Siqaret çəkmək döş xərçəngi riskini artırırmı?

Amerika Xərçəng Cəmiyyətininictimaiyyətlə paylaşdığı yeni bir araşdırma siqaret çəkən gənc qadınlarda bəzi geniş yayılmış döş xərçəngi növlərinə tutulma riskinin artdığını müşahidə etmişdir.

Ölkəmizdə qadınlar arasında ən çox rast gəlinən xərçəng növü olan döş xərçəngi qadınlara həm fiziki, həm də psixoloji cəhətdən təsir edir. Döş xərçəngi erkən diaqnoz qoyulduqda müalicə edilə bilən xərçəng növüdür. Döş xərçəngləri əsasən dörd müxtəlif alt qrupa bölünür. Gələcəkdə residiv riskini və müalicə seçimlərini müəyyən edən ən mühüm amillər xəstəliyin yayılma dərəcəsi (mərhələsi) və xəstəliyin alt qruplarıdır.

Məlum olduğu kimi, siqaret istifadəsi, xüsusilə ağciyər xərçəngi olmaqla, bir çox xərçəng növündə risk faktoru kimi tanınır. Bu günə qədər siqaret çəkmə ilə döş xərçəngi arasındakı əlaqəni araşdıran çoxsaylı tədqiqatlardan əldə edilən məlumatlar ziddiyyətli olmuşdur. Amerika Xərçəng Cəmiyyətinin ictimaiyyətlə paylaşdığı yeni bir araşdırma siqaret çəkən gənc qadınlarda bəzi geniş yayılmış döş xərçəngi növlərinə tutulma riskinin artdığını müşahidə etmişdir ki, bu nəticə elmi baxımdan ilkdir. Tədqiqatçıların apardığı araşdırmada, 20-44 yaşları arasında ən azı 10 il ərzində gündə bir qutu siqaret çəkən qadınlarda, daha az siqaret çəkən qadınlarla müqayisədə, qadınlıq hormonu (östrogen) reseptoru daşıyan, başqa sözlə, qadınlıq hormonuna həssas olan döş xərçəngi növünün inkişaf tezliyinin %60 daha çox olduğu müəyyən edilmişdir. Siqaret çəkən qadınlarda daha nadir rast gəlinən və daha aqressiv olan üçlü neqativ döş xərçənginin inkişaf riskinin isə daha az olduğu görülmüşdür. Bu məlumatlara əsasən, döş xərçəngi siqaretin sağlamlığımıza vurduğu başqa bir zərər kimi ortaya çıxır.

Bu istiqamətdə aparılan araşdırmada 2004-2010 illəri arasında döş xərçəngi diaqnozu qoyulmuş gənc qadınların məlumatları araşdırılmışdır. Bu qadınlardan 778 nəfərində irəliləmiş mərhələli ER-pozitiv (östrogen reseptoru pozitiv) döş xərçəngi olduğu müşahidə edilərkən, 182 nəfərində irəliləmiş mərhələli üçlü neqativ döş xərçəngi olduğu müəyyən edilmişdir. Bu araşdırmada xərçəngi olmayan 938 qadın nəzarət qrupu kimi iştirak etmişdir.

Araşdırmanın nəticələrinə görə, siqaret çəkən gənc qadınlarda döş xərçəngi növlərindən birinin inkişaf tezliyi heç vaxt siqaret çəkməyən qadınlarla müqayisədə təxminən %30 daha çox müəyyən edilmişdir. Bundan əlavə, bütün döş xərçəngi növləri ayrı-ayrılıqda araşdırıldıqda, üçlü neqativ döş xərçəngi ilə siqaret istifadəsi arasında heç bir əlaqə aşkar edilməmişdir.

Ən azı 15 il siqaret çəkmiş və ya hazırda siqaret çəkən qadınlarda ER-pozitiv döş xərçənginin inkişaf tezliyinin daha qısa müddət siqaret istifadə edən qadınlarla müqayisədə təxminən %50 daha çox olduğu görülmüşdür. Bununla yanaşı, 10 il ərzində gündə ən azı 1 qutu siqaret çəkən (10 qutu-il) qadınlarda ER-pozitiv döş xərçənginin inkişaf tezliyinin daha az siqaret çəkən qadınlarla müqayisədə təxminən %60 daha çox olduğu müəyyən edilmişdir.

Tədqiqatçılar östrogen-pozitiv döş xərçənginin inkişaf tezliyinin daha çox olmasının səbəbini siqaretin tərkibindəki bəzi maddələrin östrogen kimi davranması ilə əlaqələndirmişlər. Siqaretin tərkibində insan sağlamlığına mənfi təsir göstərən bir çox kimyəvi maddə vardır. Bu səbəbdən siqaret istifadəsinin döş xərçəngi riski üzərindəki təsirləri araşdırılmışdır. Əldə edilən nəticələrdə siqaretin ER-pozitiv döş xərçənginin inkişafında risk faktoru ola biləcəyi müşahidə edilmişdir.

Əziz oxucularım, həyat itkisi riski daşıyan bir çox ciddi xəstəlikdə mühüm rol oynayan siqaretin insan sağlamlığını təhdid edən ən mühüm səbəblərdən biri olduğu hər zaman xatırlanmalı bir həqiqətdir. Sizə saxta xoşbəxtlik yaşadan, eyni zamanda sağlamlığınıza zərər verən bu pis vərdişdən qurtulmağın öz əlinizdə olduğunu bilməlisiniz. Elə isə daha sağlam, xoşbəxt və sevdiklərinizlə birlikdə uzun ömür sürmək üçün siqareti buraxın.

Əlaqəli mövzular: 

- Siqareti necə buraxa bilərəm?

- Döş Xərçənginin Əlamətləri, Mərhələləri və Müalicəsi