Selpercatinib-მა ყველა RET-დადებითი კიბოსთვის FDA-ს ნებართვა მიიღო

სისტემური მკურნალობის დროს ან შემდეგ პროგრესირებული, ან კარგი ალტერნატიული მკურნალობის არმქონე, ადგილობრივად შორსწასული ან მეტასტაზური RET შერწყმის დადებითი მყარი (ორგანოდან/ქსოვილიდან წარმოშობილი) სიმსივნეების მქონე ზრდასრულებისთვის selpercatinib (Retevmo, Eli Lilly and Company) სახელწოდების წამალმა 2022 წლის 21 სექტემბერს FDA-ს (აშშ-ის სურსათისა და წამლების ადმინისტრაცია) დაჩქარებული ნებართვა მიიღო.

2020 წელს selpercatinib-ს RET-დადებითი ფილტვისა და ფარისებრი ჯირკვლის კიბოებისთვის FDA-ს დაჩქარებული ნებართვა ჰქონდა მიღებული; 21 სექტემბერს არაწვრილუჯრედოვანი ფილტვის კიბოსთვის ეს ჩვეულებრივ ნებართვად გადაიქცა. უახლესი ნებართვა წამლის გამოყენებას აფართოებს RET-დადებითი სიმსივნეების მრავალ ტიპზე, მათ შორის პანკრეასისა და კოლორექტულ კიბოზე.

რა არის RET შერწყმა?

RET გენი პროტოონკოგენია და უჯრედშიდა სიგნალიზაციაში მონაწილე ცილის წარმოქმნის ინსტრუქციას იძლევა. როგორც ჩანს, ეს ცილა საჭიროა სხვადასხვა ნერვული უჯრედის ნორმალური განვითარებისთვის, მათ შორის ნაწლავის ნერვებისა და ნერვული სისტემის იმ ნაწილისთვის (ავტონომიური ნერვული სისტემა), რომელიც გულისცემის მსგავს უნებლიე ფუნქციებს აკონტროლებს. RET ცილა ასევე აუცილებელია თირკმლის ნორმალური განვითარებისა და სპერმის წარმოქმნისთვის (სპერმატოგენეზი). RET გენის ფუნქციის დაკარგვის გამომწვევი მუტაციები Hirschsprung-ის დაავადების განვითარებას უკავშირდება; ამის საპირისპიროდ, გენისთვის განსხვავებული ფუნქციების მიმნიჭებელი მუტაციები ადამიანის სხვადასხვა კიბოს განვითარებასთანაა დაკავშირებული. RET შერწყმაც ერთ-ერთი ასეთი გენეტიკური ცვლილებაა. RET გენის ცვლილებები ფილტვის კიბოს მქონე პაციენტების დაახლოებით 1-2%-ში გვხვდება. ამგვარად, RET შერწყმა კიბოს სხვადასხვა ტიპში იშვიათად გამოვლენილი, კიბოს გამომწვევი გენეტიკური ცვლილებაა.

RET შერწყმამ პანკიბოს ბიომარკერებს შორის ადგილი დაიმკვიდრა

ყოველდღიურად იზრდება კიბოს წარმოშობის ორგანოსა თუ ქსოვილისგან დამოუკიდებელი მკურნალობის მაგალითები. ამ ნებართვამ დაადასტურა, რომ RET შერწყმა ორგანოსგან დამოუკიდებლად მკურნალობის განმსაზღვრელი გენეტიკური ბიომარკერებიდან ერთ-ერთი გახდა.

ნებართვა ეფუძნებოდა 1/2 ფაზის LIBRETTO-001 კვლევის მონაცემებს, რომელშიც RET შერწყმის დადებითი სიმსივნეების მქონე 41 პაციენტი შეფასდა. ოცდაჩვიდმეტ პაციენტს (90%) მანამდე სისტემური მკურნალობა ჰქონდა ჩატარებული და თითქმის მესამედს სისტემური მკურნალობის სამი ან მეტი ხაზი ჰქონდა მიღებული. კვლევის ეფექტიანობის ძირითადი მაჩვენებლები იყო საერთო პასუხის სიხშირე და პასუხის ხანგრძლივობა.

41 პაციენტში საერთო პასუხის სიხშირე 44% იყო და ამ პაციენტებში პასუხის ხანგრძლივობის მედიანა 24,5 თვეს შეადგენდა. გარდა ამისა, პაციენტების 67%-ში პასუხი სულ მცირე 6 თვე გაგრძელდა.

ეს ნებართვა ხაზს უსვამს სიმსივნის ტიპისგან დამოუკიდებელი მკურნალობის ვარიანტების ზრდას და სხვადასხვა ტიპის შორსწასული სიმსივნის მქონე პაციენტებისთვის რუტინული, ყოვლისმომცველი გენომური ტესტების მნიშვნელობას.

კვლევაში ყველაზე ხშირი კიბოები იყო პანკრეასის ადენოკარცინომა (27%), კოლორექტული კიბო (24%) და სანერწყვე ჯირკვლის კიბო (10%).

Selpercatinib-თან დაკავშირებული ყველაზე ხშირი გვერდითი მოვლენები იყო შეშუპება, დიარეა, დაღლილობა, პირის სიმშრალე, ჰიპერტენზია, მუცლის ტკივილი, შეკრულობა, გამონაყარი, გულისრევა და თავის ტკივილი.

სხეულის წონის მიხედვით selpercatinib-ის რეკომენდებული დოზაა 50 კილოზე ნაკლები წონის პაციენტებისთვის პერორალურად 120 mg დღეში ორჯერ, ხოლო 50 კილო ან მეტი წონის პაციენტებისთვის — 160 mg დღეში ორჯერ.