რეციდიული, მეტასტაზური კუჭისა და გასტროეზოფაგური შეერთების კიბოს სამკურნალოდ Lonsurf-მა FDA-ის დამტკიცება მიიღო

რეციდიული ან მეტასტაზური და მანამდე ქიმიოთერაპიის სულ მცირე 2 ხაზით ნამკურნალები კუჭისა და გასტროეზოფაგური შეერთების კიბოსსამკურნალოდ trifluridine / tipiracil ტაბლეტებმა (Lonsurf) 2019 წლის 22 თებერვალს FDA -ის დამტკიცება მიიღო.

მოქმედების მექანიზმი: Lonsurf შედგება 2 მოლეკულის — ტრიფლურიდინისა და ტიპირაცილის — კომბინაციისგან. ტრიფლურიდინი ნუკლეოზიდის ანალოგია, ტირიპასილი კი თიმიდინფოსფორილაზის ინჰიბიტორი. ტრიფლურიდინი DNA-ის სინთეზის დროს DNA-ში ერთვება და სიმსივნური უჯრედის ზრდას აფერხებს. ტიპირაცილი კი ხელს უშლის ტრიფლურიდინის სწრაფ მეტაბოლიზმსა და ორგანიზმში მოხვედრის შემდეგ ურთიერთქმედების ზრდას.

დამტკიცება ეფუძნება საერთაშორისო, რანდომიზებულ, ორმაგად ბრმა, პლაცებოკონტროლირებულ TAGS კლინიკურ კვლევას 507 პაციენტში მეტასტაზური კუჭის ან გასტროეზოფაგური (კუჭ-საყლაპავის) შეერთების ადენოკარცინომით, რომლებსაც მანამდე ქიმიოთერაპიის სულ მცირე ორი ხაზი ჰქონდათ მიღებული.

პაციენტები ორ ჯგუფად 2-ისა და 1-ის თანაფარდობით განაწილდნენ. 337 პაციენტს მიეცა Lonsurf დღეში ორჯერ 35 mg/m2 დოზით და საუკეთესო მხარდამჭერი მოვლა (best supportive care, BSC), ხოლო 170 პაციენტს — პლაცებო და BSC. მედიკამენტური მკურნალობა ყოველი 28-დღიანი ციკლის 1-5. და 8-12. დღეებში ტარდებოდა.

კვლევის შედეგები

• გადარჩენის მედიანური დრო Lonsurf-ის მიმღებ პაციენტებში 5.7 თვე იყო, ხოლო პლაცებოს მიმღებებში — 3.6 თვე. ამ ეტაპის პაციენტებში Lonsurf-მა პლაცებოსთან შედარებით სიკვდილის რისკი 31 %-ით შეამცირა.
• Lonsurf-მა კიბოს პროგრესირების (წინსვლის) რისკი პლაცებოსთან შედარებით 44 %-ით შეამცირა. TAGS კვლევაში პლაცებოს მიმღებ პაციენტებთან შედარებით უფრო ხშირად გამოვლენილი Lonsurf-ის გვერდითი ეფექტები იყო: ნეიტროპენია, ანემია (სისხლნაკლებობა), გულისრევა, მადის დაქვეითება, თრომბოციტოპენია, ღებინება და დიარეა (≥ 10 % სიხშირით).

Lonsurf-ის რეკომენდებული დოზაა35 mg/m2 ტაბლეტების სახით, საკვებთან ერთად დღეში ორჯერ, ყოველი 28-დღიანი ციკლის 1-დან 5-მდე და 8-დან 12-მდე დღეებში.