Virchow düyünü nədir? Adı haradan gəlir?

Virchow düyünü xərçəngin metastaz etdiyini göstərən, əsasən sol körpücük sümüyünün üstündə şişmiş limfa düyününü ifadə edir.

Başqa təriflə Virchow düyünü limfa düyünüdür və limfa sisteminin bir hissəsidir. “Ductus thoracicus” adlandırdığımız, döş boşluğundan keçən əsas limfa axacağının son düyünüdür.

Virchow nodu / düyünü ən çox mədə xərçəngində görülsə də, başqa xərçənglərdə də yarana bilər.

Virchow düyünü bağırsaqlardan, urogenital (sidik yolları) sistemdən, qida borusundan, ümumi öd axacağından, qaraciyərdən, mədəaltı vəzidən və ağciyərlərdən qaynaqlanan xərçənglər üçün səpilmə / yayılma yeri kimi təsvir edilib. Yastıhüceyrəli karsinoma və limfomada da bildirilib.

Virchow düyünü adının tarixi

Dr. Rudolf Virchow Virchow düyünü adının mənbəyidir. 1821-ci ildə Prussiyada (indiki Polşa) doğulub və tibb təhsilini 1843-cü ildə Berlində tamamlayıb.

1848-ci ildə Dr. Virchow mədə, over (qadın yumurtalığı) və mədəaltı vəzi xərçəngləri ilə əlaqəli supraklavikulyar limfadenopatiyanı (körpücük sümüyünün üstündə limfa vəzinin böyüməsi) təsvir edib. Dr. Virchow təsvir etdiyi bu şişmiş limfa vəzini ağciyər / döş boşluğu limfa axacağı ilə yayılan xərçənglərin son nöqtəsi sayıb.

“Buna görə, xüsusən mədə, mədəaltı vəzi, yumurtalıq və s. xərçənglərində proses tədricən aşağı qarın vəzilərindən ductus thoracicus boyunca arxa mediastendəki vəzilərə yayılır və sonda boynun birləşmə yerinin ətrafındakı yuqulyar vəziləri əhatə edir.” deyə Dr. Virchow yazmışdı.

ABŞ-da Virchow düyünü Dr. Virchow-un bu təsvirinə görə belə adlandırılıb. Fransada bu hadisə vəziyyəti 1889-cu ildə bildirən fransız həkim Charles Emile Troisier-in adı ilə “Troisier əlaməti” adlandırılıb; lakin hazırda bütün dünyada Virchow düyünü kimi tanınır.

Dr. Virchow-un digər elmi töhfələri arasında leykozun ilk təsvirlərindən birinin yazılması və tromboz və embolizmi (damar daxilində qanın laxtalanma problemi) təsvir etmək üçün terminlər yaratması yer alır.

Xərçəngin mənşəyi barədə ilk doğru ehtimal

Ən mühüm töhfələrindən biri bütün insan xəstəliklərinin hüceyrə əsasının olduğunu müəyyən etməsi idi. Dr. Virchow xərçəngin toxumalarda güclü qıcıqlanmadan yarandığına inanaraq (“xroniki qıcıqlanma nəzəriyyəsi”), xərçəng hüceyrələrinin mənşəyini normal hüceyrələrlə düzgün əlaqələndirən ilk şəxs idi.

Hüceyrə patologiyasının banisi

Xroniki qıcıqlanma nəzəriyyəsi hazırda xroniki iltihab kimi tanınır və Dr. Virchow bu vəziyyətin xərçəngin səbəbi olduğunu ehtimal etdiyini deyib – bu ehtimal böyük dərəcədə doğru çıxıb. Xərçəng hüceyrələri daxil olmaqla bütün hüceyrələrin başqa hüceyrələrdən yarandığını demişdi. Kəşf və təsvirləri onu hüceyrə patologiyasının banisi kimi tanımağımızı təmin edib.

Həmkarı Benno Reinhardt ilə birlikdə Archiv für pathologische Anatomie und Physiologie und für klinische Medizin jurnalını qurub. Hazırda Virchows Archiv kimi tanınan jurnal Avropa Patologiya Cəmiyyətinin rəsmi jurnalıdır.

Dr. Virchow həmçinin Die medicinische Reform (Tibbi İslahat) qəzetini qurması və “sosial tibb” terminini yayması ilə tanınır. Həkim hüquqları uğrunda mübarizə aparıb, həkim palataları kimi peşə birliklərinin üzvlərini müdafiə etməli olduğu fikrini dəstəkləyib.

Dr. Virchow 1902-ci ildə travmatik bud-çanaq sınığından sonra ürək çatışmazlığından ölüb.