ციფრული ძუძუს ტომოსინთეზისთვის ხელოვნური ინტელექტის ტექნოლოგიამ FDA-ს დამტკიცება მიიღო
ამ სტატიაში
ProFound AI სახელის მქონე, ღრმა სწავლების მოდელზე დაფუძნებული ხელოვნური ინტელექტის (artificial intelligence, AI) პროგრამული უზრუნველყოფა ძუძუს კიბოს დიაგნოსტიკაში კომერციული გაყიდვისა და კლინიკური გამოყენებისთვის აშშ-ის სურსათისა და წამლების ადმინისტრაციამ (FDA) დაამტკიცა. განცხადება გაავრცელა ციფრული ძუძუს ტომოსინთეზის პროგრამის შემქმნელმა გლობალურმა სამედიცინო ტექნოლოგიურმა კომპანიამ iCAD-მა.
რა არის ტომოსინთეზი?
ტომოსინთეზის მოწყობილობა ციფრული მამოგრაფიის ისეთი ფორმაა, რომელსაც 3-განზომილებიანი გამოსახულება შეუძლია. ძუძუს 3 განზომილებაში და 1 mm ჭრილებით ძალიან დეტალური გამოკვლევის საშუალებას იძლევა ეს ონკოლოგიური ვიზუალიზაციის მოწყობილობა. ძუძუ ნაკლებად იკუმშება და მის გარშემო მოძრავი აპარატი დაბალდოზიან რენტგენულ სხივებს აგზავნის. მიიღება 3-განზომილებიანი გამოსახულებები. ეს მამოგრაფიის სახეობაა და, მიუხედავად იმისა, რომ სტანდარტულ მამოგრაფიაზე ხშირად მეტ გამოსხივებას იყენებს, პრობლემურ უბანს უფრო მკაფიოდ აჩვენებს. FDA-მ ტომოსინთეზი 2011 წელს დაამტკიცა როგორც კიბოს დიაგნოსტიკის ტესტი, თუმცა ადრეული აღმოჩენის მიზნით კიბოს სკრინინგის სტანდარტი კვლავ ციფრული მამოგრაფიაა.
FDA-ს დამტკიცება ეფუძნება ფართო კვლევის დადებით კლინიკურ შედეგებს; კვლევა 2018 წლის დასაწყისში დასრულდა და 25-30 ნოემბერს ჩიკაგოში გამართულ 2018 წლის ჩრდილოეთ ამერიკის რადიოლოგიის საზოგადოების (RSNA) ყოველწლიურ შეხვედრაზე წარადგინეს. 260 ტომოსინთეზის შემთხვევა შეაფასა 24 რადიოლოგმა iCAD-ის ProFound ხელოვნური ინტელექტის დახმარებითა და მის გარეშე.
კვლევის მიგნებები აჩვენებს:
- კიბოს გამოვლენის მაჩვენებლის ზრდას,
- ცრუ დადებითი მაჩვენებლების შემცირებას და
- პაციენტების განმეორებით გამოძახებებისა და ინტერპრეტაციის დროის მნიშვნელოვან კლებას.
ტექნოლოგია დიდ იმედს აძლევს რადიოლოგებს კიბოს გამოვლენაში, საეჭვო შემთხვევების გამო განმეორებითი გამოძახებების შემცირებასა და ტომოსინთეზის კვლევების წაკითხვის ეფექტიანობის გაზრდაში.
კლინიკური მონაცემებით, ProFound AI ალგორითმის გამოყენებისას ტომოსინთეზის შემფასებლებში შემთხვევის დონეზე მგრძნობელობა (კიბოს გამოვლენის უნარი) საშუალოდ % 8-ით იზრდება, პაციენტების არასაჭირო განმეორებითი გამოძახებები საშუალოდ % 7-ით, ხოლო წაკითხვის დრო მნიშვნელოვნად მცირდება. სხვადასხვა კვალიფიკაციის რადიოლოგებს შეუძლიათ ამ ხელოვნურ ინტელექტზე დაფუძნებული ტექნოლოგიით ისარგებლონ ტომოსინთეზის დიდი მონაცემთა ნაკრების შეფასებისას.
ძუძუს კიბოს დიაგნოსტიკისა და ცრუ დადებითი შედეგების კლინიკური მაჩვენებლების გაუმჯობესებასთან ერთად, კვლევამ აჩვენა, რომ ProFound AI რადიოლოგის წაკითხვის დროს საშუალოდ პროცენტულად 50-ზე მეტით ამცირებს. 2-განზომილებიანიდან 3-განზომილებიან მამოგრაფიაზე გადასვლისას წაკითხვის დროის მატება რადიოლოგებისთვის მნიშვნელოვანი სირთულე იყო.
პროგრამა ამჟამად აშშ-ში, კანადასა და ევროპაში ციფრული ძუძუს ტომოსინთეზის სისტემებთან შეიძლება გამოიყენებოდეს.
ტექნოლოგიის შესახებ:
ProFound AI ციფრული ძუძუს ტომოსინთეზისთვის ღრმა სწავლების მეთოდის მქონე მაღალეფექტიანი კიბოს დიაგნოსტიკისა და სამუშაო პროცესის გადაწყვეტაა. ის PowerLook სერვერულ პლატფორმაზე NVIDIA Graphical Processing Units (GPU)-ით მუშაობს. PowerLook მოქნილი და საიმედო DICOM პლატფორმაა, რომელიც ადვილად ერთიანდება გამოსახულების მოდულებთან, მამოგრაფიის სამუშაო სადგურებთან, PACS-სა და გამოსახულების შენახვის სისტემებთან. უახლესი GPU ტექნოლოგიით ალგორითმი ტომოსინთეზის შემთხვევას სწრაფად ამუშავებს და შედეგებს რადიოლოგს მაქსიმალური ეფექტიანობით აწვდის.
- DICOM: Digital Imaging and Communications in Medicine (ციფრული გამოსახულება და კომუნიკაცია მედიცინაში)
- PACS: Picture Archiving and Communication Systems (გამოსახულების არქივირებისა და კომუნიკაციის სისტემები)
- 12 რამ, რაც ყველა ქალმა პირველ მამოგრაფიამდე უნდა იცოდეს
- რატომ უნდა დავიწყოთ მამოგრაფია 40-იან წლებში?
- არსებობს ძუძუს კიბოს რისკი მამოგრაფიის უარყოფითი პასუხის მიუხედავად?
წყაროები
By The ASCO Post, 25 December 2018
ეს სტატია სასარგებლო იყო თქვენთვის?
თქვენი გამოხმაურება გვეხმარება შინაარსის გაუმჯობესებაში.
მკითხველთა კომენტარები
გაგვიზიარეთ თქვენი კომენტარი
თქვენი სახელი და კომენტარი მხოლოდ ადმინისტრატორის დამტკიცების შემდეგ გამოქვეყნდება. ელფოსტის მისამართი ვიზიტორებს არასოდეს ეჩვენებათ.
პირველმა დაწერეთ კომენტარი.