Uşaqlıq boynu xərçənginin diaqnostikasında istifadə olunan endoservikal küretaj nədir?

Uşaqlıq boynu (serviks) xərçəngi diaqnostikası vasitələrindən biri olan endoservikal küretajuşaqlıq boynu kanalı toxumasından küretlə nümunə götürülməsidir, yəni biopsiya üsulunun bir növüdür. Bu küret (toxuma götürməyə kömək edən dar, qaşıqşəkilli tibbi alət) endoservikal kanalın (uşaqlıq boynu ilə uşaqlıq arasındakı keçid) selikli qişasını qaşımaq üçün istifadə olunur. Bu prosedurla uşaqlıq boynundan kiçik toxuma nümunəsi götürülərək hər hansı anormal hüceyrənin (xərçəngli hüceyrələr kimi) olub-olmadığını anlamaq üçün patoloji laboratoriyada araşdırılır.

Əvvəl aparılmış Pap smear (yaxma) testindən anormal nəticələr alınıbsa və ya ginekoloji çanaq müayinəsi zamanı anormal hal aşkar edilərsə, mama-ginekoloq kolposkopiya adlanan prosedur zamanı endoservikal küretaj edir.

Kolposkopiya nədir?

Kolposkopiya həm mikroskopa, həm də durbinə bənzəyən xüsusi böyüdücünün köməyi ilə uşaqlıq boynundakı mümkün hüceyrə dəyişikliklərini və xərçəng şübhəsini araşdırmağa yarayan müayinə üsuludur.

Anormal yaxma nəticələri daha ətraflı araşdırma üsulu olan kolposkopik müayinə və bu zaman biopsiya götürülməsi ilə dəqiq diaqnoz qoyulması istiqamətində təsdiqlənməlidir. Kolposkopiya zamanı uşaqlıq boynuna bəzi xüsusi boyalar və kimyəvi maddələr tətbiq edilərək şübhəli sahələrin daha aydın olması, xüsusi görüntü verməsi və daha asan biopsiya götürülməsi təmin edilir.

Endoservikal küretaj proseduruna necə hazırlaşmalı?

Həkiminizin araşdırmalı olduğu sahəni görməsini çətinləşdirdiyinə görə və prosedurun nəticələrinin daha düzgün olması üçün müayinə vaxtınızı menstruasiya (aybaşı) dövründən kənara təyin etməlisiniz.

Prosedurdan əvvəl aşağıdakı mühüm göstərişlərə əməl etdiyinizdən əmin olun:

• Bu prosedurdan əvvəl aspirin və ya qan durulaşdırıcı istifadə etməyin.
• Prosedurdan əvvəl ən azı üç gün tampon istifadə etməmiş və vaginal yuyunma etməmiş olun.
• Prosedurdan ən azı üç gün əvvəl başlayaraq cinsi əlaqəyə girməyin.

Bu prosedurdan sonra evə sizi müşayiət edən bir şəxslə getməyiniz lazım ola bilər, buna uyğun planlaşdırın.

Endoservikal küretaj proseduru zamanı

Bu prosedur yalnız bir neçə dəqiqə çəkir. Əslində, əksər hallarda toxuma nümunəsi bir neçə saniyə ərzində götürülə bilər. Endoservikal küretaj xüsusi müayinə kreslosunda aparılır. Uşaqlıq boynu və vaginadan selik qatını təmizləmək və daha yaxşı görüntü təmin etmək məqsədilə biopsiya aparılacaq sahəyə sirkə və ya yodlu məhlul tətbiq edilə bilər. Bu prosedur çox vaxt ağrısızdır və anesteziya tələb etmir.

Endoservikal küretajla biopsiyadan sonra

Bu prosedurdan sonra bir neçə gün aybaşı sancılarına bənzər ağrılar və yüngül şikayətlər yaşana bilər. Hər hansı ağrıkəsici qəbulunun şikayətlərinizə kömək edib-etməyəcəyini həkiminizdən soruşun. Prosedurdan sonra vaginal qanama və ya ifrazat görülə bilər, buna görə gigiyenik bez istifadə etməyiniz lazım ola bilər. Tez sağalma üçün bir müddət cinsi əlaqəyə girməməli, tampon istifadə etməməli və vaginal yuyunma etməməlisiniz. Güclü vaginal qanama, ciddi aşağı qarın ağrısı, qızdırma və ya titrəmə olarsa, dərhal həkiminizlə əlaqə saxlayın.

Endoservikal küretaj nəticələrini gözləyərkən narahatlıq hiss edilə bilər. Lakin anormal Pap yaxmalarının təxminən yarısının iltihab və ya vaginal infeksiya səbəbindən yarandığını xatırlatmaq faydalıdır. Prosedur və ya nəticələrlə bağlı stresin öhdəsindən daha asan gəlmək üçün məsləhətçi ilə danışa, dəstək qrupuna qoşula, yüngül idman edə, daha qidalı məhsullar yeyə bilərsiniz. Sonda isə ehtiyacınız olan yuxunu almaq üçün yatma saatlarınızı qaydaya salmağınız tövsiyə olunur.

- Əlaqəli mövzu: Müasir xərçəng skrininq proqramları: hansı testlərlə hansı xərçənglərdə erkən diaqnoz mümkündür?