Böyrək xərçəngi əməliyyatından sonra qoruyucu müalicə ilk dəfə FDA təsdiqi aldı

16 noyabr 2017-ci ildə Amerika Qida və Dərman İdarəsi FDA böyrəyin əməliyyatla çıxarılmasından (nefrektomiya) sonra təkrarlanma riski yüksək renal hüceyrəli karsinoma (böyrək xərçənginin ən yayğın növü) olan yetkin xəstələrin adyuvant (qoruyucu) müalicəsi üçün sunitinib malatı (ticarət adı Sutent) təsdiqlədi.

Sunitinib malat xərçəng hüceyrəsinin çoxalmasını təmin edən çoxlu fermenti bloklayan kinaza inhibitorudur. Bəzi qastrointestinal (mədə-bağırsaq sistemi) stromal şişlər və 4-cü mərhələ renal hüceyrəli karsinomaların və müəyyən pankreas xərçəngi növlərinin müalicəsi üçün ilk dəfə 2006-cı ildə təsdiqlənmişdi.

Adyuvant müalicə əsas müalicədən (məsələn, əməliyyat) sonra xərçəngin təkrarlanma ehtimalını azaltmaq üçün verilir. Görüntüləmə ilə aşkarlanmayacaq qədər kiçik mikrometastazları və xərçəng hüceyrələrini öldürmək hədəflənir.

Sunitinibin adyuvant istifadəsinin təsdiqi nefrektomiyadan sonra yüksək təkrarlanma riskli 615 böyrək xərçəngi xəstəsinin daxil olduğu çoxmərkəzli, beynəlxalq, ikiqat kor, plasebo nəzarətli klinik tədqiqata (S-TRAC) əsaslanmışdır. Xəstələr 4 həftə gündə bir dəfə sunitinib malat və ya plasebo (aktiv maddəsiz dərman) almış, sonrakı 2 həftə fasilə vermişlər.

Sunitinib malatla plasebo müqayisəsində median xəstəliksiz sağqalım sunitinib qolunda 6.8 il, plasebo qolunda 5.6 ildir. Xəstəliksiz sağqalım təhlili zamanı ümumi sağqalım məlumatları hələ yetişməmişdi. Sunitinib malatın ən çox görülən yan təsirləri halsızlıq, yorğunluq, ishal, ağızdaxili yaralar, ürəkbulanma, iştahasızlıq, ciddi çəki itkisi, qusma, qarın ağrısı, əl-ayaqda səpgilər, yüksək qan təzyiqi, qanaxma, dadbilmə dəyişikliyi, həzmsizlik və trombositlərin azalmasıdır. Dərmanın təlimatında səhiyyə işçiləri və xəstələr üçün ciddi qaraciyər zədəsi yaradaraq qaraciyər çatışmazlığına və ya ölümə səbəb ola biləcəyi xəbərdarlığı da var.

Renal hüceyrəli karsinomada cərrahiyyədən sonra sunitinibin dozası gündə bir dəfə ac və ya tox qəbul edilən 50 mg-dır. Müalicə 4 həftə davam edir, 2 həftə fasilə verilir. 6 həftəlik dövr bir kursdur, ümumi müalicə 9 kursdur.

Əlaqəli mövzu:

• Renal hüceyrəli karsinomanın növləri hansılardır?