თირკმლის კიბოს ოპერაციის შემდეგ დამცავმა მკურნალობამ პირველად მიიღო FDA-ის თანხმობა
16 ნოემბერს 2017 წელს ამერიკის სურსათისა და წამლის ადმინისტრაციამ FDA-მ სუნიტინიბის მალატი (სავაჭრო სახელწოდება Sutent) დაამტკიცა ადიუვანტური (დამცავი) მკურნალობისთვის თირკმლის ქირურგიული ამოკვეთის (ნეფრექტომიის) შემდეგ რეციდივის მაღალი რისკის მქონე ზრდასრულებში, რომლებსაც თირკმელუჯრედოვანი კარცინომა აქვთ (თირკმლის კიბოს ყველაზე ხშირი სახეობა).
სუნიტინიბის მალატი კინაზის ინჰიბიტორია, რომელიც კიბოს უჯრედის გამრავლების ხელშემწყობი მრავალი ფერმენტის ბლოკირებით მოქმედებს. სუნიტინიბის მალატი ზოგიერთი გასტროინტესტინური (კუჭ-ნაწლავის სისტემის) სტრომული სიმსივნისა და 4. სტადიის თირკმელუჯრედოვანი კარცინომების, ასევე პანკრეასის კიბოს ზოგიერთი ტიპის სამკურნალოდ პირველად 2006 წელს დამტკიცდა.
ადიუვანტური მკურნალობა ძირითადი მკურნალობის (მაგალითად, ოპერაციის) შემდეგ კიბოს განმეორების ალბათობის შესამცირებლად ტარდება. მისი მიზანია მიკრომეტასტაზებისა და კიბოს უჯრედების განადგურება, რომლებიც იმდენად მცირეა, რომ გამოსახულებითი მეთოდებით ვერ ვლინდება.
სუნიტინიბის ადიუვანტურ მკურნალობაში გამოყენების დამტკიცება დაეყრდნო მრავალცენტრულ, საერთაშორისო, ორმაგად ბრმა, პლაცებოკონტროლირებად კვლევას, რომელშიც ნეფრექტომიის შემდეგ რეციდივის მაღალი რისკის მქონე თირკმლის კიბოს 615 პაციენტი ჩაერთო — კლინიკურ კვლევას (S-TRAC). პაციენტები 4 კვირის განმავლობაში დღეში ერთხელ იღებდნენ სუნიტინიბის მალატს ან პლაცებოს (აქტიური ნივთიერების არმქონე წამალს), მომდევნო 2 კვირის განმავლობაში კი მკურნალობას წყვეტდნენ.
სუნიტინიბის მალატისა და პლაცებოს მიმღები პაციენტების შედარებისას დაავადების გარეშე გადარჩენის მედიანა სუნიტინიბის ჯგუფში 6.8 წელი იყო, პლაცებოს ჯგუფში კი — 5.6 წელი. დაავადების გარეშე გადარჩენის ანალიზის დროს საერთო გადარჩენის მონაცემები ჯერ არ იყო მომწიფებული. სუნიტინიბის მალატის ყველაზე ხშირი გვერდითი ეფექტებია სისუსტე, დაღლილობა, დიარეა, პირის ღრუს წყლულები, გულისრევა, უმადობა, წონის მკვეთრი კლება, ღებინება, მუცლის ტკივილი, ხელებსა და ფეხებზე გამონაყარი, მაღალი არტერიული წნევა, სისხლდენა, გემოს ცვლილება, მოუნელებლობა და თრომბოციტების შემცირება. წამლის ეტიკეტზე სამედიცინო პერსონალისა და პაციენტებისთვის ასევე მითითებულია გაფრთხილება, რომ მას შეუძლია ღვიძლის მძიმე დაზიანება გამოიწვიოს, რასაც ღვიძლის უკმარისობა ან სიკვდილი შეიძლება მოჰყვეს.
თირკმელუჯრედოვანი კარცინომის ოპერაციის შემდეგ სუნიტინიბის დოზა არის 50 mg დღეში ერთხელ, საკვებთან ერთად ან უზმოზე. მკურნალობა გრძელდება 4 კვირა, შემდეგ კი კეთდება 2-კვირიანი შესვენება. 6-კვირიანი ციკლი ერთ კურსს შეადგენს, ხოლო მკურნალობის საერთო ხანგრძლივობა 9 კურსია.
დაკავშირებული თემა:
წყაროები
fda.gov
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.