შეიძლება იმუნოთერაპიამ კუჭის კიბოში ოპერაცია ჩაანაცვლოს?

საფრანგეთში ჩატარებული ახალი კვლევა აჩვენებს, რომ იმუნოთერაპია კუჭის კიბოს მქონე ზოგ პაციენტს ოპერაციის თავიდან აცილებაში შეიძლება დაეხმაროს.

GERCOR NEONIPIGA ფაზა II-ის კლინიკური კვლევა შედარების ჯგუფის გარეშე მხოლოდ 32 პაციენტს მოიცავდა. მიუხედავად ამისა, კომბინირებული იმუნოთერაპიის 6 კურსის — nivolumab (Opdivo) და ipilimumab (Yervoy) — შემდეგ ოპერირებულ 29 პაციენტიდან 17-ში (59%) სიმსივნის ნიშანი არ იყო, ანუ სამოც პროცენტამდე სრული პათოლოგიური პასუხის მაჩვენებელი!

მართლაც, ორმა პაციენტმა ოპერაციაზე უარი თქვა, რადგან ოპერაციამდე კუჭის ენდოსკოპიურმა ბიოფსიებმა სიმსივნური უჯრედების არარსებობა აჩვენა. მესამე პაციენტში, რომელსაც მანამდე მეტასტაზი განუვითარდა, ოპერაცია გაუქმდა.

12-თვიანი მედიანური დაკვირვების შემდეგ 30 პაციენტს (94%) რეციდივი (კიბოს განმეორება) ან პროგრესირება არ ჰქონია. დანარჩენ ორ პაციენტს ოპერაციამდე მეტასტაზი განუვითარდა, ხოლო ერთი პაციენტი ოპერაციიდან 3 დღის შემდეგ გულ-სისხლძარღვთა გართულებით გარდაიცვალა.

თუ შედეგები დამატებითი კვლევებით დადასტურდება, ეს კომბინირებულ იმუნოთერაპიაზე მოპასუხე კუჭის კიბოს მქონეთათვის მნიშვნელოვანი შესაძლებლობა იქნება. პარიზის Sorbonne-ის უნივერსიტეტის სამედიცინო ონკოლოგიის პროფესორმა, მთავარმა მკვლევარმა დოქტორმა Thierry Adnre-მ, ამერიკის კლინიკური ონკოლოგიის საზოგადოების (ASCO) 2022 წლის გასტროინტესტინური კიბოების სიმპოზიუმ-ზე შედეგების წარდგენისას თქვა: „ოპერაციის თავიდან აცილება ამ პაციენტებისთვის ოცნებაა“.

ეს კვლევა „წამოჭრის კითხვას, შეიძლება თუ არა კუჭის ლოკალიზებული (ადრეული სტადიის) კიბოს მქონე ზოგ პაციენტში ოპერაციის გადადება ან თავიდან აცილება.“ შედეგების გათვალისწინებით, „ოპერაციის გარეშე მკურნალობა შესაძლებელი ჩანს ადრეული კუჭის კიბოს მქონე არა ყველასთვის, არამედ ალბათ ნახევრისთვის, შესაძლოა მეტისთვისაც.“ მან თქვა, რომ ოპერაციაზე უარის მთქმელი ორი მონაწილის მსგავსად, ოპერაციამდე ენდოსკოპიური ბიოფსიები შეიძლება სრული პასუხის მქონეთა გამოსავლენად გამოიყენონ, შემდგომი აქტიური მეთვალყურეობით.

კვლევაში კუჭის კიბოს მქონე 16 და ეზოფაგოგასტრალური (საყლაპავისა და კუჭის შეერთების) ადენოკარცინომის მქონე 16 პაციენტი ჩაერთო. ყველა მათგანის სიმსივნეს ჰქონდა MSI-H ან dMMR სახელით ცნობილი DNA-ს აღდგენის მექანიზმის დარღვევა, რომელსაც იმუნოთერაპიაზე პასუხის პროგნოზირების ბიომარკერად ვიყენებთ (ეს გენეტიკური მდგომარეობა კუჭის კიბოების დაახლოებით 20%-ში გვხვდება).

თავდაპირველად პაციენტებიდან:

• 22-ს ჰქონდა T3 სტადიის კუჭის კიბო (სიმსივნე კუჭის შემომსაზღვრელ სეროზულ გარსს აღწევს, მაგრამ მუცლის გარსს, პერიტონეუმს, არა),
• 4-ს ჰქონდა T2 სტადია (სიმსივნე კუჭის კუნთოვან შრეს აღწევს), ხოლო
• 6 პაციენტში სტადიის ენდოსკოპიურად შეფასება ვერ ხერხდებოდა.

უცნობი იყო, გავრცელდა თუ არა კიბო კუჭის ირგვლივ ლიმფურ კვანძებში, თუმცა საწყისად მეტასტაზი არ ჰქონდათ.

12 კვირის განმავლობაში პაციენტებს nivolumab-ის 6 კურსი 240 mg დოზით და ipilimumab-ის 2 კურსი 1 mg/kg დოზით ჩაუტარდათ. nivolumab-ის ბოლო ინექციიდან მედიანურად 5 კვირის შემდეგ R0 რეზექცია (კუჭის კიბოს ფართო ოპერაცია) გაკეთდა.

შედეგები

• 17 პაციენტის ქირურგიულ ნიმუშში (რაც ყველა პაციენტის 59%-ს შეესაბამება) ნეოადიუვანტურ (ოპერაციამდე სიმსივნის შემამცირებელ) იმუნოთერაპიაზე სრული პათოლოგიური პასუხი გამოვლინდა [Becker-ის სიმსივნის რეგრესიის ხარისხი (TRD) 1a= ypT0N0]
• 4 პაციენტში სიმსივნის საწოლში ნარჩენი სიმსივნური უჯრედები 10%-ზე ნაკლები იყო (TRD 1b)

სიმსივნის პასუხის მიხედვით 25 პაციენტს ოპერაციის შემდეგ დამატებით nivolumab-ის 9 შეყვანა ჩაუტარდა, თვეში 480 mg დოზით.

დოქტორმა Andre-მ განმარტა, რომ სირთულისა და გვერდითი მოვლენების გამო პაციენტებს ოპერაციის თავიდან აცილება სურთ. ამასთან, 54%-ს სხვადასხვა გართულება ჰქონდა, მათ შორის ანასტომოზის გაჟონვა, პანკრეატიტი, პნევმონია და სხვა პრობლემები.

ორმაგმა იმუნოთერაპიამ წინათ აღწერილის მსგავსი გვერდითი მოვლენები გამოიწვია; პაციენტების 25%-ს მე-3 ან მე-4 ხარისხის მოვლენები ჰქონდა.

კვლევა საფრანგეთის 10 ცენტრში ჩატარდა. მონაწილეთა დაახლოებით სამი მეოთხედი მამაკაცი იყო, მედიანური ასაკი კი 65 წელი.