ჯვაროსანმა ბოსტნეულმა, მაგალითად ბროკოლიმ და კომბოსტომ, შეიძლება თავისა და კისრის კიბოსგან დაგვიცვას

თავისა და კისრის კიბო მოიცავს ტუჩების, ლოყების შიდა ნაწილის, ღრძილების, სასის, ენის, პირის ფსკერის, ხახის (ფარინქსის), ნესტოების კანისა და ცხვირის საფარის, ხორხის (ლარინქსის) და სანერწყვე ჯირკვლების კიბოებს. მათი განვითარება დიდწილად ალკოჰოლისა და თამბაქოს მსგავს ქიმიურ კანცეროგენებსა და HPV ინფექციას უკავშირდება. ჟურნალ Cancer Prevention Research-ში (კიბოს პრევენციის კვლევა) გამოქვეყნებული კვლევით, ბროკოლიში, კომბოსტოსა და მსგავს ბოსტნეულში არსებული სულფორანი თავისა და კისრის კიბოს პრევენციას შეიძლება დაეხმაროს.

ბოლო კვლევებში დაფიქსირდა, რომ ბროკოლი, კომბოსტო და მსგავსი ბოსტნეული ქრონიკულ ანთებას აფერხებს და უჯრედს მავნე ქიმიკატებისგან, ოქსიდაციური სტრესისა და კიბოსგან იცავს. ამ ორი ინფორმაციის შეჯერებით ჟურნალ Cancer Prevention Research-ში გამოქვეყნებულმა კვლევამ ჯვაროსანი ბოსტნეულის, მაგალითად ბროკოლისა და კომბოსტოს, კიბოს საწინააღმდეგო პოტენციური დაცვა აჩვენა.

კვლევამ აღმოაჩინა, რომ დამცავი მოქმედება ამ ბოსტნეულში არსებული გლუკორაფანინის დაშლის პროდუქტით — სულფორაფანით ხორციელდება. იგი მოქმედებს NRF2 ცილის წარმოქმნის გაზრდითა და STAT3 ცილის წარმოქმნის დათრგუნვით. NRF2 უჯრედში ოქსიდაციურ სტრესსა და DNA-ს აღდგენას უჭერს მხარს და კიბოსა და გულ-სისხლძარღვთა დაავადებებისგან იცავს. STAT3 კი ზრდას, განვითარებასა და გაყოფას უწყობს ხელს; მისი წარმოქმნის ბლოკირება კიბოს უჯრედების ზრდასა და გაყოფას ანელებს.

კვლევაში ასევე სხვადასხვა დოზა გამოსცადეს ჯანმრთელ მოხალისეებსა და თავისა და კისრის კიბოს მქონე პაციენტებში. დაბალი დოზა უჯრედს გარემოს კანცეროგენებისა და ოქსიდაციური სტრესისგან იცავდა, მაღალი კი სიმსივნური უჯრედების სიკვდილს იწვევდა და თაგვებში ენის სიმსივნეს ამცირებდა.

ამრიგად, კვლევა აჩვენებს, რომ სულფორაფანის შემცველი ბროკოლი, კომბოსტო და მსგავსი ბოსტნეული კიბოსგან იცავს, მათ შორის გარემოს კანცეროგენებითა და თამბაქოთი გამოწვეული თავისა და კისრის კიბოს რისკის მქონე პაციენტებს. მათი მდიდარი კვებითი ღირებულება — A,B,C,E ვიტამინები, კალციუმი, კალიუმი, ფოსფორი და სხვა მინერალები — კანის დაცვა, ანთების საწინააღმდეგო მოქმედება, ორგანიზმში მეტაბოლიზაცია, ხელმისაწვდომობა და ღირებულება კიბოს პრევენციისთვის სასურველ არჩევანად აქცევს.