ახალი ეტაპი ფილტვის წვრილუჯრედოვანი კიბოს მკურნალობაში იფინატამაბ დერუქსტეკანით
ამ სტატიაში
ფილტვის წვრილუჯრედოვანი კიბო (KHAK) ფილტვის კიბოს აგრესიული და მკურნალობისადმი რეზისტენტული ქვეტიპია. სწრაფი პროგრესირებისკენ მიდრეკილი ეს კიბო საწყის მკურნალობას კარგად პასუხობს, თუმცა ხშირად მკურნალობისადმი რეზისტენტობას ავითარებს, მეორდება და პროგრესირებს. ბოლო 10 წელიწადში ფილტვის კიბოს მრავალი ქვეტიპისთვის სხვადასხვა მიზნობრივი მედიკამენტისა და იმუნოთერაპიის დანერგვის მიუხედავად, ფილტვის წვრილუჯრედოვანი კიბოსთვის მხოლოდ მცირე რაოდენობის ახალმა მკურნალობამ მიიღო დამტკიცება — კერძოდ, პირველი ხაზის სისტემურ ქიმიოთერაპიაზე იმუნოთერაპიის დამატებამ. ეს რთული ვითარება უფრო ეფექტიანი მკურნალობის მეთოდების შესწავლას აუცილებელს ხდის. ამ კონტექსტში წინა პლანზე ანტისხეულისა და მედიკამენტის კონიუგატები გამოდის.
ანტისხეულისა და მედიკამენტის კონიუგატები (Antibody-Drug Conjugate= ADC) კიბოს მკურნალობაში გამოყენებული მეტად სპეციფიკური და ძლიერი მედიკამენტებია. ეს ტექნოლოგია, რომელიც ბოლო წლების ონკოლოგიის ერთ-ერთ უმნიშვნელოვანეს განვითარებას წარმოადგენს, კიბოს უჯრედების სამიზნედ ამოსაღებად შექმნილ ანტისხეულებს ამ უჯრედების დამღუპველ ძლიერ ქიმიოთერაპიულ მოლეკულებთან აერთიანებს. ეს მიდგომა კიბოს უჯრედებისთვის სპეციფიკური ანტიგენების ამოცნობის ანტისხეულების უნარს ძლიერი კიბოს საწინააღმდეგო მედიკამენტების ეფექტიანობასთან აერთიანებს.
ახალი მოთამაშე სცენაზე
ანტისხეულისა და მედიკამენტის კონიუგატმა ifinatamab deruxtecan-მა ფილტვის წვრილუჯრედოვანი კიბოს მქონე, მანამდე მრავალჯერ ნამკურნალებ პაციენტებში "ძლიერი და ხანგრძლივი ეფექტიანობა" აჩვენა. იაპონური ბიოტექნოლოგიური კომპანია Daiichi Sankyo-ს მიერ შემუშავებულ ამ კიბოს საწინააღმდეგო აგენტს ჯერჯერობით FDA-ს (აშშ-ის სურსათისა და მედიკამენტების ადმინისტრაციის) დამტკიცება არც ერთი კიბოს მკურნალობისთვის არ მიუღია. თუმცა ის სხვადასხვა კიბოს, პირველ რიგში KHAK-ის, მკურნალობისთვის ადამიანებზე კლინიკურ კვლევებში იცდება.
სამიზნე — კიბოს უჯრედების განმასხვავებელი თვისება
B7 ჰომოლოგი 3 (B7-H3) უჯრედის მემბრანაზე არსებული იმუნორეგულატორული ცილაა, რომელიც მრავალი ტიპის სიმსივნეში, მათ შორის KHAK-ში, ჭარბად გამოხატულია. KHAK-ის მქონე პაციენტების დაახლოებით ორ მესამედში B7-H3-ის საშუალო ან მაღალი დონის ექსპრესია აღინიშნა, რაც დაავადების პროგრესირებასა და დაბალ გადარჩენასთან იყო დაკავშირებული. Ifinatamab deruxtecan (I-DXd) B7-H3-ზე მიმართული ახალი ანტისხეულისა და მედიკამენტის კონიუგატია, რომელიც კლინიკურად დადასტურებულ deruxtecan-ის ტექნოლოგიას იყენებს. ეს ნაერთი B7-H3-თან დამაკავშირებელ ანტისხეულსა და ძლიერ ტოპოიზომერაზა I-ის ინჰიბიტორ ქიმიოთერაპიულ აგენტს შეიცავს, რამაც შესაძლოა სიმსივნური უჯრედების შერჩევითი სიკვდილი გაზარდოს და მედიკამენტური ტვირთის სისტემური ექსპოზიცია შეამციროს.
2023 წლის ფილტვის კიბოს მსოფლიო კონფერენციაზე წარმოდგენილი კვლევა
ეს მიგნებები Dr. Melissa L. Johnson-მა 2023 წლის ფილტვის კიბოს მსოფლიო კონფერენციაზე DS7300-A-J101 კვლევის ქვეანალიზის სახით წარმოადგინა.
Dr. Johnson-მა და კოლეგებმა I-DXd-ის ფაზა I/II DS7300-A-J101 კვლევა გავრცელებული მყარი (ქსოვილებისა და ორგანოებისგან წარმოშობილი) სიმსივნეების მქონე, მანამდე მკურნალობის მრავალი ხაზი მიღებულ 205 პაციენტში ჩაატარეს.
კონფერენციაზე Dr. Johnson-მა კვლევის 1. ნაწილიდან KHAK-ის ქვეჯგუფის შედეგები წარმოადგინა. ანალიზი მოიცავდა B7-H3-ის ექსპრესიით შეურჩეველ 22 KHAK პაციენტს, რომლებიც I-DXd-ს 4,8-დან 16 mg/kg-მდე დოზებით იღებდნენ. ეფექტიანობის ანალიზი, მედიანური 11,7-თვიანი დაკვირვებისას, მოიცავდა ≥ 6,4 mg/kg დოზის მიმღებ 21 პაციენტს. 22 პაციენტს მანამდე მკურნალობის მედიანურად ორი ხაზი ჰქონდა მიღებული, ძირითადად პლატინაზე დაფუძნებული ქიმიოთერაპია და იმუნოთერაპია.
მნიშვნელოვანი მიგნებები
- დადასტურებული ობიექტური პასუხი პაციენტების 52,4%-ში მიიღეს, მათგან 4,8%-ში სრული პასუხი აღინიშნა.
- პროგრესირების გარეშე გადარჩენის მედიანა 5,8 თვე, ხოლო საერთო გადარჩენის მედიანა 12,2 თვეა.
გავრცელებული ინფორმაციით, ორი პაციენტი კვლავ მკურნალობდა.
B7-H3-ის ექსპრესიის ანალიზისთვის შესაფასებლად ვარგისი 17 პაციენტიდან ყველას საშუალო ან მაღალი დონის ექსპრესია ჰქონდა. მკვლევრების ცნობით, B7-H3-ის დონესა და საუკეთესო საერთო პასუხს, პროგრესირების გარეშე გადარჩენას ან საერთო გადარჩენას შორის ტენდენცია არ გამოვლენილა.
I-DXd-ს მისაღები და მართვადი ტოქსიკურობა ჰქონდა. პაციენტების 36,4%-ში 3. ხარისხის ან უფრო მაღალი ხარისხის მკურნალობასთან დაკავშირებული გვერდითი ეფექტები აღინიშნა, ერთი სიკვდილი კი მკურნალობას დაუკავშირეს. ხუთმა პაციენტმა მკურნალობისას განვითარებული გვერდითი ეფექტების გამო მკურნალობა შეწყვიტა; მათ შორის თითო შემთხვევა იყო ფილტვის ინტერსტიციული დაავადების, პნევმონიის, გულის უკმარისობის, ემბოლიისა და COVID-19 პნევმონიის. გულისრევა მკურნალობისას განვითარებული ყველაზე ხშირი გვერდითი ეფექტი იყო... კვლევის საწყის ეტაპზე გულისრევისა და ღებინების პროფილაქტიკური წინასწარი მკურნალობა დაშვებული არ იყო, ახლა კი I-DXd-ის ყველა კვლევაში ანტიემეტური პროფილაქტიკა გამოიყენება.
ამჟამად მიმდინარეობს ფაზა II კლინიკური კვლევა I-DXd-ის გამოყენებით გავრცელებული KHAK-ის მქონე პაციენტების მეორე ან მესამე ხაზის მკურნალობაში.
კომენტარი
მანამდე KHAK-ში ანტისხეულისა და მედიკამენტის კონიუგატების სამიზნეებიც (DLL3, CD56 და TROP-2) გამოსცადეს, თუმცა მათ B7-H3-ზე მიმართული I-DXd-ის მსგავსი მნიშვნელოვანი ეფექტიანობა ვერ აჩვენეს და მეტი გვერდითი ეფექტი ჰქონდათ.
ამ კვლევაში კი ვნახეთ ქვეჯგუფის ანალიზის წინასწარი შედეგები ifinatamab deruxtecan-ით (I-DXd) — ანტისხეულისა და მედიკამენტის კონიუგატით, რომელიც KHAK-სა და რამდენიმე სხვა მყარ სიმსივნეში ჭარბად გამოხატულ ახალ და საინტერესო სამიზნე B7-H3-ზეა მიმართული. მცირე რაოდენობისა და წინასწარი მონაცემების მიუხედავად, პაციენტების ნახევარზე მეტში ობიექტური პასუხები და, რაც უფრო მნიშვნელოვანია, ხანგრძლივი პასუხები ვნახეთ.
გასათვალისწინებელია, რომ ეს მანამდე ინტენსიურად ნამკურნალები, რეზისტენტული KHAK-ის პაციენტების ჯგუფი იყო, ამიტომ პროგრესირების გარეშე გადარჩენის 5,6-თვიანი მედიანა და ერთ წელზე მეტი საერთო გადარჩენის მედიანა მეტად იმედისმომცემია.
წყაროები
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.