როგორ იწვევს დასავლური ტიპის კვება კოლონისა და სწორი ნაწლავის კიბოს? ახალი შეხედულება

ახალმა კვლევამ ძლიერი კავშირი აჩვენა დასავლური ტიპის კვებასა და დიდი რაოდენობით პოლიკეტიდ-სინთაზა (pks+) Escherichia coli ბაქტერიის შემცველ კოლორექტული (მსხვილი ნაწლავის) კიბოს ქვეჯგუფს შორის. ეს მხარს უჭერს კვებას, ნაწლავის მიკრობიოტასა და კოლორექტულ კარცინოგენეზს (კიბოს წარმოქმნას) შორის კავშირს.

ბოსტონის Brigham and Women’s Hospital-ის პათოლოგიის განყოფილების მკვლევარმა შუჯი ოგინომ განაცხადა, რომ ახლახან დადგინდა: კოლიბაქტინის წარმომქმნელი pks+ E.coli მსხვილი ნაწლავის უჯრედებში დნმ-ის მუტაციებს იწვევს. „ჩვენმა მიგნებებმა წარმატებით დააკავშირა დასავლური ტიპის კვება კოლორექტული კიბოს დროს ამ ბაქტერიის არსებობასთან.“

კვლევა ონლაინ გამოქვეყნდა Gastroenterology ჟურნალში.

კავშირი კვების ტიპს, ნაწლავის ბაქტერიებსა და კიბოს წარმოქმნას შორის

ნაჩვენებია, რომ წითელი და დამუშავებული ხორცით, შაქრითა და რაფინირებული მარცვლეულით მდიდარი, ხოლო ბოსტნეულითა და პარკოსნებით ღარიბი დასავლური ტიპის კვება სისტემურ და ნაწლავის ანთებას იწვევს.

კვლევის ჯგუფი ამბობს: „კვებასა და ნაწლავის მავნე ბაქტერიებს შორის შესაძლო ურთიერთქმედების გათვალისწინებით, განსაკუთრებით საინტერესოა დასავლური ტიპის კვების შესწავლა კოლორექტული სიმსივნის ქსოვილში pks+ E.coli-სთან კავშირში “.

ამ კვლევაში დასავლური ტიპის კვების ქულები გამოითვალა ჯანდაცვის პროფესიონალთა შემდგომი დაკვირვების კვლევისა და ექთნების ჯანმრთელობის კვლევის მონაწილე 134775 ზრდასრულში ყოველ 4 წელიწადში მიღებული კვების სიხშირის მონაცემების გამოყენებით. 1175 კოლორექტული კიბოს სიმსივნიდან 111-ში pks+ E.coli გამოვლინდა, ხოლო დანარჩენ 1064 სიმსივნეში ამ ბაქტერიაზე შედეგი უარყოფითი იყო.

შედეგებმა აჩვენა, რომ დასავლური ტიპის კვების ქულებსა და კოლორექტული კიბოს ინციდენტობას (გამოვლენის სიხშირეს) შორის კავშირი pks+ E.coli-ის დონის მიხედვით განსხვავდებოდა და pks E.coli-ის უფრო მაღალი შემცველობის მქონე სიმსივნეები დასავლური ტიპის კვებასთან ძლიერ კავშირში იყო.

დასავლური ტიპის კვების ყველაზე მაღალი (და ყველაზე დაბალი) ქულების მქონე პირებში მრავალცვლადიანი საფრთხეთა თანაფარდობა pks+ E.coli-ის მაღალი შემცველობის მქონე სიმსივნეებისთვის 3,45 იყო, დაბალი შემცველობის pks+ E.coli-ის მქონე სიმსივნეებისთვის — 1,22, ხოლო გამოვლენადი რაოდენობით pks+ E.coli-ის არმქონე კოლორექტული კიბოს სიმსივნეებისთვის — 1,10.

მკვლევრები ამბობენ: „ჩვენი მიგნებები იძლევა მტკიცებულებებს, რომლებიც მხარს უჭერს ნაწლავის მიკრობიოტის როლს კვებასა და კოლორექტულ კიბოს შორის პათოგენური კავშირის შუამავლობაში “.

მიუხედავად იმისა, რომ მეტი კვლევაა საჭირო, ოგინომ აღნიშნა, რომ ამ მიგნებებს პოტენციური კლინიკური მნიშვნელობა აქვს. „დასავლური ტიპის კვების მქონე ადამიანებში კოლორექტული კიბოს რისკი უფრო მაღალია. მაღალი რისკის მქონე ამ პირებს, მათი კვების გამო, ალბათ უფრო მეტად უნდა ვიკვლევდეთ, ვიდრე დაბალი რისკის მქონე ადამიანებს. დიდი ალბათობით, მათ კიბოს პერსონალიზებული სკრინინგი სჭირდებათ.“ ოგინომ თქვა, რომ კვლევა ასევე ხაზს უსვამს კვების შეცვლის მნიშვნელობას კიბოს პრევენციისთვის.

მტკიცებულებებზე დაფუძნებული კვების რეკომენდაციები

ნიუ-იორკში, NYU Langone Health-ის გასტროენტეროლოგიისა და ჰეპატოლოგიის განყოფილების დოქტორი ასმა შაუკატი ამ კვლევის შესახებ ამბობს: „იგი ხელს უწყობს იმის გაგებას, თუ როგორ შეიძლება კვებამ კოლორექტული კიბოს რისკზე იმოქმედოს “. „მართალია, ეს კიბოს სკრინინგის რეკომენდაციებს არ ცვლის, მაგრამ აჩვენებს, რომ კოლორექტული კიბოს პრევენციისთვის, ცხოვრების წესის სხვა ცვლილებებთან ერთად, კვლავ უნდა ვურჩიოთ წითელი ხორცითა და რაფინირებული შაქრით ღარიბი კვება.“

ამასთან, კლივლენდის ადამიანის კვების კლინიკური ცენტრის წარმომადგენელმა ამანდა ბოდემ, რომელმაც დამოუკიდებელი შეფასებაც წარმოადგინა, აღნიშნა, რომ ამ კვლევაში ანთების გაძლიერების, დნმ-ის დაზიანებისა და კოლორექტული კიბოს გამომწვევად განხილული დასავლური კვების ფაქტორები „გასაკვირი არ არის“. „მრავალი სხვა კვლევა მნიშვნელოვან მტკიცებულებებს იძლევა, რომ კვების ისეთი კომპონენტები, როგორიცაა წითელი ხორცი, რაფინირებული მარცვლეული და შაქარი, კოლორექტული კიბოს რისკს ზრდის. როგორც ონკოლოგიის სფეროში მომუშავე დიეტოლოგისთვის, ეს კვლევა ამყარებს რჩევას, რომელსაც ზოგადად პაციენტს კოლორექტული კიბოს პრევენციის ან გადარჩენისთვის მივცემდი. დამუშავებული ხორცის შეზღუდვისა და ნაკლები რაფინირებული მარცვლეულისა და შაქრის ჭამის რეკომენდაციებთან ერთად, ლიცენზირებულ დიეტოლოგს შეუძლია ნაწლავის მიკრობიომთან დაკავშირებული პრობლემების გამოვლენაში დახმარება და კვებითი ჩარევების ინდივიდუალურად მორგება თითოეული პაციენტის პირადი არჩევანის გათვალისწინებით.“

მაგალითად, ლიცენზირებულ დიეტოლოგს შეუძლია პაციენტს გააცნოს ფართოდ მოხმარებული პროდუქტები, რომლებიც, როგორც ცნობილია, კოლორექტული კიბოს მაღალ რისკთანაა დაკავშირებული, და დაეხმაროს მათ ჩანაცვლებაში ისეთი პროდუქტებით, რომლებიც ნაწლავის სასარგებლო ბაქტერიებს აუმჯობესებს.

„როგორც ჩანს, მთლიანობაში კვების გაუმჯობესებაზე მუშაობა დაავადების რისკზე უფრო მეტად მოქმედებს, ვიდრე ერთ კონკრეტულ პროდუქტზე ყურადღების გამახვილება.“

*

• დაკავშირებული თემა: რატომ არის ხმელთაშუაზღვის დიეტა საუკეთესო? როგორ დავიცვათ იგი?