ყოველდღიური ნაბიჯების დათვლამ შეიძლება კიბოს მკურნალობისას ჰოსპიტალიზაცია იწინასწარმეტყველოს

ყოველდღიური ნაბიჯების რაოდენობის მონიტორინგმა შეიძლება ქიმიო-სხივური თერაპიის მიმღებ კიბოს მქონე პაციენტებში გადაუდებელი მოვლენების გამო ჰოსპიტალიზაცია იწინასწარმეტყველოს და მის თავიდან აცილებას შეუწყოს ხელი.

ფიზიკური აქტივობა ჯანმრთელობის ერთ-ერთი უმნიშვნელოვანესი მაჩვენებელია

ნაჩვენებია, რომ ტარებადი მოწყობილობით მიღებული ნაბიჯების რაოდენობის მონაცემები პროგნოზირებს, რომელი პაციენტები მოხვდებიან საავადმყოფოში მომდევნო კვირებში.

კალიფორნიის უნივერსიტეტის რადიაციული ონკოლოგიისა და ჯანმრთელობის მეცნიერებების მიმართულების (UCSF) წარმომადგენელმა, ავტორმა Julian Hong-მა განაცხადა: „თუ პაციენტის დაუგეგმავი ჰოსპიტალიზაციის რისკის პროგნოზირება შეგიძლიათ, კიბოს მკურნალობის შეცვლით გადაუდებელ განყოფილებაში ან საავადმყოფოში მოხვედრის ალბათობის შემცირებაც შეგიძლიათ.“

კვლევა 24 ოქტომბერს ამერიკის რადიაციული ონკოლოგიის საზოგადოების (ASTRO) 2022 წლის ყოველწლიურ შეხვედრაზე წარადგინეს.

UCSF-ის კლინიკურ მონაცემთა მეცნიერმა Izzy Friesner-მა განაცხადა: „როდესაც სულ უფრო მეტი ადამიანი იწყებს ტარებადი მოწყობილობების გამოყენებას, ჩნდება კითხვა, სასარგებლო იქნება თუ არა შეგროვებული მონაცემები. ჩვენი კვლევა აჩვენებს, რომ ღირებულია, როცა პაციენტები ყოველდღიური ცხოვრებისას საკუთარ ჯანმრთელობის მონაცემებს აგროვებენ; შემდეგ ამ მონაცემების გამოყენება მათი ჯანმრთელობის მდგომარეობის მონიტორინგისა და პროგნოზირებისთვის შეგვიძლია“

„პაციენტის საკუთარი მოწყობილობიდან მიღებული მონაცემების უპირატესობა ისაა, რომ მოწყობილობის გამოყენება კლინიკის გარეთ, სახლში ყოფნისას ან ყოველდღიურ ცხოვრებაშია შესაძლებელი. თუმცა რეალურ პირობებში ტარებადი მოწყობილობების მონაცემებთან მუშაობის ერთ-ერთი სირთულეა ეკონომიკური და რასობრივი განსხვავებები, რომლებიც ასეთი მოწყობილობის ფლობაზე მოქმედებს.“ — დასძინა მან.

კვლევის დეტალები

კვლევისთვის გუნდმა სამი პროსპექტული (წინმსწრები) კლინიკური კვლევის მონაწილე კიბოს მქონე 124 პაციენტის მონაცემები შეაგროვა.

კვლევაში ჩაერთნენ სხვადასხვა კიბოს, მათ შორის თავისა და კისრის კიბოს (30%) და ფილტვის კიბოს (29%) მქონე პაციენტები, რომლებიც რამდენიმე კვირის განმავლობაში ატარებდნენ აქტივობის აღმრიცხველ მოწყობილობებს.

გუნდმა პაციენტების 70% შემთხვევითად სასწავლო ჯგუფს მიაკუთვნა, ხოლო დარჩენილი 30% — მოცდის ჯგუფს. ნაბიჯების რაოდენობის გარდა, ასაკის, ECOG ფუნქციური სტატუსის, კიბოს ტიპისა და კლინიკური მახასიათებლების მსგავსი მწვავე მოვლენის პოტენციური პროგნოზული ნიშნების შესახებ მათ ბევრი ინფორმაცია შეაგროვეს.

გამოითვალა ყოველდღიური ნაბიჯების რაოდენობის 3-დღიანი საშუალო. პირველი ჰოსპიტალიზაციიდან 1 კვირით ადრე განისაზღვრა პროგნოზის ფანჯარა, შემდეგ კი შეგროვდა 2 კვირით ადრე არსებული ნაბიჯების მონაცემები.

კვლევა ერთი კვირის შემდეგ ჰოსპიტალიზაციას ძლიერად პროგნოზირებდა.

ავტორმა Julian Hong-მა განაცხადა: „ნაბიჯების რაოდენობა სხვა საყოველთაოდ ცნობილ კლინიკურ ცვლადებზე უფრო პროგნოზული აღმოჩნდა.“

„ნაბიჯების რაოდენობის დინამიკური ბუნება, მისი ყოველდღიური ცვლილება, როგორც ჩანს, პაციენტის ჯანმრთელობის მდგომარეობის კარგ მაჩვენებლად აქცევს.“ — დასძინა მან.

ჰოსპიტალიზაციის ყველაზე ძლიერი პროგნოზული ნიშნები იყო წინა 2 დღის ნაბიჯების რაოდენობა და კვირის მაქსიმალური ნაბიჯების რაოდენობის ფარდობითი ცვლილება.

გუნდის მიერ შექმნილი მოდელი შემდეგ ცდაში გამოიცდება: ფილტვის კიბოსთვის ქიმიო-სხივური თერაპიის მიმღები პაციენტები შემთხვევითად გადანაწილდებიან მკურნალობაზე ყოველდღიური ნაბიჯების მონიტორინგით ან მის გარეშე.