გადამუშავებული ხორცპროდუქტები, როგორიცაა სალიამი, სუჯუკი, სოსისი და ლორი, მსხვილი ნაწლავის კიბოს რისკს ზრდის

მრავალმა კვლევამ აჩვენა, რომ დიდი რაოდენობით წითელი ხორცისა და გადამუშავებული ხორცპროდუქტების მოხმარებამ შეიძლება კოლონისა და სწორი ნაწლავის (მსხვილი ნაწლავის) კიბოს რისკი გაზარდოს. ამიტომ ამ პროდუქტების მოხმარების შესახებ ფართო საინფორმაციო სამუშაოები მიმდინარეობს. ჯანმრთელობის მსოფლიო ორგანიზაციის ერთ-ერთი განყოფილების, კიბოს კვლევის საერთაშორისო სააგენტოს (IARC) 22 ექსპერტის მიერ 10 ქვეყანაში ჩატარებული კვლევის შედეგი ჟურნალ Lancet Oncology-ში გამოქვეყნდა.

კიბოს რისკის შესამცირებლად რეკომენდებულია ყოველდღიური წითელი და გადამუშავებული ხორცის მოხმარების 90gr.-დან 70 gr.-მდე შემცირება. მას შემდეგ, რაც დადგინდა, რომ ყოველდღიურად 50 gr. გადამუშავებული ხორცპროდუქტის მიღებამ (დაახლოებით 2 ნაჭერი სალიამის ან ლორის ტოლი) კოლონისა და სწორი ნაწლავის კიბოს რისკი შეიძლება საშუალოდ %18-ით გაზარდოს, უახლესი ანგარიში ასეთი საკვების მოხმარების შემცირებას მხარს უჭერს.

წითელი ხორცი ნიშნავს ყველა წითელი ხორცის პროდუქტს (საქონლის, ცხვრის, ბატკნის, თხის ხორცი და სხვ.). ხორცს, რომელიც ხანგრძლივი შენახვის ან გემოს მიცემის მიზნით დამარილების, შებოლვის, ფერმენტაციისა და მსგავსი დამუშავების შედეგად შეიცვალა, გადამუშავებული ხორცპროდუქტები ეწოდება (სალიამი, სუჯუკი, სოსისი, ლორი და სხვ.). გადამუშავებული ხორცპროდუქტი მზადდება როგორც წითელი ხორცისგან, მაგალითად საქონლისა და ცხვრისგან, ისე შიგნეულობისა და ხორცის ნარჩენი ნაწილებისგან.

ბოლო წლებში მიღებული მონაცემების საფუძველზე ექსპერტები მიუთითებენ, რომ გადამუშავებული ხორცპროდუქტების ჭარბმა მოხმარებამ მსოფლიოში ყოველწლიურად 34.000 ადამიანის სიკვდილი შეიძლება გამოიწვიოს.

IARC-მა 800-ზე მეტი კვლევა შეაფასა და წითელ ხორცსა და გადამუშავებულ ხორცპროდუქტებსა და კიბოს მრავალ სახეობას შორის კავშირი შეისწავლა. კვლევის შედეგად აღმოჩნდა ადამიანებში კიბოს გამოწვევის შესახებ დიდი რაოდენობით გადამუშავებული ხორცპროდუქტების მოხმარებასთან დაკავშირებული საკმარისი მტკიცებულება. სხვა სიტყვებით, არსებობს ძლიერი მტკიცებულებები, რომ დიდი რაოდენობით მოხმარებული გადამუშავებული ხორცი კოლონისა და სწორი ნაწლავის კიბოს იწვევს.

ამასთან, მართალია, ტრადიციული მეთოდებით მომზადებულ წითელ ხორცსა და კიბოს შორის კავშირის საკმარისი მტკიცებულება არ მოიძებნა, მაგრამ ექსპერტების განცხადებით, წითელი ხორცის ჭარბმა მოხმარებამ მსოფლიოში ყოველწლიურად დაახლოებით 50.000 ადამიანის სიკვდილი შეიძლება გამოიწვიოს. ასევე აღინიშნა, რომ უფრო იშვიათად წითელი ხორცის ჭარბმა მოხმარებამ შესაძლოა პანკრეასისა და პროსტატის კიბოს რისკიც გაზარდოს.

დაფიქსირდა, რომ გადამუშავებული ხორცპროდუქტების მოხმარების ზრდა მნიშვნელოვან როლს ასრულებს კოლონისა და სწორი ნაწლავის კიბოს განვითარების რისკში. ექსპერტების განცხადებით, მრავალი ადამიანის მიერ ასეთი საკვების მოხმარება კიბოს სიხშირეზე გლობალურ გავლენას ახდენს და საზოგადოებრივი ჯანმრთელობისთვის ძალიან მნიშვნელოვანია.

ექსპერტები, მართალია, წითელი ხორცისა და გადამუშავებული ხორცპროდუქტების მოხმარების შემცირებას ურჩევენ, მაგრამ არც ამ პროდუქტების გარკვეულ კვებით ღირებულებას უგულებელყოფენ. ამიტომ ამ ჩატარებული და განხილული კვლევებით ხაზგასმულია, რომ უფრო მართებული იქნება წითელი ხორცისა და გადამუშავებული ხორცპროდუქტების რისკებისა და სარგებლის შეფასებით მოხმარების დაბალანსება და შესაბამისად კვება.