რა არის ქიმიორადიოთერაპია და როდის არის საჭირო?
ამ სტატიაში
რა არის ქიმიორადიოთერაპია?
ქიმიორადიოთერაპია შეიძლება განისაზღვროს როგორც ქიმიოთერაპიის და რადიოთერაპიის ერთობლივი გამოყენებით ჩატარებული მკურნალობა.
ქიმიორადიოთერაპია ყველაზე ხშირად შემდეგი კიბოების დროს ტარდება:
- ადგილობრივად გავრცელებული საყლაპავის კიბო,
- მე-2 და მე-3 სტადიის ფილტვის კიბო,
- ცერვიქსის (საშვილოსნოს ყელის) კიბო,
- თავის ტვინის სიმსივნე (GBM) — ოპერაციის შემდგომი ადიუვანტური (დამცავი) მკურნალობა,
- თავისა და კისრის კიბოები.
ქიმიორადიოთერაპიისას:
- ქიმიოთერაპია კიბოს უჯრედების გასანადგურებლად კიბოს საწინააღმდეგო (ციტოტოქსიკურ) პრეპარატებს იყენებს. პრეპარატები სისხლის მიმოქცევის საშუალებით მთელ სხეულში ცირკულირებს.
- რადიოთერაპია კიბოს უჯრედების სამკურნალოდ მაღალი ენერგიის რენტგენის X-სხივებს იყენებს.
ამ მკურნალობების ერთობლივმა ჩატარებამ ზოგიერთი ადრეული სტადიის ან ადგილობრივად გავრცელებული კიბოს დროს შეიძლება განკურნება (სრული გამოჯანმრთელება) უზრუნველყოს.
განკურნების (სრული გამოჯანმრთელების) მიზნით ჩატარებულ ქიმიორადიოთერაპიას დეფინიტიური (კურაციული) მკურნალობა ეწოდება. ქიმიორადიოთერაპია მხოლოდ დეფინიტიური (ანუ სრული გამოჯანმრთელების) მიზნით არ ტარდება; ზოგჯერ მას ნეოადიუვანტური (ოპერაციისთვის მომზადების, ოპერაციამდე სიმსივნის შემცირების) მიზნით ატარებენ; ამ შემთხვევაში დასხივების დოზები განსხვავდება.
როდის არის საჭირო ქიმიორადიოთერაპია?
მკურნალობის გეგმა დამოკიდებულია როგორც კიბოს ზომაზე, სტადიასა და სახეობაზე (ადენოკარცინომა ან ბრტყელუჯრედოვანი კიბო), ისე ადამიანის ზოგადი ჯანმრთელობის მდგომარეობაზე.
- ქიმიორადიოთერაპია როგორც თქვენი ძირითადი მკურნალობა: თუ ადამიანს, მაგალითად, ადგილობრივად გავრცელებული ბრტყელუჯრედოვანი საყლაპავის კიბო აქვს, ოპერაციის ნაცვლად შეიძლება ქიმიორადიოთერაპია ჩაუტარდეს (დეფინიტიური მკურნალობა). მკურნალობის შემდეგ პაციენტებს მჭიდროდ აკვირდებიან (აქტიური მეთვალყურეობა).
- ოპერაციამდელი ქიმიორადიოთერაპია: თუ ადამიანს აქვს ადენოკარცინომა ან ბრტყელუჯრედოვანი კიბო, რომელიც სხეულის სხვა უბნებში არ გავრცელებულა, ოპერაციამდე შეიძლება ქიმიორადიოთერაპია ჩაუტარდეს. ამ მიდგომას, რომელიც კიბოს ამცირებს და მის მოცილებას აადვილებს, ნეოადიუვანტური ქიმიორადიოთერაპია ეწოდება.
- ქიმიორადიოთერაპია ოპერაციის ნაცვლად: ქიმიორადიოთერაპია შეიძლება მაშინაც ურჩიონ, თუ ადამიანს ჯანმრთელობის სხვა პრობლემები აქვს, რომლებიც ოპერაციისთვის არასაკმარისად კარგ მდგომარეობაზე მიუთითებს, ან თუ ოპერაცია შეუძლებელია, რადგან კიბო ახლომდებარე ქსოვილებში იზრდება.
წყაროები
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.