რა არის პრობიოტიკი? სასარგებლოა თუ არა იოგურტი მსხვილი ნაწლავის კიბოს პრევენციისა და ნაწლავის მიკრობიოტისთვის?

პრობიოტიკი სიტყვასიტყვით „სიცოცხლისთვის“ ნიშნავს და სასარგებლო ბაქტერიების შემცველი მნიშვნელოვანი საკვები დანამატია. პრობიოტიკურ საკვებში არის „მეგობარი ბაქტერიები“, რომლებიც ორგანიზმს მავნე ბაქტერიებისგან იცავს, ინფექციების პრევენციას ეხმარება და იმუნიტეტს აძლიერებს.

პრობიოტიკები გვხვდება რძესა და იოგურტში, კეფირში, ყველის მსგავს რძის პროდუქტებში ან შრატისა და მწნილის მსგავს სხვა ფერმენტირებულ საკვებსა და სასმელებში. ასევე გამოიყენება დანამატის სახით, ფხვნილად და ტაბლეტებად. პრობიოტიკებში არსებული სასარგებლო ბაქტერიები ლაბორატორიაში იწმინდება და ნაწლავის დარღვევით გამოწვეული დიარეის დროს ნაწლავის მუშაობის მოსაწესრიგებლად ინიშნება. რძემჟავა ბაქტერიები და bifidobacterium პრობიოტიკებად ყველაზე ხშირად გამოყენებული ბაქტერიებია.

რა სარგებელი აქვს ერთ-ერთ ყველაზე ეფექტიან პრობიოტიკს — იოგურტს?

იოგურტი, რძის პროდუქტების ერთ-ერთი ძირითადი ჯგუფი, ყველაზე ნოყიერ და ჯანსაღ საკვებს მიეკუთვნება. ის დიდი რაოდენობით ცილას, კალციუმს, ფოსფორს, იოდს, ფთორსა და სხვადასხვა ვიტამინს შეიცავს.

• პრობიოტიკების მაღალი შემცველობის გამო იოგურტის მიღება ნაწლავის ფლორას აძლიერებს და კუჭ-ნაწლავის (გასტროინტესტინურ) სისტემას ინფექციებისგან იცავს.
• ინარჩუნებს ანტიმიკრობული აქტივობის მაღალ დონეს და იმუნური სისტემის ფუნქციებს ეხმარება.
• იოგურტში არსებული პრობიოტიკური ბაქტერიები ლაქტაზას გააქტიურებით ლაქტოზის შეწოვას ზრდის.
• ამავდროულად, ლიპიდების შეწოვის შეფერხებითა და მათი სინთეზის შემცირებით სისხლში ლიპიდების დონეს ამცირებს.
• კვლევებმა აჩვენა, რომ ის იმუნოგლობულინ A-თი მდიდარი საკვებია და B ჯგუფის ვიტამინებისა და ფოლიუმის მჟავის სინთეზს ეხმარება.

იოგურტის მიერ მონელების გაადვილება და ნაწლავის ფლორაზე დადებითი გავლენა განაპირობებს მის შეტანას კოლორექტული კიბოსგან დასაცავად რეკომენდებულ საკვებს შორის

იოგურტის რეგულარული მიღება ყაბზობას აფერხებსდა, როგორც დადგინდა, ამ უბანში კიბოს განვითარების ხელშემწყობი მავნე პათოგენების დაგროვებას უშლის ხელს. კვლევებში გამოვლინდა, რომ იოგურტის ყოველდღიური რეგულარული მიღება მსხვილი ნაწლავის კიბოს რისკს ამცირებს.