა და, მიუხედავად იმისა, რომ ადრეულად აღმოჩენის შემთხვევაში მკურნალობას ექვემდებარება, შორსწასულ სტადიებზე მის წინააღმდეგ ეფექტიანი მკურნალობების შემუშავება დიდი საჭიროებაა. მკურნალობის ახალმა სტრატეგიებმა პაციენტების სიცოცხლე შეიძლება გაახანგრძლივოს და ცხოვრების ხარისხი გააუმჯობესოს. KEYNOTE-A18 კვლევას ამ სფეროში დანაკლისის შევსებისა და საშვილოსნოს ყელის კიბოს მკურნალობაში იმედისმომცემი ახალი მიდგომების წარმოჩენის პოტენციალი აქვს.

KEYNOTE-A18 კვლევის მიგნებები

ESMO კონგრესზე 2023 წელს წარმოდგენილი მონაცემები პირველად აჩვენებს, რომ იმუნური საკონტროლო წერტილის ინჰიბიტორების კლასის იმუნოთერაპიებმა მაღალი რისკის, ლოკალურად (ადგილობრივად) შორსწასულ საშვილოსნოს ყელის კიბოში შედეგები შეიძლება გააუმჯობესოს.

ქვემოთ კვლევის დიზაინი ჩანს:

KEYNOTE-A18 კვლევაში pembrolizumab-ისა და ერთდროული ქიმიორადიოთერაპიის (KRT) კომბინაციის მიმღებ პაციენტებში კიბოს პროგრესირების (წინსვლის) რისკი პლაცებოსა და KRT-ის მიმღებ პაციენტებთან შედარებით 30%-ით დაბალი იყო (HR 0,70; 95% CI 0,55–0,89; p=0,0020).

პროგრესირებისგან თავისუფალი გადარჩენის მნიშვნელოვანი გაუმჯობესება

მიუხედავად იმისა, რომ საერთო გადარჩენის მონაცემები ამჟამად ჯერ მოუმწიფებელია, pembrolizumab-ის ჯგუფში დადებითი ტენდენცია დაფიქსირდა (HR 0,73; 95% CI 0,49–1,07). ამასთან, ნაჩვენები იყო, რომ pembrolizumab-ისა და KRT-ის კომბინაციას უსაფრთხოების მართვადი პროფილი აქვს.

ეს 1999 წლიდან ლოკალურად შორსწასული საშვილოსნოს ყელის კიბოში მიღებული პირველი დადებითი კვლევაა და წარმოადგენს ამ დაავადებაში იმუნოთერაპიების გამოყენებისთვის ახალი კარის გახსნას.

სამომავლო იმედები და სტრატეგიები

შედეგად, საშვილოსნოს ყელის კიბოს მკურნალობაში იმუნოთერაპიების გადამწყვეტი მნიშვნელობა დადასტურდა. ვხედავთ, რომ მეტასტაზური, მორეციდივე ან მკურნალობისადმი რეზისტენტული საშვილოსნოს ყელის კიბოს შემთხვევებში ისინი ეფექტიანია როგორც პირველი, ისე მეორე ხაზის მკურნალობად და ლოკალურად შორსწასულ კიბოებში ეფექტიანად მოქმედებს ქიმიოთერაპიასა და რადიოთერაპიასთან ერთად. პაციენტებისთვის, რომელთა კიბოს კონტროლი მკურნალობის სტანდარტული მეთოდებით ვერ ხერხდება, სასწრაფოდ გვჭირდება მკურნალობის ახალი ვარიანტები. საშვილოსნოს ყელის კიბოს უჯრედებში არსებულ სპეციფიკურ ზედაპირულ მოლეკულებზე, მაგალითად, ქსოვილოვან ფაქტორზე ან HER2-ზე მიმართული ანტისხეულ-წამლის კონიუგატები იმედისმომცემ ახალ სტრატეგიებად გვევლინება.