საყლაპავის ბრტყელუჯრედოვან კიბოში ქიმიორადიოთერაპიაზე იმუნოთერაპიის დამატება სრული პასუხის მაჩვენებელს ზრდის

საყლაპავის ბრტყელუჯრედოვანი კარცინომის (ESCC) მკურნალობაში ოპერაციამდე იმუნოთერაპიისა და ქიმიორადიოთერაპიის გაერთიანება SCIENCE კვლევის წინასწარი შედეგებით იმედისმომცემი მიდგომაა.

სან-ფრანცისკოში 2025 წლის ASCO-ს კუჭ-ნაწლავის კიბოების სიმპოზიუმზე #ASCOGI25 წარდგენილმა 3 ფაზის კვლევამ აჩვენა, რომ PD-1 ინჰიბიტორის sintilimab-ის ქიმიორადიოთერაპიაზე დამატებამ ქირურგიული რისკის ზრდის გარეშე პათოლოგიური სრული პასუხი (pCR) 60%-მდე გაზარდა.

ნეოადიუვანტური ქიმიორადიოთერაპია ან ქიმიოთერაპია საყლაპავის ბრტყელუჯრედოვანი კიბოს სტანდარტული მკურნალობაა, თუმცა იმუნოთერაპიის ეპოქაში ოპტიმალური ნეოადიუვანტური (ოპერაციამდელი) სტრატეგია გაურკვეველი რჩება. კვლევის მიგნებებით, sintilimab-ის დამატებამ ნეოადიუვანტურ ქიმიორადიოთერაპიაზე pCR 47%-დან 60%-მდე გაზარდა და მომავალში ეს რეჟიმი შეიძლება სტანდარტული მოვლა გახდეს.

SCIENCE კვლევა

SCIENCE კვლევაში 2022 წლის ნოემბრიდან 2024 წლის ივნისამდე ჩინეთის ოთხ მაღალდატვირთულ ცენტრში 146 პაციენტი ჩაერთო.

პაციენტებს ჰქონდათ kT1N2-3M0 ან kT2-4aN0-3M0 სტადიის, ადრე არანამკურნალები, საოპერაციოდ შესაფერისი, ადგილობრივად შორსწასული გულმკერდის საყლაპავის ბრტყელუჯრედოვანი კიბო (ESCC) (იხილეთ საყლაპავის კიბოს სტადიები დეტალურად).

პაციენტები შემთხვევითად განაწილდნენ ნეოადიუვანტური მკურნალობის სამ ჯგუფში:

• ჯგუფი A: Sintilimab + ქიმიოთერაპია (nab-პაკლიტაქსელი და კარბოპლატინი).
• ჯგუფი B: Sintilimab + ერთდროული ქიმიორადიოთერაპია (nab-პაკლიტაქსელი, კარბოპლატინი და 41,4 Gy რადიოთერაპია).
• ჯგუფი C: ერთდროული ქიმიორადიოთერაპია (sintilimab-ის გარეშე).

ყველა პაციენტს ოპერაცია ნეოადიუვანტური მკურნალობის დასრულებიდან 6-8 კვირაში ჩაუტარდა.

შენიშვნა: Sintilimab ჩინეთში ზოგი კიბოს სამკურნალოდ დამტკიცებულია, თუმცა აშშ-ში ნებართვა ჯერ არ აქვს. ის ჩინურმა ბიოტექნოლოგიურმა კომპანიამ Innovent Biologics შეიმუშავა. საერთაშორისო თანამშრომლობის ფარგლებში ასევე ჩატარდა ერთობლივი სამუშაოები Eli Lilly and Company -სთან.

როგორ მოქმედებს Sintilimab პასუხის მაჩვენებელზე?

კვლევის პირველადი საბოლოო წერტილი იყო პათოლოგიური სრული პასუხი (pCR). შედეგები:

• ჯგუფი A: 13%
• ჯგუფი B: 60%
• ჯგუფი C: 47,3%

ქიმიორადიოთერაპიაზე sintilimab-ის დამატებამ (ჯგუფი B), ქიმიოთერაპიასთან კომბინაციის ჯგუფთან (A) შედარებით, 47%-ით მაღალი pCR უზრუნველყო (OR: 10,0, P < 0,0001). ჯგუფი C ჯგუფ A-ზე უკეთესი იყო 34,2%-იანი სხვაობით (OR: 6,0, P = 0,0005).

მაღალი ეფექტიანობა ასე შეიძლება აიხსნას:

რადიოთერაპია სიმსივნურ უჯრედებზე პირდაპირი ზემოქმედების გარდა, სიმსივნური ანტიგენების გათავისუფლებით იმუნურ აქტივაციას ზრდის. Sintilimab ამ მოქმედებას ავსებს და იმუნურ პასუხს აძლიერებს. ქიმიოთერაპია კი სიმსივნის მოცულობას ამცირებს და მიკროგარემოს უფრო იმუნოგენურს ხდის.

ქირურგიული და უსაფრთხოების შედეგები

ყველა პაციენტმა დაასრულა ნეოადიუვანტური მკურნალობა და გაიკეთა ოპერაცია. R0 რეზექცია 100%-ში მიიღწა. ოპერაციები, ძირითადად, მინიმალურად ინვაზიური ტექნიკით ჩატარდა (თორაკოსკოპიული და რობოტის დახმარებით McKeown-ის პროცედურები).

მკურნალობასთან დაკავშირებული გვერდითი ეფექტები:

• ჯგუფი A: 50%
• ჯგუფი B: 86,7%
• ჯგუფი C: 85,5%
• მძიმე გვერდითი ეფექტები (≥ 3. ხარისხი): ჯგუფი C (36,4%), ჯგუფი B (31,1%), ჯგუფი A (8,7%).

Sintilimab-ის დამატების ჯგუფში (B) ლიმფოპენიისა და ნეიტროპენიის მსგავსი ეფექტები უფრო დაბალი სიხშირით აღინიშნა.

კომენტარი

წინასწარი მიგნებები რეზექცირებადი ESCC-ის მკურნალობაში იმუნოთერაპიის ინტეგრაციის მნიშვნელოვან პოტენციალს აჩვენებს. თუმცა pCR-ის ზრდის გავლენა ხანგრძლივ გადარჩენაზე ჯერ გარკვეული არ არის.

SCIENCE კვლევის ხანგრძლივი გადარჩენის მონაცემები სტრატეგიის კლინიკური გავლენის დადგენაში გადამწყვეტი იქნება. pCR-სა და ხანგრძლივ გადარჩენას შორის ძლიერი კავშირის გათვალისწინებით ვარაუდობენ, რომ sintilimab-ით გაზრდილი pCR გადარჩენაზეც დადებითად შეიძლება აისახოს.

თუ შედეგები დადასტურდება, sintilimab-ის შემცველ რეჟიმს ESCC-ის ახალ სტანდარტად ქცევის პოტენციალი აქვს. მომავალი კვლევები პასუხის პროგნოზირებადი ბიომარკერების შექმნასა და მკურნალობის პერსონალიზაციაზეა მიმართული.

საბოლოოდ, SCIENCE აჩვენებს, როგორ შეიძლება იმუნოთერაპიამ ESCC-ის ნეოადიუვანტურ მკურნალობაში გარდამტეხი როლი შეასრულოს. მიგნებებმა შეიძლება პაციენტთა უფრო ფართო ჯგუფისთვის ეფექტიანი ვარიანტების განვითარება გახადოს შესაძლებელი.