3. mərhələ ağciyər xərçənginin müalicəsində immunoterapiya Durvalumab uğuru

Əməliyyat edilə bilməyən 3. mərhələ qeyri-kiçikhüceyrəli ağciyər xərçənginin müalicəsi illərdir çətinlik yaşadığımız və yeni axtarışlar apardığımız sahədir. Bu xəstə qrupunda standart müalicə radioterapiya ilə eyni vaxtda kimyaterapiyadır. Əlimizdəki ən mühüm iki müalicə üsulunu birlikdə istifadə etsək də, xəstələrin yalnız %15-i beş il və daha çox yaşayır.

Son illərdə immunoterapiyaların irəliləmiş mərhələ (metastatik) ağciyər xərçəngi də daxil olmaqla çoxlu xərçəng növündə təsiri sübut edilmişdir. ESMO 2017 Avropa Onkologiya Konqresində immunoterapiyaların daha erkən mərhələli müxtəlif xərçəng xəstələrində də təsiri sınaqdan keçirildi. PACIFIC adlı tədqiqatda əməliyyata uyğun olmayan, 3. mərhələ qeyri-kiçikhüceyrəli ağciyər xərçəngli, radioterapiya ilə eyni vaxtda kimyaterapiyadan sonra xəstəliyi nəzarət altında olan xəstələrdə 1 il durvalumab ( Imfinzi ) adlı immunoterapiya dərmanı istifadə edildi.

Durvalumab adlı immunoterapiya dərmanı müdafiə hüceyrələrimizin xərçəngə qarşı korluğuna səbəb olan PDL-1 adlı zülalı bloklayaraq müdafiə hüceyrələrimizin xərçəngli hüceyrəni tanımasına və məhv etməsinə kömək edir.

PACIFIC adlı faza 3 randomizə edilmiş tədqiqat 26 fərqli ölkə və 235 xərçəng mərkəzinin iştirakı ilə aparıldı. Tədqiqata 713 mərhələ 3 qeyri-kiçikhüceyrəli ağciyər xərçəngi xəstəsi 2-yə 1 nisbətində daxil edildi. Bütün xəstələrə radioterapiya ilə eyni vaxtda kimyaterapiya verildiyi halda, 2/3-nə radio-kimyaterapiyadan sonra durvalumab 10 mg/kg dozada iki həftədə bir 12 ay verildi, digər qrupa isə plasebo tətbiq olundu.

İmmunoterapiya alan xəstələrdə xəstəliyin irəliləməsinə qədər median müddət 16.8 ay, yalnız radio-kimyaterapiya alan qrupda isə 5.6 ay olmuşdur.

Durvalumabın ağciyər xərçənginin irəliləməsini %48 azaltdığı müəyyən edildi. Müalicənin yan təsirləri durvalumab alan xəstələrdə yüksək olsa da, idarəolunan sayılmışdır.

Müalicə strategiyasını dəyişə biləcək səviyyədə ilkin nəticələr alınan PACIFIC tədqiqatında mərhələ 3 qeyri-kiçikhüceyrəli ağciyər xərçənginin müalicəsində uzun illərdən sonra ilk dəfə ümidverici nəticələr əldə edilmişdir. Ümid edirik ki, sağqalma nəticələri də bu uğurlu ilkin nəticələri dəstəkləyər və bu sahədə xəstələrimizin daha çox faydalandığı yeni müalicəyə çatmış olarıq.

Uzunmüddətli müqayisəli yaşam müddətlərinin nəticəsini gözləyir və sizinlə paylaşacağıq.