დადგინდა, რომ რეგულარული ვარჯიში ტკივილის ატანის უნარს ზრდის
ამ სტატიაში
ვარჯიშის დადებითი გავლენა ჩვენს ჯანმრთელობაზე უდავოა. თუმცა ბოლოდროინდელი კვლევა აჩვენებს, რომ რეგულარული ვარჯიში არა მხოლოდ ცხოვრების ჯანსაღ წესს უწყობს ხელს, არამედ ტკივილის მიმართ გამძლეობაც შეიძლება გაზარდოს. ეს განსაკუთრებით მნიშვნელოვანია ქრონიკული ტკივილის მქონე ადამიანებისთვის, რადგან ამ მიგნებებმა ტკივილის მართვის ახალ მიდგომას შეიძლება გაუხსნას გზა. ამ სტატიაში განვიხილავთ ამ ინოვაციურ კვლევას იმის შესახებ, თუ როგორ შეიძლება რეგულარულმა ვარჯიშმა ტკივილის ტოლერანტობა გაზარდოს.
ვარჯიში და ტკივილის მიმართ გამძლეობა: გამოვლინდა დადებითი კავშირი
მასშტაბური დაკვირვებითი კვლევა, რომელშიც 10000-ზე მეტი ზრდასრული მონაწილეობდა, 2023 წლის 24 მაისს PLOS One ჟურნალში გამოქვეყნდა.
მკვლევრებმა დაადგინეს, რომ 7-დან 8 წლამდე პერიოდის განმავლობაში რეგულარულად საშუალო ან მაღალი ინტენსივობის ფიზიკური აქტივობით დაკავებულ ადამიანებს ტკივილის ტოლერანტობა უფრო მაღალი ჰქონდათ, ვიდრე მათ, ვინც ასეთ აქტივობაში არ მონაწილეობდა. ამასთან, შეინიშნებოდა, რომ მსუბუქი ვარჯიშიც კი ტკივილის ტოლერანტობას ზრდიდა.
ნებისმიერი აქტივობა უმოძრაობაზე უკეთესია
კვლევის მონაწილეები იყვნენ 10732 ადამიანი, რომლებმაც კითხვარები 2007-2008 და 2015-2016 წლებში შეავსეს.
ფიზიკური აქტივობის, ტკივილის ტოლერანტობის, სქესის, სოციოდემოგრაფიული ცვლადებისა და ქრონიკული ტკივილის მონაცემები კლინიკური გამოკვლევებით შეგროვდა.
ტკივილის ტოლერანტობა გაზომეს ცივი პრესორის ტესტით (CPT), რომელიც ადგენს, რამდენ ხანს შეეძლოთ მონაწილეებს ხელის ცივ წყალში გაჩერება.
სედენტარულ (მოუვარჯიშებელ, უმოძრაო) ჯგუფთან შედარებით, მსუბუქი, საშუალო და მაღალი ინტენსივობით მოვარჯიშეების ცივი პრესორის ტესტის ტოლერანტობა შესაბამისად
- მსუბუქად მოვარჯიშეებში 7%-ით,
- საშუალო ინტენსივობით მოვარჯიშეებში 14%-ით
- მაღალი ინტენსივობით მოვარჯიშეებში 16%-ით მეტი იყო.
ცვლილება ყოველთვის შესაძლებელი და სასარგებლოა
როგორც წამყვანმა მკვლევარმა Årnes-მა აღნიშნა, რეგულარული ფიზიკური აქტივობა ტკივილის უფრო მაღალ ტოლერანტობას უკავშირდება და ნებისმიერი აქტივობა უმოძრაობას სჯობს. შეინიშნებოდა ტკივილის ტოლერანტობის ზრდა მათში, ვინც უმოძრაო ცხოვრების წესიდან უფრო აქტიურზე გადავიდა. ტკივილის ყველაზე მაღალი ტოლერანტობა რეგულარულად საშუალო ან ინტენსიურად მოვარჯიშე ადამიანებში დაფიქსირდა: ცივი პრესორის ტესტში უმოძრაოებთან შედარებით 20,4 წამით მეტხანს გაძლეს.
დასკვნის სახით, სულ უფრო მეტი მტკიცებულებაა, რომ რეგულარული ვარჯიში ტკივილის ტოლერანტობას ზრდის. თუმცა ამ საკითხის კვლევა უნდა გაგრძელდეს. ამ მიგნებების პრაქტიკული გამოყენება და ტკივილის მართვაში ვარჯიშის პოტენციური როლი მომავალი კვლევებით უკეთ გახდება გასაგები.
წყაროები
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.