არარეზექტაბელური ან მე-4 სტადიის მელანომისთვის Opdualag-მა FDA-ს დამტკიცება მიიღო

ოპერაციით მოუცილებელი ან მეტასტაზური (მე-4 სტადიის) ავთვისებიანი მელანომის მქონე 12 წლისა და უფროსი ზრდასრული და პედიატრიული პაციენტების პირველი ხაზის სისტემური მკურნალობისთვის ნივოლუმაბისა და relatlimab-rmbw-ის კომბინაციამ (Opdualag, Bristol-Myers Squibb Company) FDA-ს (აშშ-ის სურსათისა და წამლის ადმინისტრაციის) დამტკიცება 2022 წლის 18 მარტს მიიღო. Opdualag, LAG-3-ის მაბლოკირებელი ანტისხეულის, რელატლიმაბისა, და პროგრამირებული სიკვდილის რეცეპტორ-1-ის მაბლოკირებელი ანტისხეულის, ნივოლუმაბის, ფიქსირებული დოზების კომბინაციაა.

როგორია Opdualag-ის მოქმედების მექანიზმი?

LAG-3 და PD-1 იმუნური სისტემის T უჯრედების გამთიშველი ორი განსხვავებული იმუნური საკონტროლო წერტილია. LAG-3-ის მაბლოკირებელი ანტისხეულის რელატლიმაბისა და PD-1-ის მაბლოკირებელი ანტისხეულის ნივოლუმაბის კომბინაციის უსაფრთხოება და სიმსივნის საწინააღმდეგო აქტივობა ადრე ნამკურნალებ მელანომის პაციენტებში უკვე ნაჩვენები იყო; თუმცა მანამდე არანამკურნალებ მელანომაში ამ კომბინაციის ეფექტიანობის შესასწავლად ჩატარდა II/III ფაზის RELATIVITY-047 კვლევა.

ქვემოთ რელატლიმაბისა და ნივოლუმაბის მოქმედების მექანიზმი გამარტივებულადაა გამოსახული:

RELATIVITY-047 კვლევის დეტალები, რომელმაც Opdualag-ს FDA-ს დამტკიცება მოუტანა

ამ ორმაგად ბრმა კლინიკურ კვლევაში ჩრდილოეთ, ცენტრალური და სამხრეთ ამერიკის, ევროპის, ავსტრალიისა და ახალი ზელანდიის რეგიონებიდან 714 პაციენტი 2018 წლის მაისიდან 2020 წლის დეკემბრამდე შემთხვევით გადანაწილდა რელატლიმაბის/ნივოლუმაბის (355 პაციენტი) ან მხოლოდ ნივოლუმაბის (359 პაციენტი) მისაღებად.

მკურნალობა შედგებოდა ყოველ 4 კვირაში 160 mg რელატლიმაბისა და 480 mg ნივოლუმაბის კომბინაციისგან ან მხოლოდ 480 ნივოლუმაბისგან, დაავადების პროგრესირებამდე ან მიუღებელ გვერდით მოვლენამდე.

სტრატიფიკაციის ფაქტორები იყო;

• LAG-3-ის ექსპრესიის სტატუსი (დადებითად შეღებილი იმუნური უჯრედების ≥ %1 ან < %1) და
• PD-L1-ის ექსპრესიის სტატუსი (სიმსივნური უჯრედების ≥ %1 ან < %1).

კვლევის პირველადი საბოლოო წერტილი იყო პროგრესირების გარეშე გადარჩენა, რომელსაც ბრმა დამოუკიდებელი შეფასების ცენტრი აფასებდა.

შედეგები

• 2021 წლის მარტის ანალიზისას დაკვირვების მედიანური ხანგრძლივობა 13,2 თვე იყო.
• პროგრესირების გარეშე გადარჩენის მედიანა რელატლიმაბის/ნივოლუმაბის ჯგუფში 10,1 თვე იყო (95% სანდოობის ინტერვალი [GA] = 6.4–15.7 თვე), ხოლო ნივოლუმაბის ჯგუფში — 4,6 თვე (95% GA = 3.4–5.6 თვე) (საფრთხეების თანაფარდობა [HR ] = 0,75, 95% GA = 0.62–0.92, P = .006).
• მე-12 თვეზე PFS-ის მაჩვენებლები იყო 47.7% (95% GA = 41.8%-53.2%) და 36.0% (95% GA = 30.5%-41.6%).
• კომბინირებულმა მკურნალობამ უკეთესი პროგრესირების გარეშე გადარჩენა აჩვენა სიმსივნური დატვირთვის, LDH-ის დონისა და სხვა პროგნოზული ფაქტორებისგან დამოუკიდებლად.

Opdualag-ის გვერდითი მოვლენები

• მძიმე (მე-3 ან მე-4 ხარისხის) გვერდითი მოვლენები რელატლიმაბის/ნივოლუმაბის ჯგუფში 40.3%-სა და ნივოლუმაბის ჯგუფში 33.4%-ს განუვითარდა; მკურნალობასთან დაკავშირებულად ჩაითვალა, შესაბამისად, 18.9%-სა და 9.7%-ში.
• რელატლიმაბის/ნივოლუმაბის ჯგუფში, ნივოლუმაბთან შედარებით, ნებისმიერი ხარისხის მკურნალობასთან დაკავშირებული ყველაზე ხშირი გვერდითი მოვლენები იყო ქავილი (23.4% და 15.9%), დაღლილობა (23.1% და 12.8%) და გამონაყარი (15.5% და 12.0%); ყველაზე ხშირი მე-3 ან მე-4 ხარისხის გვერდითი მოვლენა დაღლილობა იყო (1.1% და 0.3%).
• ორ ჯგუფში, შესაბამისად, ინფუზიასთან დაკავშირებული რეაქციები პაციენტების 5,9%-სა და 3,6%-ში გამოვლინდა.
• რელატლიმაბის/ნივოლუმაბის ჯგუფში, ნივოლუმაბთან შედარებით, ნებისმიერი ხარისხის ყველაზე ხშირი იმუნური მექანიზმით განპირობებული გვერდითი მოვლენები იყო ჰიპოთირეოზი ან თირეოიდიტი (18.0% და 13.9%), გამონაყარი (9.3% და 6.7%) და დიარეა/კოლიტი (6.8% და 3.1%); ყველაზე ხშირი მე-3 ან მე-4 ხარისხის მოვლენები იყო ჰეპატიტი (3.9% და 1.1%) და თირკმელზედა ჯირკვლის უკმარისობა (1.4% და 0%).

Opdualag-ის დოზა

სულ მცირე 40 kg წონის, 12 წლისა და უფროსი ზრდასრული და პედიატრიული პაციენტებისთვის Opdualag-ის რეკომენდებული დოზაა ინტრავენურად ყოველ 4 კვირაში 480 mg ნივოლუმაბი და 160 mg რელატლიმაბი, დაავადების პროგრესირებამდე ან მიუღებელი ტოქსიკურობის განვითარებამდე. 12 წლისა და უფროსი, 40 kg-ზე ნაკლები წონის პედიატრიული პაციენტებისთვის რეკომენდებული დოზა განსაზღვრული არ არის.