ფილტვის კიბოსთვის ოპერაციამდე და ოპერაციის შემდეგ პემბროლიზუმაბმა FDA-ს დამტკიცება მიიღო
ამ სტატიაში
2023 წლის 16 ოქტომბერს აშშ-ის სურსათისა და მედიკამენტების ადმინისტრაციამ (FDA) ქირურგიულად მოსაცილებელი ფილტვის არაწვრილუჯრედოვანი კიბოს (სიმსივნის დიამეტრი ≥4 cm ან ლიმფური კვანძის დადებითობა) მქონე პაციენტების სამკურნალოდ პემბროლიზუმაბის (Keytruda) სახელწოდების იმუნოთერაპია პლატინის შემცველ ქიმიოთერაპიასთან ერთად ნეოადიუვანტურ (ოპერაციამდე) და ოპერაციის შემდეგ ადიუვანტურ (დამხმარე) მკურნალობად ერთი აგენტის სახით დაამტკიცა.
ეს ფილტვის ადრეული სტადიის კიბოს იმუნოთერაპიისთვის FDA-ს მე-4 დამტკიცებას წარმოადგენს. ამასთან, ფილტვის კიბოს მკურნალობისთვის პერიოპერაციული (ნეოადიუვანტური + ადიუვანტური) იმუნოთერაპიის პირველი დამტკიცებაა.
ფილტვის ადრეული სტადიის კიბოს იმუნოთერაპიის წინა დამტკიცებები ასეთია:
- 15.10.2021-ს Atezolizumab (Tecentriq): PD-L1 ≥ 1%, II – IIIA სტადიის ფილტვის არაწვრილუჯრედოვანი კიბოს ადიუვანტურ მკურნალობად პლატინაზე დაფუძნებული ქიმიოთერაპიის შემდეგ. 1005 პაციენტზე ჩატარებულ IMpower010 კვლევაში ადიუვანტური atezolizumab-ის გამოყენებამ კიბოს რეციდივის რისკი 44%-ით შეამცირა.
- 04.03.2022-ს Nivolumab (Opdivo): IB – IIIA სტადიის ოპერირებადი ფილტვის არაწვრილუჯრედოვანი კიბოს ნეოადიუვანტურ მკურნალობად ქიმიოთერაპიასთან კომბინაციაში დამტკიცდა. Nivolumab-ის ჯგუფში პათოლოგიური სრული პასუხი 24% იყო, მხოლოდ ქიმიოთერაპიისას კი 2,2%.
- 26.02.2023-ს Pembrolizumab (Keytruda): IB (T2a ≥4 cm), II ან IIIA სტადიის ფილტვის არაწვრილუჯრედოვანი კიბოსთვის ოპერაციისა და პლატინაზე დაფუძნებული ქიმიოთერაპიის შემდეგ ადიუვანტურ მკურნალობად დამტკიცდა. ქიმიოთერაპიის მიმღებებში დაავადების გარეშე გადარჩენა 58,7 თვე იყო, შედარებით 34,9 თვესთან (HR=0,73). ადიუვანტური ქიმიოთერაპიის არმიმღებებს სარგებელი არ ჰქონიათ.
KEYNOTE-671 კვლევით მიღებული FDA-ს დამტკიცება
პერიოპერაციული პემბროლიზუმაბის ეფექტიანობა შეფასდა KEYNOTE-671-ის სახელწოდების მრავალცენტრიან, რანდომიზებულ, ორმაგად ბრმა, პლაცებოთი კონტროლირებულ მე-3 ფაზის კლინიკურ კვლევაში, რომელშიც მანამდე არანამკურნალები და ქირურგიულად მოსაცილებელი II, IIIA ან IIIB (N2) სტადიის ფილტვის არაწვრილუჯრედოვანი კიბოს მქონე 797 პაციენტი შეფასდა.
პაციენტები პლატინაზე დაფუძნებულ ქიმიოთერაპიასთან ერთად პემბროლიზუმაბის ან პლაცებოს მისაღებად ჯგუფებად დაყვეს და 4 ციკლის განმავლობაში ყოველ 3 კვირაში ერთხელ მკურნალობდნენ (ამ ეტაპს ნეოადიუვანტური მკურნალობა ეწოდება). ამ პერიოდის შემდეგ პაციენტებს ოპერაცია ჩაუტარდათ. შემდეგ ისინი მკურნალობას მხოლოდ პემბროლიზუმაბით ან პლაცებოთი აგრძელებდნენ ყოველ 3 კვირაში ერთხელ, სულ 13 ციკლამდე (ამ ეტაპს ადიუვანტური მკურნალობა ეწოდება).
შედეგები
ეფექტიანობის ძირითადი შედეგის საზომები იყო საერთო გადარჩენა (Overall Survival = OS) და მკვლევრის მიერ შეფასებული მოვლენის გარეშე გადარჩენა (Event Free Survival = EFS).
- დადგინდა, რომ პემბროლიზუმაბის პერიოპერაციულ (ნეოადიუვანტურ + ადიუვანტურ) მკურნალობად გამოყენებამ კიბოს პროგრესირების, რეციდივის ან სიკვდილის რისკი 42%-ით შეამცირა.
- პემბროლიზუმაბის ჯგუფში საერთო გადარჩენის მედიანა მიღწეული არ იყო (95% სანდოობის ინტერვალი: შეუფასებელი [NE], NE), პლაცებოს ჯგუფში კი ეს დრო 52,4 თვე იყო (95% სანდოობის ინტერვალი: 45,7, NE) (რისკის თანაფარდობა [HR] 0,72 [95% სანდოობის ინტერვალი: 0,56, 0,93]; p-მნიშვნელობა=0,0103).
- პემბროლიზუმაბის ჯგუფში EFS-ის მედიანა მიღწეული არ იყო (95% სანდოობის ინტერვალი: 34,1 თვე, NE), ხოლო პლაცებოს ჯგუფში 17 თვე იყო (95% სანდოობის ინტერვალი: 14,3, 22,0) (HR 0,58 [95% სანდოობის ინტერვალი: 0,46, 0,72]; p-მნიშვნელობა=<0,0001).
KEYNOTE-671-ში პაციენტების 20%-ზე მეტში აღწერილი ყველაზე ხშირი არასასურველი რეაქციები იყო გულისრევა, დაღლილობა, ნეიტროპენია, ანემია, ყაბზობა, მადის დაქვეითება, ლეიკოციტების რაოდენობის შემცირება, კუნთოვან-ჩონჩხოვანი ტკივილი, გამონაყარი, ხველა, ღებინება, დიარეა და ქოშინი. პემბროლიზუმაბის ჯგუფში ნეოადიუვანტური მკურნალობის მიმღები პაციენტების 6%-ს არასასურველი რეაქციების გამო ოპერაცია ვერ ჩაუტარდა, პლაცებოს ჯგუფში კი ეს წილი 4,3% იყო. ამასთან, პემბროლიზუმაბის ჯგუფში ნეოადიუვანტური მკურნალობისა და ოპერაციის მიმღებთა 3,1%-ს, ხოლო პლაცებოს ჯგუფში 2,5%-ს არასასურველი რეაქციების გამო ოპერაცია დაუგვიანდა.
პემბროლიზუმაბის რეკომენდებული დოზაა 200 mg ყოველ 3 კვირაში ერთხელ ან 400 mg ყოველ 6 კვირაში ერთხელ. ერთსა და იმავე დღეს მიცემისას პემბროლიზუმაბი ქიმიოთერაპიამდე გამოიყენეთ.
წყაროები
2. Wakelee H, Liberman M, Kato T, Tsuboi M, Lee SH, Gao S, Chen KN, Dooms C, Majem M, Eigendorff E, Martinengo GL, Bylicki O, Rodríguez-Abreu D, Chaft JE, Novello S, Yang J, Keller SM, Samkari A, Spicer JD; KEYNOTE-671 Investigators. Perioperative Pembrolizumab for Early-Stage Non-Small-Cell Lung Cancer. N Engl J Med. 2023 Aug 10;389(6):491-503. doi: 10.1056/NEJMoa2302983. ელექტრონულად გამოქვეყნდა 2023 წლის 3 ივნისს. PMID: 37272513.
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.