Anasının başucunda keçirdiyi 5 gün bir onkoloqun dünyagörüşünü genişləndirdi

Doktor Pamela Kunz “Həkim olaraq yaxşı görülən və görülməyən işlərə özünəməxsus baxışım olduğunu düşünürdüm, ta ki hər şeyə xəstə yaxını gözü ilə baxana qədər” deyib.

ABŞ-da 2021-ci ilin qadın onkoloqu seçilən Kunz Smilow Xərçəng Xəstəxanasındakı Mədə-bağırsaq Xərçəngləri Mərkəzinin və Nyu-Heyven, Konnektikutdakı Yale Xərçəng Mərkəzinin direktorudur. Lakin anası xəstəxanaya yerləşdiriləndə çox fərqli rola keçib.

Eşitməkdə çətinlik çəkən anası xəstəxana otağına girib-çıxan səhiyyə işçilərini gördükcə çaşırdı və ona baş verənləri izah edəcək birinə ehtiyacı vardı. Stasionar xəstə baxımı prosesini anasının yanında müşahidə etmək onun üçün təəccüblü, eyni zamanda aydınlaşdırıcı olub.

Kunz “Biz həkimlər xəstənin müalicə planını müəyyən edib növbəti xəstəyə keçməyə öyrəşmişik, lakin bu işin insan münasibətləri tərəfini unutmamalıyıq. Sevdiyiniz və sizə yaxın birinin xəstəxana yatağının başucunda olmaq çox fərqli təcrübədir. Kaş bunu əvvəldən görə biləydim” deyə əlavə edib.

Yaşadıqlarını Twitter-də paylaşmağa qərar verən Kunz “ünsiyyət inciləri” adlandırdığı, diqqət yetirdiyi bəzi məqamları və təkliflərini yazıb. Bunlar:

Ünsiyyət inciləri

1. Xəstəyə tam adınızla özünüzü, vəzifənizi və komandanızı təqdim edin. Ad kartınız görünən olsun. Otaqlara girib-çıxan insanların sayı xəstələri və yaxınlarını çox çaşdıra bilər. Məsələn, “Mənim adım Dr. X-dir. Daxili xəstəliklər komandasında rezidentəm.”
2. Xəstə ziyarətinizi günün planının xülasəsi ilə bitirin.
3. Tibbi terminlərdən qaçının. Yavaş və aydın danışın. Xəstələriniz və ailə üzvləri üçün bir müəllim olduğunuzu unutmayın.
4. Maskalar, xüsusən eşitmə itkisi olan xəstələrin eşitməsini çətinləşdirir.
5. Bir çox yaşlı xəstə xəstəxanada çaşır, buna görə təkrar izah çox faydalı olur.
6. Planı çatdırmaq üçün gündə ən azı bir dəfə bir ailə üzvü ilə danışın.
7. Son dəqiqə və ya gözlənilməz evə buraxılmalardan qaçınmağa çalışın – bunlar xəstələri və ailə üzvlərini narahat edir. 1-ci gündən evə buraxılma planını və təhlükəsiz buraxılmadan əvvəl nələrin edilməli olduğunu danışın. “Xəstəxanadan ayrılmağınız üçün X, Y, X baş verməlidir.”
8. Xəstələrinizlə xəstəxanaya gəlmə səbəblərindən əlavə başqa bir şey haqqında danışmağa çalışın (bir vaxtlar müdrik müəllimimdən aldığım məsləhət).
9. Mümkünsə xəstənizlə göz səviyyəsində oturun (@YNHH-nin bu oturacaqlarını sevirəm).
10. Xəstəni və yaxınını dinləməyə vaxt ayırın.

Doktor Kunz təkliflərini qızıl qayda ilə tamamlayıb:

Və nəhayət, xəstənizi öz yaxınınızı müalicə edirmiş kimi müalicə edin.

Bu mesaj Twitter-də qısa müddətdə minlərlə bəyənmə alıb və paylaşılıb. Paylaşımının altındakı şərhləri görəndə sevinən Kunz “Bu, tibbin insani tərəfinin nümunəsidir. Həkimlərin həmişə ayırmağa çox vaxtı olmaya bilər, lakin qeyd etdiyim məqamlardan bir neçəsini tətbiq etmək çox vaxt almaz. Hər xəstəyə ayırdığımız vaxt onlara etdiyimiz sərmayədir” deyib.

Bir rezidentin hər gün günorta zəng edib anasının vəziyyəti barədə məlumat verməsi onu çox sevindirirdi. “Bu, çox dəyərli idi”.