შესაძლებელია თუ არა დღეში 1 საათი ვარჯიშით სარძევე ჯირკვლის კიბოს რისკის შემცირება?

ბოლო პერიოდში ჩატარებული კვლევის შედეგებმა, რომლებიც 2014 ევროპის სარძევე ჯირკვლის კიბოს კონფერენციაზე წარადგინეს, აჩვენა, რომ დღეში მინიმუმ 1 საათის განმავლობაში რეგულარული ვარჯიში, ასაკის, წონისა და საცხოვრებელი გეოგრაფიული მდებარეობისგან დამოუკიდებლად, სარძევე ჯირკვლის კიბოს რისკს ამცირებს.

სარძევე ჯირკვლის კიბო ქალებში ყველაზე ხშირად გავრცელებული კიბოს სახეობაა. ყოველწლიურად დაახლოებით 227.000 ქალს სარძევე ჯირკვლის კიბოს დიაგნოზს უსვამენ, ხოლო ყოველწლიურად დაახლოებით 40.000 ქალი სარძევე ჯირკვლის კიბოთი იღუპება. ის ფაქტი, რომ სიცოცხლის განმავლობაში ყოველ 8 ქალიდან ერთს სარძევე ჯირკვლის კიბო უვითარდება და ეს მაჩვენებლები ყოველდღიურად კიდევ უფრო იზრდება, საკმაოდ შემაშფოთებელი და საფიქრებელია. ეს მდგომარეობა ნათლად გვიჩვენებს, რამდენად აუცილებელია ამ დაავადებისგან თავის დაცვა. რადგან, როგორც ყველა დაავადების შემთხვევაში, სარძევე ჯირკვლის კიბოს დროსაც ყველაზე ეფექტური მკურნალობა დაავადების წარმოშობამდე პრევენცია, ანუ თავის დაცვაა. სწორედ ბოლო პერიოდში გამოქვეყნებულმა ამ კვლევამ ძლიერი მტკიცებულებებით აჩვენა, რომ რეგულარული ვარჯიში სარძევე ჯირკვლის კიბოს განვითარების რისკს ამცირებს.

მანამდე ჩატარებულ მრავალ სანდო კვლევაში ძლიერი მტკიცებულებებით იყო ნაჩვენები, რომ რეგულარული ვარჯიში ესტროგენის დონეს ამცირებს. თუ გავითვალისწინებთ იმასაც, რომ ესტროგენის მაღალი დონე სარძევე ჯირკვლის კიბოს რისკში მნიშვნელოვან როლს ასრულებს, ეს ფაქტი ხსნის, თუ როგორ ამცირებს რეგულარული ვარჯიში სარძევე ჯირკვლის კიბოს რისკს.

2014 ევროპის სარძევე ჯირკვლის კონფერენციაზე წარდგენილი ეს კვლევა ბოლო 26 წლის განმავლობაში გამოქვეყნებული 37 კვლევის მეტა-ანალიზს წარმოადგენს. მეტა-ანალიზი არის კონკრეტულ საკითხზე ჩატარებული რამდენიმე ერთმანეთისგან დამოუკიდებელი კვლევის შედეგების გაერთიანებისა და მიღებული კვლევითი მონაცემების სტატისტიკური ანალიზის მეთოდი. სწორედ ამიტომ, ის მტკიცებულების ყველაზე მაღალი ხარისხის მქონე კვლევის მეთოდია. ჩატარებული კვლევა 4.2 მილიონზე მეტი ქალის მონაცემებს მოიცავს. ამ კვლევაში ერთმანეთს შეადარეს ფიზიკური აქტივობის მაღალი და დაბალი დონის მქონე ქალები და აღინიშნა, რომ რეგულარული ვარჯიში, ასაკის, წონისა და საცხოვრებელი გეოგრაფიული მდებარეობისგან დამოუკიდებლად, სარძევე ჯირკვლის კიბოს რისკს ამცირებს. ანუ, ამ კვლევის მიხედვით, რამდენი წლისაც არ უნდა იყოს ადამიანი, რამდენს იწონიდეს და სადაც არ უნდა ცხოვრობდეს, ვარჯიში სარძევე ჯირკვლის კიბოს რისკს ამცირებს. ამავე კვლევაში დადგინდა, რომ სამკურნალო მიზნით გარედან მიღებული ესტროგენი სარძევე ჯირკვლის კიბოს რისკს ზრდის და ამ ადამიანებში რეგულარული ვარჯიში რისკის ამ ზრდასაც აფერხებს.

შედეგად, ჩატარებულმა კვლევამ კიდევ უფრო გააძლიერა მტკიცებულებები, რომ რეგულარული ვარჯიში სარძევე ჯირკვლის კიბოს რისკს ამცირებს, და მნიშვნელოვანი წვლილი შეიტანა იმაში, რომ რეგულარული ვარჯიშის სარგებელთა ჩამონათვალს კიდევ ერთი სარგებელი მკაფიოდ დამატებოდა. როგორც ცნობილია, რეგულარული ვარჯიში ძალზე სასარგებლოა არა მხოლოდ სარძევე ჯირკვლის კიბოს, არამედ ზოგადად მრავალი სახეობის კიბოსა და კიბოსგან განსხვავებული მრავალი დაავადების, მათ შორის გულის დაავადებებისა და შაქრიანი დიაბეტის, პროფილაქტიკისთვის. დღესდღეობით სარძევე ჯირკვლის კიბოს მსგავსად მრავალი პრევენცირებადი დაავადება ფართოდ ვრცელდება. ასეთ ვითარებაში კიდევ უფრო მნიშვნელოვანი ხდება, რომ ჩვენც ვიზრუნოთ ზოგად ჯანმრთელობაზე და ამ დაავადებებისგან თავის დასაცავად აუცილებელი ზომები მივიღოთ. რადგან ჯანმრთელობა ერთ-ერთი ყველაზე იოლად დასაკარგი და დაკარგვის შემდეგ აღსადგენად ერთ-ერთი ყველაზე რთული რამაა.