სამმაგი კომბინაცია წვრილუჯრედოვანი ფილტვის კიბოს დროს — დღემდე მიღებული საუკეთესო შედეგები

ფილტვის კიბო მსოფლიოში კიბოთი გამოწვეული სიკვდილიანობის პირველი მიზეზია, ხოლო გავრცელებული წვრილუჯრედოვანი ფილტვის კიბო მკურნალობისადმი განსაკუთრებით რეზისტენტული ქვეტიპია. ამ დაავადების სიმსივნის რთული მიკროგარემო მოიცავს მთელ რიგ ფაქტორებს, რომლებმაც შეიძლება მკურნალობის ეფექტიანობას შეუშალოს ხელი. ამიტომ მკურნალობის ახალი მიდგომები კვლევის მნიშვნელოვანი სფეროა, რომელსაც პაციენტების სიცოცხლის გახანგრძლივება და ცხოვრების ხარისხის გაუმჯობესება შეუძლია. სწორედ ამ კონტექსტში Cheng-ისა და მისი გუნდის მიერ 2023 წლის ფილტვის კიბოს მსოფლიო კონფერენციაზე წარმოდგენილი ახალი კვლევა განიხილავს მკურნალობის კომბინაციას, რომელსაც ამ სფეროში მკურნალობის ვარიანტების გაფართოების პოტენციალი აქვს.

კვლევის დეტალები

კონფერენციაზე წარმოდგენილ მულტიცენტრულ ფაზა III ETER701 კვლევაში მკვლევრებმა გავრცელებული წვრილუჯრედოვანი ფილტვის კიბოს მქონე 738 პაციენტი შემთხვევით ჯგუფებად გაანაწილეს. მათგან ნაწილმა მიიღო PD-L1 ინჰიბიტორი ბენმელსტობარტი და თიროზინკინაზის ინჰიბიტორი ანლოტინიბი ეტოპოზიდი/კარბოპლატინის ქიმიოთერაპიასთან ერთად. მეორე ჯგუფმა იგივე ქიმიოთერაპია ბენმელსტობარტისა და ანლოტინიბის ნაცვლად პლაცებოსთან (უმოქმედო ნივთიერებასთან) ერთად მიიღო. ამგვარად მკვლევრებმა ახალი მედიკამენტური კომბინაციის ეფექტიანობის შეფასება შეძლეს. მკურნალობის პირველი ეტაპი 4 ციკლად ჩატარდა.

მკურნალობის 4 ციკლის შემდეგ პაციენტები დაავადების პროგრესირებამდე ან მიუღებელი გვერდითი ეფექტების გამოვლენამდე შემანარჩუნებელი მკურნალობის სამ სხვადასხვა ჯგუფად დაყვეს: ერთმა ჯგუფმა ბენმელსტობარტისა და ანლოტინიბის კომბინაცია მიიღო, მეორემ — მხოლოდ ანლოტინიბი, ხოლო ბოლო ჯგუფმა — პლაცებო.

მკვლევრების მიზანი სიმსივნის მიკროგარემოს გადაპროგრამება და იმუნური უჯრედების ინფილტრაციის წახალისება იყო.

კვლევის პირველადი საბოლოო წერტილები საერთო და პროგრესირებისგან თავისუფალი გადარჩენა იყო.

ახალი მედიკამენტების მოქმედების მექანიზმები

ანლოტინიბი თიროზინკინაზის ინჰიბიტორია და სხვადასხვა თიროზინკინაზაზე დამიზნებით სიმსივნის ზრდასა და მეტასტაზირებას (გავრცელებას) თრგუნავს. ამ კინაზებს გადამწყვეტი მნიშვნელობა აქვთ კიბოს უჯრედების ზრდის, გამრავლებისა და ანგიოგენეზისთვის (ახალი სისხლძარღვების წარმოქმნისთვის). ანლოტინიბი რამდენიმე რეცეპტორულ თიროზინკინაზას აინჰიბირებს, მათ შორის VEGFR-ს, FGFR-ს, PDGFR-სა და c-Kit-ს.

ანლოტინიბს ჯერ არცერთი კიბოს სამკურნალოდ აშშ-ის სურსათისა და მედიკამენტების ადმინისტრაციის (FDA) დამტკიცება არ მიუღია, თუმცა ჩინეთში იგი დამტკიცებულია არაწვრილუჯრედოვანი ფილტვის კიბოსა და კიბოს ზოგიერთი სხვა სახეობის სამკურნალოდ.

ბენმელსტობარტი PD-L1 ინჰიბიტორების კლასის იმუნოთერაპიაა.

კვლევის შედეგები

• დაკვირვების მედიანური 14 თვის ბოლოს მიღებული შედეგები:
  • ბენმელსტობარტის, ანლოტინიბისა და ქიმიოთერაპიის კომბინაციის მიმღებ პაციენტებში პროგრესირებისგან თავისუფალი გადარჩენის მედიანა 6,9 თვე იყო, ხოლო პლაცებოსა და ქიმიოთერაპიის მიმღებებში — 4,2 თვე.
  • ბენმელსტობარტის, ანლოტინიბისა და ქიმიოთერაპიის კომბინაციის მიმღებ პაციენტებში საერთო გადარჩენის მედიანა 19,3 თვე იყო, ხოლო პლაცებოსა და ქიმიოთერაპიის მიმღებებში 11,9 თვე იყო.
  • კომბინირებული მკურნალობის მიმღებ პაციენტებში ობიექტური პასუხის მაჩვენებელი 81,3% იყო, ხოლო პლაცებოსა და ქიმიოთერაპიის მიმღებებში — 66,8%.
  • კომბინირებული მკურნალობის მიმღებ პაციენტებში პასუხის ხანგრძლივობის მედიანა 5,8 თვე იყო, ხოლო პლაცებოსა და ქიმიოთერაპიის მიმღებებში — 3,1 თვე.
• მკურნალობის უსაფრთხოების პროფილი:
  • კომბინირებული მკურნალობის უსაფრთხოების პროფილი შეფასდა როგორც მართვადი და ამტანი, მკურნალობასთან დაკავშირებული 3. ხარისხის ან უფრო მაღალი გვერდითი ეფექტებით.
  • კომბინაციის ჯგუფის პაციენტების 93,1%-ში დაფიქსირდა ისეთი გვერდითი ეფექტები, როგორიცაა ნეიტროფილების, თრომბოციტებისა და სისხლის თეთრი უჯრედების შემცირებული რაოდენობა.

შედეგი

ამ ფაზა III კლინიკური კვლევის შედეგები უაღრესად იმედისმომცემია, რადგან ბენმელსტობარტის, ანლოტინიბისა და ქიმიოთერაპიის კომბინაცია გავრცელებული წვრილუჯრედოვანი ფილტვის კიბოს პირველი ხაზის მკურნალობისთვის დღემდე აღწერილ საუკეთესო გადარჩენის შედეგებს აჩვენებს.