ტრემელიმუმაბისა და დურვალუმაბის ორმაგი იმუნოთერაპიის რეჟიმმა ფილტვის კიბოსთვის FDA-ის დამტკიცება მიიღო

მეტასტაზური, მე-4 სტადიის არაწვრილუჯრედოვანი ფილტვის კიბოს (KHDAK) მქონე ზრდასრული პაციენტებისთვის, რომელთაც EGFR ან ALK მუტაციები არ აქვთ, პლატინაზე დაფუძნებულ ქიმიოთერაპიასთან ერთად ტრემელიმუმაბისა (Imjudo, AstraZeneca) და დურვალუმაბის (Imfinzi, AstraZeneca) იმუნოთერაპიის კომბინაციამ 2022 წლის 10 ნოემბერს FDA-ის, აშშ-ის სურსათისა და წამლის ადმინისტრაციის, დამტკიცება მიიღო.

ტრემელიმუმაბისა და დურვალუმაბის კომბინაციისთვის FDA-ის მე-2 დამტკიცება

ეს არის ანტი-CTLA4 აგენტის, ტრემელიმუმაბისა და ანტი-PD-L1 აგენტის, დურვალუმაბის იმუნოთერაპიული კომბინაციისთვის FDA-ის მე-2 დამტკიცება. მანამდე, 2022 წლის ოქტომბერში, ამ კომბინაციამ ღვიძლის გავრცელებული კიბოსთვის დამტკიცება მიიღო.

KHDAK-ის პირველი ხაზის მკურნალობაში იმუნოთერაპია-ქიმიოთერაპიის მე-5 დამტკიცება

ეს იმუნოთერაპიისა და ქიმიოთერაპიის კომბინაცია FDA-ის დამტკიცებული მე-5 თერაპია გახდა გავრცელებული არაწვრილუჯრედოვანი ფილტვის კიბოს (KHDAK) პირველი ხაზის მკურნალობაში, PD-L1-ისგან დამოუკიდებლად. მანამდე პლატინაზე დაფუძნებულ ქიმიოთერაპიასთან ერთად ამ მდგომარეობის მქონე პაციენტების სამკურნალოდ დამტკიცდა „პემბროლიზუმაბი“, „ატეზოლიზუმაბი“, „ნივოლუმაბი-იპილიმუმაბი“ და „ცემიპლიმაბი“.

FDA-ის დამტკიცება POSEIDON კვლევის საფუძველზე

პლატინაზე დაფუძნებულ ქიმიოთერაპიასთან ერთად ტრემელიმუმაბისა და დურვალუმაბის ეფექტიანობა შეფასდა POSEIDON-ში, რანდომიზებულ (1:1:1), მრავალცენტრიან, აქტიურად კონტროლირებულ, ღია კვლევაში, მეტასტაზური KHDAK-ის მქონე პაციენტებში, რომლებსაც მანამდე სისტემური თერაპია არ ჰქონდათ მიღებული.

პაციენტები შემთხვევით განაწილდნენ მკურნალობის სამი ჯგუფიდან ერთ-ერთში:

1. ოთხი ციკლის განმავლობაში ტრემელიმუმაბი, დურვალუმაბი და პლატინაზე დაფუძნებული ქიმიოთერაპია, შემდეგ ყოველ 4 კვირაში დურვალუმაბი და შემანარჩუნებელი ქიმიოთერაპია. პაციენტებმა მე-16 კვირაში ტრემელიმუმაბის მეხუთე დოზა მიიღეს;
2. ოთხი ციკლის განმავლობაში დურვალუმაბი და პლატინაზე დაფუძნებული ქიმიოთერაპია, შემდეგ დურვალუმაბი და შემანარჩუნებელი ქიმიოთერაპია; ან
3. ექვსი ციკლის განმავლობაში პლატინაზე დაფუძნებული ქიმიოთერაპია, შემდეგ შემანარჩუნებელი ქიმიოთერაპია.

მკურნალობა გაგრძელდა დაავადების პროგრესიამდე, ანუ წინსვლამდე, ან მიუღებელ გვერდით მოვლენამდე. ეს დამტკიცება ეფუძნება მკურნალობის 1-ლი და მე-3 ჯგუფების, 675 პაციენტის, შედარებას.

ეფექტიანობის ძირითადი შესაფასებელი მაჩვენებლები იყო პროგრესირების გარეშე გადარჩენა და საერთო გადარჩენა.

შედეგები

ტრემელიმუმაბმა, დურვალუმაბმა და პლატინაზე დაფუძნებულმა ქიმიოთერაპიამ მხოლოდ პლატინაზე დაფუძნებულ ქიმიოთერაპიასთან შედარებით საერთო გადარჩენის სტატისტიკურად და კლინიკურად მნიშვნელოვანი გაუმჯობესება აჩვენა: სიკვდილის რისკის 23%-ით შემცირება (რისკების თანაფარდობა [HR] 0,77 [95% GA: 0,65, 0,92], 2-მხრივი p მნიშვნელობა = 0,00304).

საერთო გადარჩენის მედიანა კომბინირებული იმუნოთერაპიის ჯგუფში იყო 14 თვე (95% GA: 11,7, 16,1), ხოლო მხოლოდ ქიმიოთერაპიის ჯგუფში 11,7 თვე იყო (95% GA: 10,5, 13,1).

პროგრესირების გარეშე გადარჩენის მედიანა მკურნალობის ჯგუფებში, შესაბამისად, იყო 6,2 თვე (95% GA: 5,0, 6,5) და 4,8 თვე (95% GA 4,6, 5,8) (HR 0,72 [95% GA: 0,60, 0,86], 2-მხრივი p მნიშვნელობა = 0,00031).

საერთო პასუხის მაჩვენებელი მკურნალობის 1-ლ და მე-3 ჯგუფებში, შესაბამისად, იყო 39% (95% GA: 34,44) და 24% (95% GA: 20, 29). პასუხის ხანგრძლივობის მედიანა იმუნოთერაპიის ჯგუფში იყო 9,5 თვე (95% GA: 7,2, მიღწეული არ არის), ხოლო მეორე ჯგუფში 5,1 თვე (95% GA: 4,4, 6,0).

ყველაზე ხშირი გვერდითი მოვლენები, რომლებიც პაციენტთა ≥20%-ში განვითარდა, იყო გულისრევა, დაღლილობა, მადის დაქვეითება, კუნთოვან-ჩონჩხოვანი ტკივილი, გამონაყარი და დიარეა. მე-3 ან მე-4 ხარისხის ლაბორატორიული დარღვევები (≥10%) იყო ნეიტროპენია, ანემია, ლეიკოპენია, ლიმფოციტოპენია, ლიპაზის მომატება, ჰიპონატრიემია და თრომბოციტოპენია.

30 kg ან მეტი წონის მქონე პაციენტებისთვის რეკომენდებული დოზებია: მკურნალობის პირველი 4 ციკლის განმავლობაში ყოველ 3 კვირაში ტრემელიმუმაბი 75 mg, დურვალუმაბი 1500 mg IV და პლატინაზე დაფუძნებული ქიმიოთერაპია. შემდეგ ყოველ 4 კვირაში დურვალუმაბი 1500 mg შემანარჩუნებელ ქიმიოთერაპიასთან ერთად. ტრემელიმუმაბის მეხუთე დოზა, 75 mg, მე-16 კვირაში უნდა მიეცეს.

ზემოთ მოცემული სქემის შესაბამისად, 30 kg ან ნაკლები წონის პაციენტებისთვის ტრემელიმუმაბის რეკომენდებული დოზაა 1 mg/kg, ხოლო დურვალუმაბისა — 20 mg/kg.