RET-müsbət bütün xərçənglər üçün selpercatinib FDA təsdiqi aldı

Sistemli müalicə zamanı və ya ondan sonra irəliləyən, yaxud yaxşı alternativ müalicəsi olmayan, yerli irəliləmiş və ya metastatik RET füzyonu-müsbət bərk (orqan/toxuma mənşəli) şişləri olan yetkinlər üçün selpercatinib (Retevmo, Eli Lilly and Company) adlı dərman 21 sentyabr 2022-ci ildə FDA-nın (ABŞ Qida və Dərman İdarəsi) sürətləndirilmiş təsdiqini aldı.

2020-ci ildə selpercatinib RET-müsbət ağciyər və qalxanabənzər vəz xərçəngləri üçün sürətləndirilmiş FDA təsdiqi almışdı; bu təsdiq 21 sentyabrda kiçik hüceyrəli olmayan ağciyər xərçəngi üçün adi təsdiqə çevrildi. Son təsdiq dərmanın istifadəsini mədəaltı vəzi və kolorektal xərçənglər də daxil olmaqla bir sıra RET-müsbət şiş növlərinə genişləndirir.

RET füzyonu nədir?

RET geni protoonkogendir və hüceyrədaxili siqnallaşmada iştirak edən zülalın istehsalı üçün təlimat verir. Bu zülal bağırsaqdakı sinirlər və ürək sürəti kimi qeyri-iradi bədən funksiyalarını idarə edən sinir sistemi hissəsi (avtonom sinir sistemi) daxil olmaqla müxtəlif sinir hüceyrələrinin normal inkişafı üçün lazım görünür. RET zülalı böyrəklərin normal inkişafı və sperm istehsalı (spermatogenez) üçün də lazımdır. RET geninin funksiyasını itirməsinə səbəb olan mutasiyalar Hirschsprung xəstəliyinin inkişafı ilə, genə fərqli funksiyalar qazandıran mutasiyalar isə müxtəlif insan xərçənglərinin yaranması ilə əlaqəlidir. RET füzyonu da bu genetik dəyişikliklərdən biridir. RET geni dəyişiklikləri ağciyər xərçəngi xəstələrinin təxminən 1-2%-sində görülür. Nəticə etibarilə RET füzyonu müxtəlif xərçəng növlərində nadir rast gəlinən, xərçəngi başladan genetik dəyişiklikdir.

RET füzyonu pan-xərçəng biomarkerləri arasında yerini aldı

Xərçənglərin yarandığı orqan və toxumadan asılı olmadan müalicə edildiyi nümunələr hər gün artır. Bu təsdiqlə RET füzyonunun orqandan asılı olmayaraq müalicəni yönləndirən genetik biomarkerlərdən birinə çevrildiyi təsdiqləndi.

Təsdiq RET füzyonu-müsbət şişləri olan 41 xəstəni qiymətləndirən 1/2-ci faza LIBRETTO-001 tədqiqatının məlumatlarına əsaslanırdı. Otuz yeddi xəstə (90%) əvvəllər sistemli müalicə almışdı və təxminən üçdə biri üç və ya daha çox xətt sistemli müalicə keçmişdi. Əsas effektivlik meyarları ümumi cavab göstəricisi və cavab müddəti idi.

41 xəstədə ümumi cavab göstəricisi 44%, median cavab müddəti isə 24,5 ay idi. Bundan əlavə, xəstələrin 67%-sində cavab ən azı 6 ay davam etdi.

Bu təsdiq şiş növündən asılı olmayan müalicə seçimlərinin artdığını göstərir və çox müxtəlif şişləri olan irəliləmiş mərhələ xəstələrdə müntəzəm geniş genomik testlərin əhəmiyyətini vurğulayır.

Araşdırmada ən çox rast gəlinən xərçənglər mədəaltı vəzi adenokarsinoması (27%), kolorektal xərçəng (24%) və tüpürcək vəzi xərçəngi (10%) idi.

Selpercatiniblə əlaqəli ən çox görülən yan təsirlər ödem, ishal, yorğunluq, ağız quruluğu, hipertoniya, qarın ağrısı, qəbizlik, səpgi, ürəkbulanma və baş ağrısı idi.

Bədən çəkisinə əsaslanan tövsiyə olunan selpercatinib dozası çəkisi 50 kilodan az xəstələr üçün ağızdan gündə iki dəfə 120 mg, 50 kilo və daha çox olanlar üçün isə gündə iki dəfə 160 mg-dır.