Böyrək xərçəngi əməliyyatından sonra qoruyucu immunoterapiya FDA təsdiqi aldı

17 noyabr 2021-ci ildə FDA (ABŞ Qida və Dərman İdarəsi) əməliyyatdan sonrakı təkrarlanma riski orta-yüksək olan renal hüceyrəli karsinomanın (böyrək xərçəngi) adyuvant müalicəsi üçün pembrolizumab (Keytruda, Merck) immunoterapiya dərmanını təsdiqlədi. Beləliklə böyrək xərçənginin əməliyyatsonrası adyuvant (qoruyucu) müalicəsi üçün ilk dəfə immunoterapiya dərmanı FDA təsdiqi aldı.
Böyrək xərçəngində əməliyyat və qoruyucu immunoterapiya – faydası nədir? Kimə uyğundur?
Böyrək xərçənginin adyuvant müalicəsində 2021-ci ilədək təsdiqli yeganə dərman sunitinib idi. Lakin çoxsaylı yan təsirlər və qeyri-kafi sağqalım nəticələri klinikada gözlənilən istifadə səviyyəsinə çatmasına mane oldu.
Əməliyyat və sonrakı müalicə barədə ətraflı məlumatı aşağıdakı videomuzdan ala bilərsiniz:
Böyrək xərçəngində adyuvant müalicə
İndiyədək əməliyyatsonrası adyuvant müalicədə yeganə FDA-təsdiqli dərman 2017-də təsdiq alan sunitinib idi (baxın əlaqəli təsdiq). Lakin sunutinib ehtimalən çox yan təsir, həyat keyfiyyəti artımının olmaması və qənaətbəxş olmayan sağqalım səbəbindən istənilən istifadəyə çatmadı. ABŞ FDA təsdiqinə baxmayaraq sunitinib Avropa Dərman Agentliyinin (EMA) adyuvant təsdiqini almayıb və aşağı fayda-risk nisbətinə görə klinik istifadəsi məhduddur.
1980-ci illərdən böyrək xərçənginin potensial adyuvant müalicələri üzrə çoxsaylı tədqiqat aparılıb
Erkən və/və ya yerli irəliləmiş böyrək xərçəngi üçün standart müalicə qismən və ya tam nefrektomiyadır; lakin xəstələrin təxminən yarısında əməliyyatdan sonra xərçəng residivi olur. Bu təsdiqlə ilk dəfə şişi cərrahi çıxarılmış, təkrarlanma riski yüksək renal hüceyrəli karsinoma xəstələrinə təsirli adyuvant immunoterapiya seçimimiz var.
KEYNOTE-564 tədqiqatından gələn FDA təsdiqi
Böyrək xərçəngi müalicəsində yeni dövr başladı
Pembrolizumabın effektivliyi residiv riski orta-yüksək və ya yüksək, yaxud xəstəlik sübutu olmayan M1 böyrək xərçəngli 994 xəstənin çoxmərkəzli, randomizə (1:1), ikiqat kor, plasebo nəzarətli tədqiqatı olan KEYNOTE-564-də qiymətləndirildi. Xəstələr residivə və ya qəbuledilməz toksikliyə qədər 1 ilədək hər 3 həftədə venadaxili 200 mg pembrolizumab və ya plaseboya randomizə edildi.
Əsas effektivlik ölçüsü residiv, metastaz və ya ölümədək vaxt kimi müəyyən edilmiş, tədqiqatçının qiymətləndirdiyi xəstəliksiz sağqalım idi. Əlavə ölçü ümumi sağqalım idi.
Nəticələr
- Pembrolizumab qolunda 109 (%22) və plaseboda 151 (%30) hadisə ilə əvvəlcədən müəyyən aralıq analizdə xəstəliksiz sağqalımda statistik əhəmiyyətli yaxşılaşma göstərildi (HR 0.68; %95 GA: 0.53, 0.87; p=0,0010). Yəni immunoterapiya xəstəliksiz sağqalım ehtimalını %32 artırdı.
- Hər iki qolda median xəstəliksiz sağqalım müddətinə çatılmadı.
- Xəstəliksiz sağqalım analizi zamanı ümumi sağqalım məlumatları yetişməmişdi.
Ən çox (≥%20) mənfi reaksiyalar əzələ-skelet ağrısı, yorğunluq, səpgi, ishal, qaşınma və hipotireozdur.
Tövsiyə olunan pembrolizumab dozası residivə, qəbuledilməz toksikliyə və ya 12 ayadək hər 3 həftədə 200 mg və ya hər 6 həftədə 400 mg-dır.
Mənbələr
Bu məqalə sizə faydalı oldu?
Rəyiniz məzmunumuzu yaxşılaşdırmağa kömək edir.





Oxucu şərhləri
Şərhinizi paylaşın
Adınız və şərhiniz yalnız administrator təsdiqindən sonra dərc olunur. E-poçt ünvanınız ziyarətçilərə heç vaxt göstərilmir.
İlk şərhi siz yazın.