შესაძლებელია ოფლიანობით ორგანიზმიდან ტოქსინების გამოდევნა?

ბევრს ჰგონია, რომ ოფლიანობით ორგანიზმიდან ტოქსინები (მავნე ნივთიერებები) გამოიყოფა; სპორტით, ფიზიკური შრომით ან საუნით ბევრი ოფლის გამოყოფა შეგვიძლია. თუმცა ნამდვილად შეიძლება ოფლით ტოქსინების გამოდევნა?

რატომ მიაჩნიათ ოფლიანობა ტოქსინების გამოდევნის საუკეთესო გზად?

ამ მტკიცების მომხრეთა თანახმად, გარემოში ბევრი ვერცხლისწყალი, კადმიუმი და დარიშხანია, ხოლო ფთალატისა თუ ბისფენოლ-A-ს მსგავსი ენდოკრინული დამრღვევები სისხლსა და შარდში შეიძლება გვქონდეს.

მტკიცებები

1. მიიჩნევა, რომ ოფლიანობა ფთალატების გამოდევნაში გვეხმარება
   ფთალატები პლასტმასის სათამაშოების, სამზარეულოს ნივთების, სუნამოების, ფრჩხილის ლაქის, კოსმეტიკისა და საღებავების წარმოებაში გამოიყენება. კანადელმა მკვლევრებმა 20 ადამიანის სისხლში, შარდსა და ოფლში ფთალატები შეისწავლეს და დაასკვნეს, რომ ოფლში მათი რაოდენობა შარდთან შედარებით თითქმის ორჯერ მეტია; ამან მიიყვანა აზრამდე, რომ ოფლი ამ ქიმიური ტოქსინების გამოდევნაში უკეთესია.
2. ოფლიანობა BPA-ს მოცილებას შეიძლება დაეხმაროს
   ბისფენოლი A ფართოდ გამოიყენება გამჭვირვალე პლასტმასის, POS ქვითრების, წყლის მილების, ელექტრონიკისა და სათვალის ლინზების წარმოებაში. წლებია მიიჩნევა, რომ მას ესტროგენის მსგავსი თვისებები აქვს და ზემოქმედებამ შეიძლება სიმსუქნე, ნაადრევი მომწიფება, სქესობრივი დარღვევა და ორსულობის შეწყვეტა გამოიწვიოს. ერთ კვლევაში მონაწილეთა %80-ის ოფლში BPA იყო, სისხლსა და შარდში კი საერთოდ არ იყო, რამაც ოფლით BPA-ს გამოდევნის მოსაზრება წარმოშვა.
3. ოფლიანობა მძიმე მეტალების გამოდევნაში შეიძლება დაგვეხმაროს
   დარიშხანი, კადმიუმი, ვერცხლისწყალი და ტყვია განსაზღვრულია როგორც კანცეროგენული მეტალები და ადამიანის ორგანიზმისთვის ყოველგვარად საზიანოა. ცნობილია გულის, ტვინის, თირკმლისა და იმუნური სისტემის დაზიანება. მძიმე მეტალები წყალში, საკვებში, სიგარეტსა და სამრეწველო გამონაბოლქვშია. ამ მტკიცებით, სისხლთან შედარებით ოფლს დარიშხანის 10-ჯერ, კადმიუმის 25-ჯერ, ტყვიის 300-ჯერ და ვერცხლისწყლის გაცილებით უფრო კონცენტრირებულად გამოყოფა შეუძლია.

რომაული და თურქული აბანოები, აბორიგენთა საოფლე თავშესაფრები და სკანდინავიური საუნები თერაპიად გამოიყენებოდა. ახლახან გაჩნდა ინფრაწითელი საუნები, რომლებიც ტრადიციულზე გრილია და მიიჩნევა, რომ კანში უფრო ღრმად შეღწევით ოფლიანობასა და ტოქსინების გამოყოფას უკეთ ასტიმულირებს.

ჯანსაღი ცხოვრება ტოქსინების მიღებისა და გამოყოფის დაბალანსების შედეგია. ამიტომ ტოქსინების წყაროებთან ერთად მათი გამოდევნის ხელშემწყობ პროცესებზეც ინფორმაცია უნდა გვქონდეს.

ფაქტები

რამდენად მართალია ეს მოსაზრებები და რამდენად განზოგადებადია ზემოთ მცირე კვლევების შედეგები? გარდა ამისა, არის ოფლიანობის ფიზიოლოგიური ფუნქცია და მიზანი ტოქსინების გამოყოფა?

არა, ოფლიანობა გაგრილების საშუალებაა. რა თქმა უნდა, ოფლიანობა — განსაკუთრებით ფიზიკურ აქტივობასთან ერთად — შვებას ქმნის, თუმცა მისი მიზეზი საეჭვო ტოქსინების გამოდევნის მიღმა უნდა ვეძებოთ. ფიზიკური აქტივობისას ენდორფინის მსგავსი ბედნიერების ჰორმონები გამოიყოფა და ეს გახარებთ. თავს შეიძლება კარგად გრძნობდეთ, თუმცა ეს ტოქსინების გამოდევნას არ ნიშნავს.

თუ ოფლი ტოქსინებისგან არ შედგება, რისგან შედგება?

ოფლიანობა ორგანიზმის ერთგვარი კონდიციონერია. მთავარი მიზანი სხეულის ტემპერატურის დაბალანსებაა. შიდა ტემპერატურის მატებისას ორგანიზმი ოფლიანობით მას ამცირებს, ოფლის აორთქლება კი კანის ზედაპირს აგრილებს.

ოფლი %99-ით ნახშირწყლებისგან, მარილისგან, ცილისა და შარდოვანასგან შედგება. ტოქსინებისგან არ შედგება. პირიქით, საკმარისი წყლის/სითხის გარეშე სხეულის ტემპერატურის გაზრდა წყლისა და ტოქსინების გამოყოფის ნაცვლად მათ შეკავებას იწვევს. კანის ფორების ნაცვლად, ღვიძლი და თირკმლები ორგანიზმის ტოქსინებისგან გაწმენდაზე პასუხისმგებელია.

კვლევების მიხედვით, მავნე ნივთიერებები ძირითადად შარდითა და განავლით გამოიყოფა, ოფლით კი %1-ზე ნაკლები.

სხვაგვარად რომ ვთქვათ, სპორტდარბაზსა თუ საუნასთან შედარებით ტუალეტში მეტ დეტოქსს აკეთებთ. ამიტომ ვარჯიშსა და საუნას სარგებელი კი აქვს, თუმცა ტოქსინების გამოდევნის სახით დეტოქსი მათ შორის არ არის! ეს მხოლოდ მარკეტინგული დაპირებებია; საუნებიც ანალოგიურად დეტოქსს გპირდებათ.

ტოქსინების გამოდევნაში ოფლის წვლილი თითქმის არ არსებობს. ოფლიანობით გამოყოფილი ტოქსინები თითქმის ნულის ტოლია და ოფლიანობის მთავარი მიზანი სხეულის ტემპერატურის დაბალანსებაა.

ბევრი სითხის მიღება, ჯანსაღი კვება და ფიზიკური აქტიურობა, უპირველესად სისხლის მიმოქცევის, თირკმლების, ღვიძლისა და ნაწლავების მხარდაჭერით, განავლითა და შარდით ტოქსინების უკეთ გამოყოფას უზრუნველყოფს.

*

- სითხის სწორი მიღება სპორტისას