მოქმედებს თუ არა დამატებითი და ალტერნატიული მედიცინის პროდუქტების გამოყენება ძუძუს კიბოს პაციენტების მკურნალობის დაწყების გადაწყვეტილებაზე?

ავტორიტეტულ სამედიცინო ჟურნალ Jama Oncology-ში 12 მაისს გამოქვეყნებული საყურადღებო კვლევის მიხედვით, ადრეული სტადიის ძუძუს კიბოს პაციენტებში დამატებითი და ალტერნატიული მედიცინის (დამ) პროდუქტების გამოყენება საკმაოდ ხშირია და ეს პაციენტებისთვის ძალიან მნიშვნელოვან ქიმიოთერაპიის დაწყების გადაწყვეტილებაზე მოქმედებს.

ადრეული და ადგილობრივად შორსწასული ძუძუს კიბოს მქონე პაციენტების გარკვეულ ჯგუფში ადიუვანტური მკურნალობა, როგორც ცნობილია, სიცოცხლის ხანგრძლივობას ზრდის და დაავადების განმეორების რისკს ამცირებს. საერთაშორისო მკურნალობის გაიდლაინები მკაფიოდ განსაზღვრავს, ვის უნდა ჩაუტარდეს ადიუვანტური მკურნალობა, თუმცა ამ საკითხზე მრავალი კვლევაც გრძელდება.

მკურნალობის გადაწყვეტილებაში დაავადების სტადიასა და აგრესიულობასთან ერთად მნიშვნელოვანია ფსიქოსოციალური ფაქტორები, რწმენის სისტემა და შეთავაზებული სამედიცინო მომსახურების თავისებურებები.

აღმოჩნდა, რომ ქიმიოთერაპიის მიღებაზე მერყევ ძუძუს კიბოს პაციენტებს შემდეგი მახასიათებლები აქვთ:

• კიბოსთან დაკავშირებული შფოთვა,
• ოპტიმიზმი,
• ექიმებთან უარყოფითი გამოცდილება,
• რწმენა, რომ ალტერნატიული მედიცინა სარგებელს მოიტანს,
• ქიმიოთერაპიის რისკების გამო შეშფოთება და
• ძუძუს კიბოს პროტოკოლების არასაკმარისი ცოდნა

ამ ჯგუფის პაციენტებს დამატებითი და ალტერნატიული მედიცინის (დამ) გამოყენების ტენდენციაც აქვთ. ბოლო 20 წლის განმავლობაში ძუძუს კიბოს პაციენტებში დამ-ის გამოყენება გაიზარდა. ზოგიერთმა კვლევამ შეაფასა, როგორ მოქმედებს დამ-ის გამოყენება ქიმიოთერაპიის გადაწყვეტილებაზე.

ჩვენს სტატიაში განხილულ კვლევაში არამეტასტაზური ძუძუს კიბოს მქონე 685 ქალი ჩაერთო. შეისწავლეს მკურნალობის დაწყებისა და მისდამი ერთგულების მაჩვენებლები. კვლევაში 598 (87%) ქალმა დამ-ის (დამატებითი და ალტერნატიული მკურნალობის) გამოყენება განაცხადა. ქიმიოთერაპიის რეკომენდაციის მქონე 272 (89%) ქალს ქიმიოთერაპია დაეწყო, ხოლო 135 (36%) ქალისთვის იგი ნებაყოფლობით არჩევანად დარჩა.

გასაუბრებებში შეფასდა დამ-ის 5 ტიპის პროდუქტის/პრაქტიკის გამოყენება:

1. ვიტამინები და/ან მინერალები
2. მცენარეები და/ან ბოტანიკური პროდუქტები
3. სხვა ბუნებრივი პროდუქტები
4. გონება-სხეულის თვითგამოსაყენებელი ტექნიკები
5. გონება-სხეულის სპეციალისტთან ჩატარებული პრაქტიკები

გამოითქვა მოსაზრება, რომ დამ-ის გამოყენება სტანდარტული ონკოლოგიური მკურნალობის არდაწყების რისკფაქტორი შეიძლება იყოს, რადგან პაციენტი სხვა ალტერნატიულ მკურნალობებს აღმოაჩენს ან კლასიკური ონკოლოგიური მკურნალობა მის რწმენის სისტემას არ შეესაბამება. ქიმიოთერაპიისთვის განკუთვნილ ქალებს შორის საკვები დანამატების მიმღებ და დამ-ის მაღალი გამოყენების მქონე ქალებში ქიმიოთერაპიის დაწყების ალბათობა არამომხმარებლებთან შედარებით ნაკლები აღმოჩნდა. ამასთან, გონება-სხეულის პრაქტიკების გამოყენებას (ფიზიკური და სულიერი ჯანმრთელობის შესანარჩუნებელი და გასაუმჯობესებელი მეთოდები, როგორიცაა ფიზიოთერაპია/ვარჯიში) ქიმიოთერაპიის დაწყებასთან კავშირი არ ჰქონდა. ასევე, ქალებში, რომლებისთვისაც ქიმიოთერაპია ნებაყოფლობითი იყო, დამ-ის გამოყენებასა და ქიმიოთერაპიის დაწყებას შორის კავშირი არ აღმოჩნდა.

შედეგად, კვლევამ აჩვენა, რომ ადრეული სტადიის ძუძუს კიბოს პაციენტებში დამ-ის გამოყენება საკმაოდ ხშირია. სარგებლის მისაღებად საკვები დანამატებისა და დამ-ის მრავალი მეთოდის გამოყენება გამოვლინდა, რაც სასიცოცხლო სარგებლის მქონე ადიუვანტური ქიმიოთერაპიის ჩატარებას ამცირებდა. თუმცა გონება-სხეულის პრაქტიკები ქიმიოთერაპიის ჩატარების შემამცირებელ ფაქტორად არ აღმოჩნდა. ამიტომ ქიმიოთერაპიის გადაწყვეტილების ეტაპზე დამ-ის გამოყენება აუცილებლად უნდა გაითვალისწინონ და განიხილონ.