ზრდის თუ არა ფერტილობისა და უშვილობის მკურნალობა და ტექნოლოგიები საკვერცხის კიბოს რისკს?

ფერტილობის (ნაყოფიერების) მკურნალობაევროპის ადამიანის რეპროდუქციისა და ემბრიოლოგიის საზოგადოების 35. ყოველწლიურ შეხვედრაზე Spaan-ისა და კოლეგების მიერ წარმოდგენილი ფართომასშტაბიანი მრავალცენტრული კვლევის შედეგებით, გრძელვადიანი საკვერცხის კიბოს რისკის მატებასთან დაკავშირებული არ არის!

ნიდერლანდების კიბოს ინსტიტუტის დოქტორანტ Mandy Spaan-ის მიერ წარმოდგენილმა მიგნებებმა აჩვენა, რომ დამხმარე რეპროდუქციული ტექნოლოგიით (assisted reproductive technology, ART) ნამკურნალებ ქალებს ზოგადი მოსახლეობის ქალებზე კიბოს განვითარების მეტი ალბათობა ჰქონდათ, თუმცა რისკი ამ ტექნოლოგიის არმიმღებ უშვილო ქალებზე მაღალი არ იყო. რას ნიშნავს ეს?

შენიშვნა: დამხმარე რეპროდუქციული ტექნოლოგია ძირითადად უშვილობისთვის გამოყენებული სამედიცინო პრაქტიკის ზოგადი სახელია. მოიცავს ისეთ პროცედურებს, როგორიცაა in vitro განაყოფიერება. შეიძლება შეიცავდეს სპერმატოზოიდის ინტრაციტოპლაზმურ ინექციას, გამეტების ან ემბრიონების გაყინვით შენახვას და / ან ფერტილობის წამლების გამოყენებას.

კვლევის მიგნებების კომენტირებისას Mandy Spaan-მა თქვა: "რისკის მატება სტატისტიკურად მნიშვნელოვანი არ არის და შეიძლება დამხმარე რეპროდუქციული ტექნოლოგიის გამოყენებითა და ნულიპარობით (შვილის არყოლით) იყოს გამოწვეული" (მაგალითად, შვილის არყოლა და ძუძუთი არკვება ძუძუს კიბოს ცნობილი რისკფაქტორია). Spaan-მა ასევე დაამატა, რომ დამხმარე რეპროდუქციული ტექნოლოგიით ნამკურნალებ ქალებში შვილის ყოლა „დამცავ ფაქტორად“ ჩანს. ანუ მთავარი საკითხი, როგორც ჩანს, ART-ის რისკის ნაცვლად შვილის არყოლის რისკია.

კვლევის დეტალები

ნიდერლანდების კიბოს ინსტიტუტის ეს კვლევა ჰოლანდიური OMEGA ჯგუფის მონაცემებს, მათ შორის სამედიცინო კითხვარებს, ეფუძნება. მკვლევრებმა 1983 და 2001 წლებს შორის სულ მცირე ერთი დასრულებული დამხმარე რეპროდუქციული ტექნოლოგიის (ART) ციკლის მქონე, ნიდერლანდების 12 in vitro განაყოფიერების ცენტრიდან (მედიანური ასაკი = მკურნალობის დასაწყისში 33 წელი), 30.625 ქალი გამოავლინეს. ART-ის არმიმღებ საკონტროლო ჯგუფში იყო ფერტილობის პრობლემების მქონე, მაგრამ 1980 და 2001 წლებს შორის ART მკურნალობის არმიმღები 9.988 ქალი.

მკვლევრებმა გაითვალისწინეს შემრევი ფაქტორებიც, როგორიცაა ენდომეტრიოზი, მკურნალობის დაწყების ასაკი, სხეულის მასის ინდექსი და ჩასახვის საწინააღმდეგო აბების გამოყენება. დაკვირვება ქალების 20-იანი ასაკიდან 50-იან ასაკამდე გაგრძელდა.

შედეგები

• 30 ათას ქალში სულ 158 საკვერცხის კიბოს შემთხვევა განვითარდა: ART ჯგუფში 118 და ART-ის არმიმღებ ჯგუფში 40.
• დიაგნოსტირდა 100 borderline (მოსაზღვრე) სიმსივნე: ART ჯგუფში 83, ART-ის არმიმღებ ჯგუფში 17).
• ART ჯგუფში ინციდენტობა (განსაზღვრულ დროში ახალი შემთხვევების რაოდენობა) ზოგად მოსახლეობასთან შედარებით როგორც კიბოსთვის, ისე მოსაზღვრე სიმსივნეებისთვის მაღალი იყო. საკვერცხის კიბოსთვის სტანდარტიზებული ინციდენტობის თანაფარდობა [SIR] ART ჯგუფში = 1.43, ART-ის არმიმღებ ჯგუფში კი 1.15 აღმოჩნდა. მოსაზღვრე სიმსივნეებისთვის ART ჯგუფში SIR = 2.20 იყო, ART-ის გარეშე ჯგუფში 1.84-ის წინააღმდეგ.
• კიბოს რისკი ყველაზე მაღალი მკურნალობიდან 15-დან 19 წლამდე პერიოდში იყო.

კვლევა დასკვნის სახით ვარაუდობს, რომ მშობიარობა საკვერცხის კიბოსგან დამცავი ფაქტორი შეიძლება იყოს. როგორც ART, ისე მის არმიმღებ ჯგუფებში ნულიპარული (არასოდეს ნამშობიარები) ქალების საკვერცხის კიბოს რისკი ნამშობიარებზე მაღალი იყო. ეს მოსაზღვრე სიმსივნეებისთვისაც მოქმედებდა.