FDA-ს მწვანე შუქი საციტუზუმაბ გოვიტეკანს წვრილუჯრედოვანი ფილტვის კიბოს დროს

ახალი საყურადღებო პრეპარატი მეორე ხაზის მკურნალობაში

აშშ-ის სურსათისა და წამლის ადმინისტრაციამ (FDA) პლატინაზე დაფუძნებული ქიმიოთერაპიის შემდეგ პროგრესირებული, გავრცელებული სტადიის წვრილუჯრედოვანი ფილტვის კიბოს მქონე პაციენტებისთვის sacituzumab govitecan-hziy-ს (Trodelvy) „Breakthrough Therapy“ (გარღვევითი თერაპიის) სტატუსი მიანიჭა. გადაწყვეტილება ეფუძნება ფილტვის კიბოს 2024 წლის საერთაშორისო კონფერენციაზე წარდგენილი მე-2 ფაზის TROPiCS-03 კვლევის მნიშვნელოვან სიმსივნურ პასუხებსა და უსაფრთხოების მონაცემებს.

„Breakthrough Therapy“, ანუ „გარღვევითი თერაპია“, FDA-ს სპეციალური სტატუსია სერიოზული ან სიცოცხლისთვის საშიში დაავადებების ისეთი მკურნალობებისთვის, რომლებსაც არსებულ თერაპიებთან შედარებით მნიშვნელოვანი გაუმჯობესების პოტენციალი აქვთ. ეს სტატუსი აჩქარებს შეფასებისა და დამტკიცების პროცესს, რათა მკურნალობა პაციენტებამდე უფრო ადრე მივიდეს.

Trodelvy-ის FDA დამტკიცების ქრონოლოგია

• 2023 წლის 3 თებერვალი: საციტუზუმაბ გოვიტეკანმა FDA-ს დამტკიცება მიიღო ჰორმონრეცეპტორულად დადებითი, HER2-უარყოფითი შორსწასული ძუძუს კიბოსთვის 
• 2021 წლის 13 აპრილი: საციტუზუმაბ გოვიტეკანმა FDA-ს დამტკიცება მიიღო შორსწასული უროთელური (შარდის ბუშტისა და საშარდე გზების) კიბოსთვის 
• 2020 წლის 22 აპრილი: Sacituzumab Govitecan-hziy-მ FDA-ს დამტკიცება მიიღო შორსწასული სამმაგად უარყოფითი ძუძუს კიბოს მკურნალობისთვის 

TROPiCS-03-ის მე-2 ფაზის კვლევის შედეგები

ფილტვის კიბოს 2024 წლის საერთაშორისო კონფერენციაზე წარდგენილმა განახლებულმა მონაცემებმა აჩვენა, რომ საციტუზუმაბ გოვიტეკანს სიმსივნის საწინააღმდეგო აქტივობა აქვს გავრცელებული სტადიის წვრილუჯრედოვანი ფილტვის კიბოს დროს როგორც პლატინარეზისტენტულ, ისე არარეზისტენტულ პაციენტებში.

• მონაცემების შეგროვების საბოლოო თარიღი: 2024 წლის 8 მარტი

• დაკვირვების მედიანური ხანგრძლივობა: 12,3 თვე (დიაპაზონი: 8,1-20,1 თვე)

ეს ერთჯგუფიანი კვლევაა და საკონტროლო ჯგუფი არ ჰყავს.

კლინიკური პასუხის მაჩვენებლები

საციტუზუმაბ გოვიტეკანით ნამკურნალებ პაციენტებში კლინიკური პასუხის მაჩვენებლები საყურადღებო იყო:

• საერთო პასუხის მაჩვენებელი: 41,9% (სანდოობის ინტერვალი [CI]: 27,0%–57,9%).

• დაავადების კონტროლის მაჩვენებელი: 83,7% (CI: 69,3%–93,2%).

• კლინიკური სარგებლის მაჩვენებელი: 48,8% (CI: 33,3%–64,5%).

• პასუხის მედიანური ხანგრძლივობა (DOR): 4,7 თვე (CI: 3,5-6,7 თვე). ყველა პასუხის მქონე პაციენტს ნაწილობრივი პასუხი ჰქონდა; მათგან 48,2% (CI: 23,9%–68,9%) ამ პასუხს მე-6 თვეშიც ინარჩუნებდა.

• პასუხის მიღწევამდე მედიანური დრო: 1,4 თვე (დიაპაზონი: 1,2-4,2 თვე).

ეს მონაცემები საციტუზუმაბ გოვიტეკანის კლინიკურ ეფექტიანობას ადასტურებს და მე-3 ფაზის კლინიკური კვლევების დაწყებაა დაგეგმილი.

TROPiCS-03 კვლევის დიზაინი

TROPiCS-03 მე-2 ფაზის კვლევაა, რომელიც მეტასტაზური ან ადგილობრივად გავრცელებული სოლიდური სიმსივნეების მქონე პაციენტებს მოიცავს.

გავრცელებული სტადიის წვრილუჯრედოვანი ფილტვის კიბოს ჯგუფში პაციენტები შემდეგ კრიტერიუმებს უნდა აკმაყოფილებდნენ:

• დიაგნოზი: ჰისტოლოგიურად დადასტურებული გავრცელებული სტადიის წვრილუჯრედოვანი ფილტვის კიბო (RECIST 1.1 კრიტერიუმებით)

• ფუნქციური სტატუსი: ECOG PS 0 ან 1

• წინა მკურნალობა: პლატინაზე დაფუძნებული ქიმიოთერაპიისა და იმუნოთერაპიის 1 ან ნაკლები წინა მკურნალობა.

კვლევაში ასევე ჩართეს პაციენტები სტაბილური თავის ტვინის მეტასტაზებით.

მკურნალობის სქემა

• საციტუზუმაბ გოვიტეკანის დოზა: 10 mg/kg

• გამოყენების პროცესი: ინტრავენური ინექცია 21-დღიანი ციკლების 1. და 8. დღეებში

პაციენტთა მახასიათებლები:

• მედიანური ასაკი: 67 (დიაპაზონი: 48-83)

• მოწევის ისტორია: 97,7% (ამჟამინდელი ან ყოფილი მწეველი)

• ECOG PS 1: 81,4%

• ღვიძლის მეტასტაზები: 30,2%

• თავის ტვინის მეტასტაზები: 11,6%

პაციენტების 55,8%-ს წინა მკურნალობაზე სრული ან ნაწილობრივი პასუხი ჰქონდა, 37,2%-ს კი სტაბილური ან პროგრესირებადი დაავადება.

უსაფრთხოების მონაცემები და გვერდითი მოვლენები

საციტუზუმაბ გოვიტეკანის გვერდითი მოვლენების პროფილი იმ ჩვენებების მონაცემების მსგავსი იყო, რომელთათვისაც იგი უკვე დამტკიცებულია:

• მკურნალობასთან დაკავშირებული გვერდითი მოვლენების მქონე პაციენტების წილი: 100%

• 3 და უფრო მაღალი ხარისხის გვერდითი მოვლენების სიხშირე: 74,4%

ყველაზე ხშირი გვერდითი მოვლენები:

• დიარეა: 67% (ხარისხი ≥3: 9%)

• დაღლილობა: 58% (ხარისხი ≥3: 2%)

• ნეიტროპენია: 44%

• შეკრულობა: 42%

• გულისრევა: 40%

• ალოპეცია: 30%

• ანემია: 26% (ხარისხი ≥3: 5%)

• უმადობა: 23%

• მუცლის ტკივილი: 19%

მძიმე გვერდითი მოვლენები პაციენტების 51,2%-ში დაფიქსირდა, 37,2%-ს კი დოზის შემცირება დასჭირდა. სიკვდილით დასრულებული გვერდითი მოვლენა 3 იყო; მათგან ერთი უშუალოდ წამალთან დაკავშირებულად შეფასდა.

საციტუზუმაბ გოვიტეკანის სხვა ჩვენებები და სამომავლო პოტენციალი

საციტუზუმაბ გოვიტეკანი TROP-2-ისკენ მიმართული ანტისხეულ-წამლის კონიუგატია, რომელიც ამჟამად 50-ზე მეტ ქვეყანაში დამტკიცებულია მეტასტაზური სამმაგად უარყოფითი ძუძუს კიბოს მკურნალობისთვის. აშშ-ში იგი სხვადასხვა ჩვენებით გამოიყენება, მათ შორის ადგილობრივად გავრცელებული ან მეტასტაზური სამმაგად უარყოფითი და ჰორმონრეცეპტორულად დადებითი, HER2-უარყოფითი ძუძუს კიბოს დროს.

გარდა ამისა, მიმდინარეობს კლინიკური კვლევები საციტუზუმაბ გოვიტეკანის ეფექტიანობის შესაფასებლად TROP-2-ის მაღალი ექსპრესიით მიმდინარე სიმსივნეებში. მე-2 ფაზის EVOKE-02 კვლევაში იმედისმომცემი შედეგები მიიღეს მეტასტაზური არაწვრილუჯრედოვანი ფილტვის კიბოს პირველი ხაზის მკურნალობაში, აგრეთვე თავისა და კისრის კიბოებსა და გინეკოლოგიურ ავთვისებიან სიმსივნეებში.

დასკვნა

საციტუზუმაბ გოვიტეკანის კლინიკურმა წარმატებამ გავრცელებული სტადიის წვრილუჯრედოვანი ფილტვის კიბოს მქონე პაციენტებში შეიძლება ამ დაავადების მკურნალობის ახალ პარადიგმას გაუხსნას გზა. მე-3 ფაზის კვლევების დასრულებას პრეპარატის სამომავლო როლის განსაზღვრისთვის კრიტიკული მნიშვნელობა აქვს.